Артыкулы: Салагуб (Салагубавіч) Юрый Андрэевіч

Салагуб (Салагубавіч) Юрый Андрэевіч (?—1514) — дзяржаўны дзеяч.

З шляхецкага роду герба «Праўдзіц». Бацька: Андрэй. Браты: Багдан, Мікалай. Сястра: Гальшка.

Гаспадарскі дваранін у 1488. Намеснік смаленскі ў 1503—1507, ваявода смаленскі ў 1514. У час кіравання Смаленскам у якасці намесніка вёў памежную барацьбу з маскоўскімі нападамі. У 1514 як ваявода ўзначаліў абарону Смаленска ад войск Васіля ІІІ, але не здолеў утрымаць горад. Пасля здачы Смаленска выехаў у ВКЛ, дзе быў абвінавачаны ў здрадзе і па загадзе Жыгімонта Старога пакараны смерцю.

Маёнткі: Івянец, Целякі, Грэбень, Кіявец, Кабылічы, Касычохі, Павідзішкі, Яршэвічы.

Жонка(шлюб прынамсі з 1490): Людміла (?—пасля 1522); бацька: князь Петка Раманавіч Свірскі.

Сыны: Мікалай; Войцех; Станіслаў.

Падрабязнасці:

Чарняўскі Фёдар. Смаленскі намеснік Юры Андрэевіч Салагуб — абаронца ўсходнх межаў ВКЛ у канцы XV—пачатку XVI ст. // Герольд Litherland. 2014. № 20. С. 80—92.

Wilamowski Maciej. Sołłohub (Sałohubowicz, Sołohub, Sołohubowicz) Jerzy (Jurij) z Iwieńca // PSB. T. XL/2. Z. 165. Warszawa; Kraków, 2000. S. 318—319.

© Валерый Пазднякоў, 2020