Артыкулы: Ганна (мястэчка)

Ганна (цяпер в. Мілаславічы, цэнтр сельсавета ў Клімавіцкім р-не Магілёўскай вобл., Рэспубліка Беларусь), мястэчка ў Мсціслаўскім ваяв.

Заснавана ў 1725 на тэрыторыі Углянскага войтаўства, на землях в. Мілаславічы, на правым беразе р. Іпуць. Тэрмін слабады мястэчку быў вызначаны на 15 гадоў. Улічваючы сугучнасць назвы мястэчка з імем тагачаснай уладальніцы Крычаўскага стараства — Ганны Катаржыны Радзівіл з Сангушкаў, можна меркаваць, што менавіта яна заснавала мястэчка і дала яму сваё імя. Паводле інвентара Крычаўскага стараства 1727, у мястэчку 87 дымоў, млын і фолюш. Згодна з інвентаром стараства 1747, мястэчка Г. мела і другую назву — Мілаславічы. Яго ядром быў рынак плошчай каля 1500 м²з якога выходзілі 4 вуліцы: Шумяцкая, Ганчарная, Старэцкая і Ладзяшанская; над Іпуццю ішла вуліца Лагавая; усяго было 44 жылыя дамы. У 1779 у Мілаславічах налічваўся 51 двор, у якіх пражывалі 382 жыхары. Пасля 1-га падзелу Рэчы Паспалітай (1772) у складзе Рас. імперыі, у 1773 Г. афіцыйна перайменавана ў Мілаславічы.

Літаратура:

Мяцельскі А.А. Фарміраванне мястэчак Крычаўскага староства // Castrum, urbis et bellum. Баранавичы, 2002;

Яго ж. Мястэчкі Мсціслаўскага ваяводства XVI—XVIII стст. // Гістарычна-археалагічны зборнік. Мн., 2008. № 23.

© Андрэй Мяцельскі, 2010