Дакументы: Статут Вялікага Княства Літоўскага 1566 г. Раздзел 1

Статут Вялікага Княства Літоўскага 1566 г. Раздзел 1.

Артыкулы поправы статутовое, которые за волею ведомостью Короля его милости Великого Князства Литовского Жикгимонта Августа, с потребы прав земских панства его королевское милости Великого Князства Литовского, за зволеньем панов рад их милости того панства духовных и свецких, такжо князей и панов врядников его королевское милости, панов послов земских и всех станов сейму належачих, на сойме валном Берестейском поправленые. Которые их милость панове рада и вси станы на сойме в Берестью поправивши, через старосту Жомоитского, маршалка земского Великого Князство Литовского, державцы Плотельского и Тельшовского, пана Яна Ходкевича ку его Королевское милости до Люблина прислати были рачили. Где господар его милостть тых артыкулов огледавши и их уфаливши, моцъю сойму Берестейского до статуту прав новых вписати росказать рачил, умоцняючи то, аж хотя бы в статуте што были тым артыкулом нижей описаным было противнего, тогды вжо тые артыкулы первей в статуте о таких справах выписаные, ни которое моцы вжадного права мети и держаны быти не мають, але тыми артыкулами на сойме Берестейском уставленными вси станы Великого Князства Литовского, и вси земли тому панству належачие, радити и справоватися мають.

Статут Великого Князства Литовскаго.

Жикгимонт Август Божъею миллостью король польский. великий князь литовский, руский, пруский, жомоитский, мазовецкий, ифлянтский и иных. Чиним явно всим вобец и каждому зособна нинешним и на потом будучим, иж тот статут Великому Князеству Литовскому, панству нашому и всим землям к нему прислухаючим, упривильеваный в Белску через нас господара на сойме звыклом великом валном, который з стародавных часов звыклый бывати в том панстве нашом Великом Князстве Литовском, зложоный и справленый и постановеный через обранье певное парсуны з роду и народу шляхецкого станов соймом належачим родичом и обывателем того Великого Князства, леч иж ку ужыванью не пришол аж и до сих часов не выдан. Тогды то с тых прычин сталосе, иж через нас и през панов рад наших также и всих тых станов Великого Князства Литовского сойму належачых не был еще проглядан и ревидовань про войну уставичную, которую есьмо вели по вси тые часы з Московским, а так на теперешнем валном сойме Виленском важными справами затруднени. Ведже яко в час мел знести, видечи быть потребную справедливость всим про то с паны рады нашими и зо всими станы сойму належачыми на поправованье и прегляданье того статуту заседшы и скорикговавшы вже на тот час на вси потомные часы ку ужыванью, водлуг привильев господарских Бельского и Виленьского в тоть статут вышей вложоных и описаных, прыложывшы к ним третий прывилей, в тот же статут казавшы вписати на поровнанье и объявенье всих станов, иж ровно ку достоенствам так литовский яко и руский народ приходити маеть, выдали есмо и выдаем, пры бытности и з уфалою и позволеньем рад наших и всих станов сойму належачых, всим в посполитость, водле которого вжо вси обыватели того панства нашого Великого Князства Литовского и вси земли ку нему належачие будуть се радити и судити, поправуючы и прибавляючы водле часу потребы артыкулов в том статуте на соймех валных Великого Князства Литовского, так яко около того поправованья артыкуловь шырей доложоно и в привильи Бельском. А выдань есть сесь статут на сойме Виленском великом валном, року Божъего нароженья тисеча пять сот шестдесят шостого, месяца марта, первого дня.

Роздел первый. О персоне господарской.

Артыкул 1.

Вси обыватели Великого Князства Литовского оуным правом писаным и от нас даным сужоны быти мают.

Наперед мы господар обецуем и шлюбуем под тоюж прысегою, которую учинили есьмо всим обывателем всих земль того панства нашого Великого Князства Литовского, иж всих княжат, панов рад духовных и свецких, панов хоруговных, шляхту, места и всих подданых наших и всих станов в том панстве нашом Великом Князстве Литовском, также и земль Русских Киевское, Жомоитское, Волынское, Подляшское и иных земль прислухаючых к тому панству нашому, почоншы от вышнего стану аж и до нижнего, тыми одными правы писаными от нас даными судити исправовати.

Артыкул 2.

Мы господар обецуем и шлюбуем никого не карати на заочное повееданье, хотя бы се дотыкало и о ображенье маестату нашого господарского; и хто теж што на кого вел, а не довел, тым сам мает каран быти.

Теж предъречоным прелатом княжатом, понятом, паном, радам духовным и свецким, паном хоруговным шляхтам и местам земли Великого Князства Литовского, Руское, Киевское, Жомоитское, Волынское, Подляшское, Смоленьское, Полоцкое, Витебское, Мстиславское и иных земль Великого Князства Литовского, обецуем словом нашим господарским, иж над жадного человека выданье албо осоченье явное таемное и подозренье тых станов вышеймененых карати не хочем ани винити которою кольвек виною пенежною, кривавою, везеньем, або достоенств врядов або именья отнятьем; нижли аж бы первей у суду явным рядом и поступом права, коли жалобник то есть повод и отпор обжалованый очивисте станут, и достаточне на конец будут поконаны, которые по суде и таковом поконанью винни, мають быти караны виною у артыкулех нижей описаных меновите назначоною. А хто бы теж кого колвек, обмовляючи вчинил к соромоте и зелживости, а шло бы о честь або о горло або о которое кольвек скаранье; тогды тоть, хто на кого мовит и ведет, а не доведет, тым караньем сам мает быти каран.

Артыкул 3.

О ображенье маестату господарского.

О ображенье маестату господарского так се разумеет, колибы хто змову албо спикненье албо бунт учинил на здоровье наше господарское, хотя бы пан Бог уховал, иж бы оная змова не была учынком пополнена; таковый за слушным доводом, як о том нижой описано, честь и горло и именье стратит. Теж кгды маестат наш ображон бывает с тое причыны, кгды бы хто бунтовал покой посполитый врушаючы против нас господара ку шкоде и Речы Посполитое, и мынцу без воли нашое бил явне; а чого Боже уховай на нас смерти, так теж и на потомки наши Великие Князи Литовские, по зешстях их хотечы хто осести и опоновати тое панство Великое Князство и господарем быти на нем, войско люд служебный сбирал и выводил; хто бы теж з неприятелми порозуменье мел, листы до них або послы против нам господарю и Речы Посполитое або остерегаючы слал, тым неприятелем якуюж кольвек помоч давал, хотя бы теж замок наш неприятелеви подал; хто бы теж люди непрыятельские в панство наше Великое Князство Литовское зрадливе привел, а то бы на него слушне и справедливе было переведено таким же доводом, яко нижей описано: таковый с права з розсудку нашого с паны радами нашими Великого Князства Литовского честь горло тратить, и таковаго зрадцы дети сынове за таковый выступок отца своего безецными будут, а именья того зрадцы отчызные выслужоные которым кольвек обычаем набытые мимо дъти и близкие на нас господаря приходять. Ведьжо жоны таковых здрайц которие не будуть ли ведали тое здрады мужов своих, а с того се выведут пресегами своими, таковые именей своих отчызных и матерыстых и вена пред учынком тое зрады им от мужей их описаного не тратят. [А дочки тых ачь колвек почтивости своее нетратятъ] але до именей отчызных не прийдут, хиба по смерти маток своих только до четвертое части именей матерыстых приходити будуть.

Артыкул 4.

О ображенье маестату господарского.

Теж коли бы хто якого кольвек стану был найден явно подойзреный, иж маестат наш господарский образил, таковому жаден привилей ани зацность ани достоенство не маеть помагати ани се им щытити можеть, абы се не мел справовати, и где будеть правом поконан, абы не мел каран быти. А хто бы в час милуючы пана Бога и пана своего и Реч Посполитую справедливе перестерег або объявил, повышенья годен будеть. А за обмовенье славною о парсуне нашой господарской за доводом слушным справа и суду маем карати ведле важности выступу и слов, ведже ласкою нашою господарскою, а честью и горлом ани именья отнятьем за то карати не будем; ведже в том выступе коло ображеня маестату нашого господарского, где кому идеть о честь и о горло, таковых шляхту подданных наших нигде индей, одно у здешнем панстве нашом Великом Князстве Литовском на соймех валных тутошнего панства, мы господар с паны рады нашими судити водле выступку их тым каранем, яко вышей описано, карати маем.

Артыкул 5.

О ображенье маестату господарского такий довод, а не инакший маеть быти.

Яко в кождом учынку, за которий гордом карають, потреба доводов явных и ясных, так во ображенью маестату нашого неледа за осоченем або вымовеньем маем се на подданных наших сквапляти; але хто на кого ображене маестату ведеть, мает довести сведецтвом веры годными и неподойзреными людми шляхтою и их своею присегою. А если бы хто кого обмовил в том учынку, а звлаща иж бы на него менил, же пам господару на здоровье стоял або Реч Посполитую зрадити и ку прудкому упадку привести хотел, и на тое се важил и готовал; такий поведач, если бы таким же ясным сведецтвом не довел, сам отсуженем почтивости и горлом маеть быти каран.

Артыкул 6.

Хтобы колвек с панства нашого до земли неприятельское утек.

Теж уставуем, хтобы кольвек с подданных наших с панства нашого утек до земли неприятельское умыслом злым на зраду ку шкоде нам господарю и Речы Посполитой, такий честь тратит; а если бы поиман был, тогды и горлом маеть быти каран. А дети ач колвек для того выступку отца своего почтивости свое не тратят, але именья вси отцовские тратят, ниж бы што мели власного набытья своего, або перед тым учынком отца своего отделены были, тогды при том застати мають. Таким же обычаем и жоны если будуть не ведали здрады мужов своих, таковые в том будуть захованы, яко в третем артыкуле сего розделу о таких есть описано.

Артыкул 7.

Хто бы с пригоды до земли сусед наших втек.

Уставуем теж, если бы хто з якое пригоды припалое кром ображенья маестату нашого и Речы Посполитое зъехал до земли якого суседа нашого, выймуючы земли Московские; таковый почтивости, горла и именья не тратить, одно маеть справоватися тому от кого будеть обвинен и ласки нашое господарское перенайдовати за кглейтом нашим, а тот кглейт наш на врадех, и ввезде где ся оборочати будеть, а особливе по местом торгом и при костелех, маеть давати обволывати и прибиваньем цедул ознаймованьем и рок выйстя кгдейту оповедати, а то для того абы собе лепшую безпечность мети мог. А если бы в том часе не переправил собе ласки нашое господарское и тому кому завинил не справилсе; тогды мають такового за се из границ панства нашаго за кглейтом нашим пропустити, леч не до земли неприятельское, и то мають чынити перед выйстем кглейту, а нам господарю волно будеть кглейтом далшим водле воли и зданья нашого господарского.

Артыкул 8.

О зкгвалцене и зламане кглейту.

Теж уставуем, если бы мы господар кглейтом своим кого убезпечили, а тот бы кглейт ясне и значне был обволан, за которым бы он обвиненный на справу до нас приехал; и хто бы такового под тым часом ранил або забил без его початку и причины, таковый сам маеть быти горлом каран, яко тот которий кглейт наш господарский зкгвалтил. Тым жо обычаем хтобы з кглейтом приехавшы, а сам неспокойне и нескромне се заховал, и кого ранил або забил и який кольвек кгвалт учинил; тот сам собе кглейт зламал и горло тратит.

Артыкул 9.

О мондатех, в которых мають быти мандаты с канцеляреи нашое даваны.

Напервей мандаты мають быти даваны о ображенье маестату нашого господарского; теж хто бы при дворе нашом господарском кого забившы або кгвалт який учынившы утек; хто бы теж покой посполитый взрушил, яко ест вышей о ображенье маестату нашого господарского вышей и шырей описано; хто бы на именью своем новое мыто вымышлял, або теж мытник наш господарский и теж хто с подданных наших маючи стародавные або от нас даное мыто на именью своем або в державе своей над уставу так теж и от подданных шляхецких што брал; так теж листы и мандаты мають быти даваны в речах и в пожитках столу и скарбу нашого господарского належачих и о иншые некоторые речи. Кром вышей мененых артыкулов мандаты никому с канцеляреи нашое не мають быть даваны; а если бы были даваны, тогды сторона оную реч, кром тых мандатов наших, будучы позвана и ставши очевисто неповинна будеть отказовати, а за мандатом нашим маеть зложон рок завитый.

Артыкул 10.

Хто бы кому именье заставил а продал первей, нижли з земли утек.

Теж если бы хто которий человек, перед тым нижли утечеть до земли неприятельское, будучы еще в панстве нашом, продал або запродал именье якое або люди або землю кому, а будет ли он тое рады его не ведал, и на то право поднесеть и окажет на то листы и держанья своего доведет; тогда маеть он тое купленое або закупленное именье спокойне держать, а пак ли бы не хотел присегати, тогды тое купленое або закупленное именье тратит.

Артыкул 11.

Если бы отец от детеи втек до земли неприятельское, так теж который ближшый.

Теж уставуем, если бы отец от детей утек до земли неприятеля нашего Московского и до иншых земль неприятель наших, а дети бы на именьи зоставил по себе; тогды именья его на нас господаря спадывають, бо за выступ отца их власного вже сут отдалены от именей. Ведьже которий бы сын был делный от отца своего и первей тое части своее в держанью был, нижли утек отец его, и мешкал бы на том кром отца своего не у в одном местцу з ним, а не за одным плотом, а тое рады и учынку отца своего не ведал, а не был подойзреный и вывелся того присегою своею; таковые тогды сыны и дочки от почтивости своее от части именья своего не одпадывают. А если бы которий прирожоный брат або девка або который будь з роду утек до земли того неприятеля нашого Московского и до земль неприятельских поганских; тогды делница, то есть часть невыделена не будеть выделена была, будь не выделена, спадывает на нас господаря, и ближний жаден не будет ку тому и не маеть мети ничого; а ведьже то братьи и близким яко в почтивости так и частем именьям их шкодити не маеть. А хтобы такового здрайцу утекаючого забил, або живого до нас и до вряду нашого привел, и то на его слушным доводом перевел; такового почтивости то шкодити не маеть, але еще за то будет годен ласки нашого господарское, а если бы не довел, тогды сам маеть быть каран, яко вышей описано.

Артыкул 12.

Хто бы листы або печати наши фалшовал, чым маеть быти каран.

Коли бы хто листы або печати наши фалшовал, або на кшталт руки нашое также с канцлярейных писаров наших того панства подписовал, або хтобы теж печати наши соберыв и в себе ховал и их ужывал; таковый за оказаньем слушным явностью певною и доводом слушным ничим иным толко огнем каран быти маеть. Ку тому если бы теж хто печати и выписы врадовые переправовал, тестаменты на заставу фалшовал, або одбираючи печати от листов к другим прикладал ку помочы и ку пожытку собе а ку шкоде стороны своее противное, а то бы се на праве нашло и оказало; тот тую реч, о што тые листы идуть и о што за ними право ведет, тратит и горлом каран предсе маеть быти. А хтобы листы фалшывые на якую реч набытую показал, которие бы по чией смерти з именьем або с чим кольвек до рук его пришли, за кими листы чого вжывал тот ближшый; на том присегнути, иж такие листы по смерти тых, от которих се ему достали з именьем або которою кольвек речъю, и за тым тое стороны почтивости и горлу шкодити не будет, а о тую реч, о што право идет, предся мовити можеть и правом поступовати и ку листом мовити, если против праву але недотливе.

Артыкул 13.

О фалшованью монеты о мындзех и о золоторех.

Теж хтобы монету нашу фальшовал и без воли нашое переправовал и обрезовал, так теж мындзаре наши, которие золото и серебро и иншую реч матереи належачую и прислухаючую мындзе фалшовали бы зливали и мешали ку пожитку своему а ку шкоде Речи Посполитое, а то бы на них досведчано; тые мають огнем караны без иилосердья. Потомуж золотари, которие золото серебро фалшують и межи того мешають медь цын або олово, и в том бы были дознали; тогды сами мають огнем быти караны, а их маетность тому, кому шкоду учинили, маеть быть плачоно. Ведьже работа тая и матерея, без которое бы тое ремесло их справовано быти не могло подле звыклости ее, то фалшем розумено быти не маеть.

Артыкул 14.

Не маеть никто ни за чий кольвек учинок терпети только кождый сам за себе.

Теж уставуем, иж нихто ни за чий кольвек учинок не маеть каран и сказан быти, толко которим винен, кгдыж того право божое и справедливость хрестиянская учыть, якож так хочем мети: абы ани отец за сына ани сын за отца, кром ображенья маестату нашого, яко вышеи около того ест описано, ани жона за мужа, ани муж за жону, так теж брат за брата, и жадный прирожоный, и слуга за пана, пан за слугу, нихто ни за чий выступ учынок, толко кождый сам за свой выступ мает терпети и каран быти.

Артыкул 15.

Хтобы много за мало упросил а без данины побрал.

Теж хто много за мало упросил, а то бы на него устне и с права было переведено, вышей нижли просил, таковый тую выслугу свою от нас даную тратит. А хотя бы и добре упросил, а без данины нашое што и к той выслуге своей взял и к тому привернул; предъся тую выслугу и забранье тратит и спадывает то за се на нас господаря. А хто ку отчызному своему именью взял чоловека, або и десети, або колко колвек и с землями, або земли пустое; тогды маеть кождого чоловека, колко будет взял, своими отзычнами навезати з земли, або кождую землю землею, а ведже не не на голую повесть и обмову, але за огледаньем и выведаньем слушным и справедливым правным поступком и доводом через людей цнотливых и веры годных комисаров тубулцов. Ровностью права однакими доводами вдаючы се в ровное право и з шляхтою, яко о том нижей написано.

Артыкул 16.

О реч земленую, межы именьями нашими князскими панскими шляхецкими, мы господар одным тым правом судитисе маем.

Теж мы господар обецуем и хочем, абы тое через нас и потомков наших споры розница межи кгрунтами нашими шляхецкими вечно было держано, гдеж бы се трафило в именьях наших споры розница межи кгрунтами нашими шляхецкими и межы тыми именьями, которые вышли з данины нашое, иж в той речы земляной маем мы и потомкн наши Великие Киязи Литовские тым же одным правом яко и подданные наши Великого Князьства судитися а не иначей, чий довод будеть слушнейший водле права, тот ку доводу маеть быти припущон.

Артыкул 17.

Вси в том панстве нашом великом Князстве Литовском одным тым правом сужоны быти мають.

Уставуем теж и вечие а неотменне мети хочем, абы все подданные наши всех станов, так богатого яко и вбогого, почоншы от княжат панов рад духовных и свецких панов хоруговных и шляхты, аж до нижшого стану, одным тым правом от нас даным были сужоны; и всякие речы, почоншы оть почтивости горла достоенств маетности именей всяких справ земленых лежачых рухомых, аж до наименшое речы, а не инакшым правом але тым статутом от нас даным мають быть сужоны. Также и чужоземцы и заграничники Великого Князства приеждчые и яким кольвек обычаем прибылые люди тым же правом же мають быть сужоны и на таких врядех, где выступить.

Артыкул 18.

О листеях заповедных, иж не мають быти с канцляреи нашое выдаваны.

Теж уставуем, иж листов наших заповедных на продлуженье справедливости людское, яко кольвек повстегаючы або задержываючы, от сих часов на потом до всяких судов мы сами и потомки наши Великие Князи Литовские давати не будем, окром трох члонков: первое если бы хто о Реч Посполитую в неприятелей наших у везенью был; другое коли бы хто на службе нашой и Речи Посполитое в посельстве до земль чужых або заграничье панств наших, где ся будет дотыкало Речы Посполитое, и в инших речах господарских властных послан, и к тому особливе в потребах яких кольвек водле часу припалых потребы отправуючы ими ся забавил, в таковых речах и справах не только листы наши господарские але и панов рад наших ити могуть и местце у праве мети будуть; третее коли бы хто правдиве немоцон был, тогды толко которий не стал, маеть на другом року присегнути, иж правдиве немоцон был. А у в инших речах кроме тых члонков хотя бы и выданы кому были; тогды врадники наши то есть суд замковый земский и меский, таковых листов заповедных ку кривде одное стороны одержаных неповиины приймовати ани их послушни быти.

Артыкул 19.

Листы отвороные мають быти кождому ворочаны.

Теж хтобы листы наши отвороные в жалобе своей до кого принес, будь до князя, або до пана, або до державец, або земенин до земенина, а хто бы колвек з них оный лист отворенный прочетши у себе держал и копею з него знявшы под печатью вознаго оному не хотел вернути до трех дней; тогды таковый за противность свою нам господару у вину упадывает у дванадцать рублей грошей, а стороне також маеть заплатити. А ведьже листы отвороные мають обычаем слушным даваны быти через возного и пред людми сторонными шляхтою.

Артыкул 20.

О битью посланца нашого господарского, и теж посланцов от панов рад наших при листех наших господарских и панов рад и старост наших судовых и суду земского.

Уставуем, хто бы посланца нашого господарского, и теж посланцов панов рад наших, за листы нашими и за листы панов рад наших и старост судовых и суду земского, збил и листов не учтил, або листы подрал ку зелжывости нашой и рад наших; тот маеть за слушным доводом, если на него очевисто переведут дванадцать недель на замку нашом седети, а дворанина совито, навезать водлуг стану его. А дворанин кгды листы подавать маеть, мает меть при собе сторону, то есть двох шляхтичов для доводу. Так теж и сторону, которых будет мети при собе дворанин, если бы хто забил або якую легкость учынил, маеть совито водлуг стану их навезати. За листы и в справах урядовне посланые ездячы мають скромне и учтиве се заховать, и жадное прычыны ку именью и зелженью своему не давать и ничого неслушнаго не почынать, одно то справовати, што вряду его наледыть и с чым приехал.

Артыкул 21.

О листех заручных.

Теж абецуем и маем давати о безпечность здоровья подданых наших шляхту, за похвалками и звазненьем чиим кольвек противко их кождого, з великих кровных аж до нижных станов, с канцляреи нашое листы заручные, и заклады на них казати описовати пять сот коп грошей наименшей, а болшей две тысечы коп грошей, а над то вышейописаные заклады никому так с болших яко и з менших станов шляхецскаго народу даваиы быти не мають. А того канцлярейные писары наши господарские земские Великаго Князства Литовскаго догледати и вважати (sic) мають, кому пять сот коп грошей а кому две тысечи коп грошей в листех заклады описованы и даваны быти мають. А хто бы за похвалкою або звазньем своим обнесен будучы урядовне листом нашим заручным, а через тот заклад кого забил; тогды справа за слушным доводом горлом маеть быть каран, а заклад на нас господаря до скарбу нашого земского Великаго Князства Литовскаго на ииенью его маеть быти с правлено. А еслибы не забил, толко ранил або збил; тогды с права также за слушным доводом заруку нам господарю маеть платити, а тому битому маеть быть справлено навезка совита водле стану его. А хто бы заруку выневшы, сторону противную, на которую заруку взял, самого его забил або бил або ранил; тот сам таковою ж виною маеть быть каран. А мы господар не маем таковых закладов никому отпущати, але кажем брати до скарбу нашого земского Великого Князства Литовского; а в небытности нашой в здешн ем панстве воеводове старосты державцы судовые, где книги лежать, будуть мочы листы заручные под печатми своими шляхте давати, уважаючы кому який с тых двух сум заклад маеть быти даван.

Артыкул 22.

О отповедниках неоселых.

Теж уставуем, если бы хто кольвек неоселый, будь тубулец панства нашого Великаго Князства яко и чужоземец, кому теж колвек иншому отповедь обличне або через листы або теж заочне учынил; таковый отповедник маеть быть поставлен от нас господаря або от вряду замкового або и земского перед правом, где бы колвек при котором вряде то се деяло, и если бы он тое отповеди пред врядом довел, тогды таковый отповедник неоселый маеть быти на замку нашом посажон, а седети маеть дванадцать недель), не маеть быть с того везенья пущон, аж первей себе рукоемством увыйстит, абы тот, против кого отповедь учинил, в покою был.

Артыкул 23.

О листех железных, кому мають быти даваны.

Теж уставуем, иж листы железные с канцляреи нашое не мають быть даваны тем, которые маетности своей на збыткох марне тратили и за таковыми збыточными тратами в долги попали, але тым маеть давати таковые листы, которые бы в долги пришли и в убозство попали з Божъего допущенья: то есть, если бы огнем погорели або маетности их стонули, албо бы от разбою от неприятеля нашого забрани были, або хто бы теж для Речы Посполитое ку утрате у в убозство пришол. А веджо далшого часу и волности не маеть тым узычати и давати толко в наибольшой суме и речы три годы, а в том часе маеть се в наибольшой речы и суме тот о заплату старати. И людем простым купцом и жыдом против шляхты таковых листов не маем держати, а веджо кому будь хотели такового листу железного узычити, и то предсе не напротив шляхты; тогды с канцляреи нашое тот маеть быть отослан до вряду его належачого, отколь есть. Перед которим врядом хто таковаго листу железнаго потребуеть, маеть рукоемство слушное поставити людей добрих оселых и куститися ими и их маетностями, иж не згинет в тых же летех, яко на листех ему назначоно, а на остатный день выйстя року будуть повинны рукоимы оного на том же вряде поставить, а должники долгов своих и оного истца в того вряду упоминати и найдовати и доходити будуть; еслибы рукоимы не поставили и в том се оным не всправедливили, тогды сами за листы або за доводом правным тые долги повинны будут платити.

Артыкул 24.

Кому бы шло о честь, як рыхло справедливость учынена быти маеть.

Теж обецуем и будем повинни каждому с подданых наших, кому бы шло о честь прудкую а неодволочную справедливость учынити, а если бы на нас господаря зашли якие трудности; тогды таковой справе в годы чотыри роки складаем. А где на першом втором або на третем року пред ся за недоспехом нашим не могли быхмо конца в той речы учынить; и до того четвертого або розсудку нашого того оного обвиненаго почтивости шкодити не маеть. А хотя бы умер або забит был, не дождавшы оного розсудку нашого; тогды ему ани потомком его почтивости шкодити не маеть. А приганенный службы нашое земское не мает се вымовляти, ведже четвертого остатнего року и войною се вымовляти не 6удеть мочы.

Артыкул 25.

О мыттъх новых.

Теж уставуем и приказуем, абы жаден человек в том панстве нашом Великом Князстве Литовском не смел новых мыт вымышляти ани встановляти ни на дорогах, ни на местех, ани на греблях, ани на реках, ани в торгах, ани в местечках ни в стодолах, або в корчмах на гостинцах в именьях своих, кроме кол торые бы были з стародавна установлены, або мели бы на то листы продков наших або наши. А хто бы кольвек смел мыто кром звычайнаго торгового установляти; тогды тое именье, в котором мыто кром торгового установил, тратить и спадывает на нас господаря. А которие здавна и за привильями и листы нашими мыто и мостовое на именьях своих на дорогах гати мосты гребли и ровы направовати мають, а хто бы где мостов гатей гребели направленых не мел, а для того бы переезд был трудный, а кому бы се на тых местцах шкода стала; тому тот же пан, хто мыто берет, винен будеть шкоду оправити и з накладом, што ищути шкоды наложыть. А старостове державцы або мытники наши, еслибы такеж беручы мыто дорог не поправовали на именьях наших; тогды шкоду и наклад тому, што ищучи хто наложить, винны будуть платити. А которие теж князи панове и земяне шляхта старие дороги ставы своими затопят, або заорут, привлащаючи собе пожытки; таковые новые дороги мають быти погачоны и положоны не ку кривде людем перееждим, але што могут быть напростей и так, або были напровованы, жебы з возы тяжкими у везде безпечный переезд был. А к тому иншые стародавные дороги на именьях и на кгрунтех своих в местцах потребных поправовати, мост мостити, гати гатити, тые которие з стародавна людьми то робливали и вперед будуть повины. А кгды бы на чыем именьи або на кгрунте злый переезд был, а шляхтич хотел бы его поправовати, а с того себе за наклад свой пожиток мети; тогды тот маеть до нас господаря утечы, а мы, доведавшыся того через посланцов або старост наших ку тому прилеглых, маем ему дати и встановити от купцов и иншых переежджых людей мыто або плат, водле важности и наклады его и ласки нашое господарское. Так теж и мытники наши в местечках и селах князских, панских, боярских, где первей мыто не бирано, часу праздников и сходов жадных мыт и торгового вымышляти и брати не мають кгвалт и шкоду совито платити. А на реках портовых, и на которых порт может быти, а где кольвек в панстве нашом Великом Князстве, жаден ставов новых становити и гребли сыпати ку переказе порту и спусту не маеть мети. Так теж и езы на реках портовых, где з стародавна бывали, хтобы ставил; тогды предсе маеть местца заставляти так слушие, абы езом або тамованьем никому се шкода не стала. А таковых речей воеводове, старостове, державцы наши кождый в державе своей мають досмотрети, а новых мыт абы на реках портовых и на ставех и на греблях не было, также на езох абы проходы были слушные без завады заставованы.

Артыкул 26.

О неданье мыта шляхте.

Теж з ласки и доброти нашое господарское князем, паном радам духовным и свецским, шляхте в том панстве нашом тую вольность на водах на дорогах, то ест сухим путем и водным, на торгох, на мостех, так по именьях наших ** спущати и продавати з их власных гумен, кождому его роботы правдивое збожье а не купленое, от того мыто не маеть быти давано; так теж и од подвод шляхецских, которие з их речми властным збожьем а стацыями ходять от того всего мыто и мостовое брано быти не маеть. А если бы што купленого збожья и иншых речей пры том мел; от того мыто маеть платити. А ведже сами особами своими, або где бы их самих при том не было, тогды слуги их або справцы от них притом посланые веры годные на мытех наших головных мають присегнути, што ест правдивое роботы его домовое а што теж прикупленое, а подводы мають без присеги быти пропущаны толко за листы и печатми их, тым же обычаем и лесные товары и от всякого господарства домовое роботы маеть ся разумети и безмытне пропущоны быти. А на мостех старожитных, где перед тым што будеть давано только от подвод таких, которие збожье на продажу везуть, ведже водле стародавного обычаю мають давати.

Артыкул 27.

Хто напротивко выроку наииого господарскаго мовил.

Теж уставуем, кгды быхмо мы господар с паны радами нашими з выроку нашого сказанье учынили, а хтобы против тому выроку нашому по сказанью што против его мовити мел; тогды таковые, якогож кольвек стану так высокаго яко и низкаго, мають седети на замку нашом шесть недель, а то никому не маеть быти отпущоно.

Артыкул 28.

Хтобы под ким што упросил, а тому напрод дано и в привильи нашом господарском напрод описано.

Уставуем теж, хтобы под ким именье люди земли в нас господара упросил и в привильи бы то собе описал, а у того бы, под ким то он собе упросил, первей было на дате его або на привильи нашом описано и тому потвержоно, и того он колко лет вжывал и в держанью был; тогды таковый первый привилей або листы при моцы мають зостати, и за иншых господарей потомков наших тот, кому дано, тую реч держати и поживати маеть водлуг листов и потверженья нашого, а последние листы ни во што мають обернены быти.

Артыкул 29.

Хтобы на што листы упросил, а того в держанью не был.

Теж уставуем, если бы хто собе в нас господаря именье люди або землю впросил и в листе данины нашое ему то было описано, а того в держанью и в поживанью не был до десети лет; тогды и листы наши и дата таковая потом жадное моцы мети не маеть. Так теж, и справуючись водле прав хрестиянских и теж остерегаючы, абы межы поддаными нашими небезпечность и ростырки не множылисе, уставуем, абы от сего часу жадные листы, которые по латине експектативами зовут, жадное моцы не мели, а хотя бы от нас кому даны, предсе держаны быти не мають; нижли если бы хто сам по своей доброй воли перед нами господарем з волею нашою господарскою на то прызволил.

Артыкул 30.

Абы се у дворех наших господарских нихто не становил.

Теж уставуем, иж жаден пан, а нихто с подданных наших, Великом Князстве Литовском ездечы дорогами, не мають ся становити и стацый на себе и на кони свое з дворов наших брати, ставов и сажавок и озер наших волочыти. А если бы хто против тое уставы нашое учынил, а в дворех наших становилсе, стацыю собе и конем своим з дворов наших брал, ставы и сажавки и озера нашы волочыл; тогды за слушным доводом и с права в том поконаный маеть на замку нашом дванадцать недель седети, а шкоду оправити.

© Валерый Пазднякоў, 2010, 2015

Надрукавать Надрукаваць без ілюстрацый
Дадаць меркаванне