Дакументы: Статут Вялікага Княства Літоўскага 1566 г. Раздзел 2
Статут Вялікага Княства Літоўскага 1566 г. Раздзел 2.
Роздел вторый. О обороне земской.
Артыкул 1.
О повинности яко вси обыватели Великого Князства литовского чынит мають.
Уставуем теж с призволеньем рад наших зуполных и всех станов подданных панства нашого Великаго Князства, иж кождый князь и пан дховный и теж дворянин боярин и вдовы кождые и иные станы, и татарове наши, так мещане мест наших, маючи земское именье и лета зуполные маючы, часу потребы з нами и потомками нашими або при гетманох наших винни будуть сами особами своими войну служыти и выправовати на службу военную, коли бы кольвек была потреба водле уфалы земское соймов наших Великаго Князства, якая на он час будеть потреба оказовати, то ест и похожых з именей з людей, яко будет потреба, отчызных выслужоных и купленных. А вдовы и сироты и дети лет зуполных не маючи мають выправовати водле важности именей своих, а тым обычаем; маеть быти выправа пахолка зо всим на добром кони, што бы кон стоял наименшей осм коп грошей литовских, а на нем сукня цветная, панцер, прилбица, меч, павеза древо с прапорцем цветным. А который бы боярин або мещенин не мел в своем именью людей так много, яко устава будеть, тот сам предсе маеть ехати и служити; так теж которий не маеть пешо ити з ручницою або з рогатиною, а на местцу наименованом через листы наши або гетмана нашого великого маеть ся очевисто каждый становити и датися написати и ошафовати гетману нашому великому на тот день, которий через нас або через гетмана нашого к тому попису будеть положон и выволан. А коли бы было колко братьи неделеное; тогды братья мають межы себе годнейшаго лет дорослых выбравшы послати, который з именья неделеного маеть войну служыти тым же обычаем, яко вышей описано. А хтобы от нас господаря держал якое именье нашо в заставе; тогды тот не повинен будеть выправовати на войну. Хочем теж мети и уставуем, абы подданые нашы вси мещане ку валной потребе з иншыми людьми нашими войну служили, або з дозволеньем нашим водле постановеня нашого на войну выправовали. А хто бы кольвек с тых подданых наших шляхты и рыцерства всякаго стану, также маючы именье земское, войны не служыл, або приехавшы на рок постановеный не пописал, а хотя бы и пописался, а шыфу не ждал, або и шыховавшы се без воли нашое або от гетмана нашого великого проч поехал; тот именье свое все тратит под тым обычаем, яко бы войны не служыл. И для того ж кождого гетмана великого мы господар обецуем тот уряд (т.е. гетманство) годным и досведчоным людем народу шляхецкого родичом стародавным тутошнего панстдем Великого Князства Литовскаго давати, и тое местце засаживати.
Артыкул 2.
О постановеню обороны земское только на сойме.
Обецуем и уставуем вечными часы быти держано, иж кгды будеть потреба противко которого неприятеля нашого обороны земское сему панству нашому Великому Князству Литовскому, албо валка вести; тогды мы сами господар або и с паны радами нашими не маем ани будем мочы того учынити, ани серебщызны и поплату никоторую установляти, аж первей сойм великий вальный зложывшы в том панстве нашом Великом Князстве Литовском, на котором за росказаньем и листы нашими будуть повинни вси княжата и панове рады духовные и свецские, маршалки и иные врядники земские и дворные, панове хоруговные, послы земские поветовые зъехатися; теж на он час на сойме великом валном зо всими радами нашими и зо всими княжаты и паняты и зо всим рыцерством порядою а позволеньем их маем таковые речы становити а не иначей. А ведьже где бы от котораго неприятеля нашого якое прудкое уторгненье было в се панство наше Великое Князство; тогды и без сойму толко за листы нашими, а в небытности нашой за листы панов рад наших гетмана нашого великого мають вси князи и панове подданые нашы, войны павинны, на час и местце назначоное ехати, яко на кгвалт, и то з милости Речы Посполитое боронечы собе жоны и детей маетности отчызны своее.
Артыкул 3.
О невызволенье листы нашими, и теж кого волно вызволити.
Теж уставуем, иж мы не маем жаднаго з войны от службы земское так словным росказаньем яко и през листы наши вызволити из войска отпущати, так теж и гетманове наши не будут мочы вызволити и з войска отпущати, кром тых врядников наших и слуг, которих мы Гоеподар на он час для послуг наших и справ земских зоставим, а ведже и тые почты свои водле можности именей их винны слати и выправовати. А што се дотычеть старост и державец украиных, тые часу вальки также повинни з именей своих у войско, яко иншые шляхта, почты свои ку службе земской выправовати и становити. А сами они, звлаща тые, которие быхмо у войско листы нашими и панове рады або гетман наш не казали ити, таковые почты свои, што з урядов своих новинни, становити мають.
Артыкул 4.
О именья заставныя, хто з них службу земскую служити мает.
Теж уставуем, если бы который шляхтич або пан хто закупит и в держанью будеть, службу земскую с того заступовати маеть. Нижли если бы тот собе на записе заставном обваровал; а тот, хто заставит, тым описом своим в то бы се подал, иж сам с того именья службу земскую служыти маеть; а он хто закупил в том волен будеть. А ведже хто за таким обычаем, естли бы тот, хто закупует, мел оселости и может службу земскую сам служыти, а кгды бы оселости яковое и можности не мог мети; тогды предсе тот, хто закупует и вжывает, сам с тое закупли маеть службу земскую служыти.
Артыкул 5.
О хоружых.
Хоружества всих землях и поветех Великого Князства тым радом и способом мають быти захованы, иж мы господар хоружых нашых не маем уставляти толко людей зацных добрых ростропных можных и оселых о повете том. А хоружый, и где будеть хоругов держати, маеть на собе мети зброю добрую и гелм албо прильбицу и бронь, а конь абы был под ним добрий, а хоругов сам хоружый в гуфе своем на шыху и ку потребе маеть держати, и статечне се в том вряде на потребах наших земских маеть заховывати водлуг цноты и повинности на хоружих належачое; а хорогвы мають им даваны быти за скарбу нашого подлуг давного обычаю; а хоружые земские и дворные мають быти подлуг стародавного обычаю захованы.
Артыкул 6.
О збиранью и тягненью шляхте на войну.
Теж мы господар для поряднейшаго тяготенья на войну, абы в том шкода не была людем, так уставуем, иж где за потребою земскою будет от нас и панов рад албо гетмана всей земли росказано на войну ехати; и тогды хоружый, давшы ведомость о том шляхте, каждый у своем повете, маеть выехати сам у поле и казати до себе всим поветиком своим за тры дни перед тегненьем с повету зъехатися; а они будуть повинни и до войска к нему не вымовляючыся ехати в том часе и на тое местце, яко им от нас дано и назначоно будеть, с почты своими яко на войну служыти повинни зъехатися. И там же хоружому собравшыся з ними и маючы о кождом з них добрую ведомость и печу посполу маеть тягнути з ними до каштеляна, давшы о собе первей знати, где бы се мели ку нему стегнути; и там с каштеляном зъехавши се хоружый оный повет шляхту отдати и оповедати каштеляну и ознаймити маеть, если все сполна албо и хто есть. А где в котором повете каштеляна нет ино до маршалка, которий в том таковую ж моц мети будеть яко каштелянове. И кгды вжо и к каштеляном стягнутца хоружыя и з шляхтою, тогды вси сполом под каштеляновою або маршалковою справою тягнути мають до воеводы того воеводства; и тягнувшыся з ним кашталян або маршалок с хоружым мають здати и оповедати шляхту воеводе, кого нет, а за чим где. Вже вси тые як панове воеводове и кашталянове и маршалкове и с хоружими мають тягнути на местце от нас и панов рад наших назначоное, або гетману где росказано будеть, и у в одном местцу завжды при воеводе становитися а не порозну, будучы в послушенстве и справе панов воевод своих. А в том тягненью воевода маеть того с пильностью стеречи и боронити повинен, абы поветники его никому никоторое шкоды в дорозе и на стане стоечы ни в чом не чынили, але собе и конем своим за пенези торгом а не уставою живность куповали; а который бы над заказ смел кому которую шкоду учинити, тогды воевода або кашталян, поки до пана гетмана не дотягнуть, мають им с таковыми справедливость учинити и отправу на винном и на маетности его сам заразом не проволокаючы делати, а поветники шляхта будеть у его повинни во всем том яко вышей описано послушни быти, а против непослушным и противным также повинни заховатися и карати их мають, осадившы о нем право, и што с права заслужыт, то втерпит.
Артыкул 7.
Уси шляхта поветовые повинни становитися под хороговью поветовою.
Хочем теж мети и приказуем грозно, абы вси подданые наши будучы на войне нигде се индей не шыховали ани становили особами своими и с почты, одно под хороговью своею поветовою, в котором суть повете оселыми, кром особного росказанья гетманского. А если бы которий з них служыл в которого панов рад, наших, або до врядников або, теж всякого иного; ино и тот будеть повинен под хороговью на местцу установити брата або кревнаго своего або так добраго шляхту як сам, абы с тым местца неопустил, а ни се омешкал, под страченьем именья своего. А княжата, понята, хоруговные маршалки, врядники наши земские и дворные, тые мают се становити на местцах своих подлуг стародавного обычаю.
Артыкул 8.
О шляхте, которые у разных поветех именья мають.
Уставуем, которые шляхта подданые наши мають в розных поветех именья свои, таковый маеть в том повете, в котором будеть наиголовнейшее именье мети зо всих именей своих отчызных выслужоных купленых и жониных, сам стати и почт своей ставити.
Артыкул 9.
О духовных, як мают службу земскую служыти.
Уставуем теж и духовные з именей своих свецких и костелных наданых, с которых служба земская военная бывала до сих часов, такжо з именей своих отчызных купленых и закупленых шляхецских, войне повинных, службу земскую служыти мають тым же обычаем, выправуючы с тых именей своих почет повинни при нем слать за свою особу человека доброго шляхтича водле уфалы земское сеймовое.
Артыкул 10.
Абы се по шыхованю не розъеджали до домов своих.
Теж уставуем, иж кождый подданый иаш пописавшысе, и по шыху обычаем вышей описаным с тыми ж конми и зброями, с которыми се шыховал, при нас або при гетмане нашом повинен будеть войну служыти а на тых же конях и с тыми зброями, аж до зуполнаго роспусченя з войска нашого. А которий бы кольвек подданый наш, хотя и пописавшыся, а без воли и ведомости гетманское з войска проч отъехал або, што почту своего повинного отпустил до дому; таковый именье тратит, яко бы войны не служыл. А если бы тот што пенези бравшы, а был бы человек неоселый, а то теж учынил, таковый кождый честь свою тратит так, якобы з войны утек. А на пописе маеть кождого коня гетман наш в шерсть написати и петно, которое будеть на кони, в рестр намалевати. А стан свой паветники на войне при хоружом у в одном местцу мають мети а не розно.
Артыкул 11.
Которие для немоцы своее на войну ехати не могуть.
Уставуем теж, если бы которий шляхтич з Божъего допущенья был немоцъю обложоною хор, за которую на службу земскую ехати не мог, а не мел бы сына дорослаго; тогды маеть ся оповедать хоружому своему, в котораго есть повете, а опричей трема шляхтычами, которые немоцы его очыма своими огледавшы и то мают нам або гетману нашому оповедати под сумненем своим, а выздоровевшы тот немоцный предсе будеть повинен без отступу на потом перед тым хоружым присягнути, иж для правдивое и обложное немоцы не мог на тую послугу земскую ехати, а почот свой з именей на войну пред се послати повинен. А панове рады княжаты и панове иные вси врядники наши, которые под хороговью поветовою не стояли; таковые у форобе своей пред се тым обычаем водле уфалы земское и важности именья своего почот выправовати на войну, и по зъеханью з войны без отпуску на том перед гетманом присегнути повинни, яко были правдивыми. А ведже под часом войны таковый, хто обложною хоробою немоцон, маеть оповедатися нам господару, а в небытности нашой и гетману нашому; а хто бы кольвек из станов больших яко и меньших в таковой речи присегнути не хотел, тот именье свое тратит на нас господаря.
Артыкул 12.
О сынех заступованъю войны один за другого.
Теж уставуем, хто бы с подданых наших из шляхт будучы сам здоров, а мел сына дорослого лет осмнадцати а не нижей, а тот сын не был бы з ним деленый, або и поделеный, а был бы годен ку службе военной; тогды таковый сын можеть за отца войну служыти с почтом отца своего. А ведже то ест и таковый отец сына своего весполок з суседы своими трема шляхтичами маеть привести до хоружаго своего, в котором повете есть, и ему оповедати; а хоружый, узнавшы его годного ку службе военной, при кашталяне маеть его гетману нашому оповедати; а гетман наш будеть повинен таковаго ку попису и ку службе нашой прияти.
Артыкул 13.
Хто бы замешкал, на рок положоный до войска не приехал.
Уставуем теж, если бы хто замешкал року от нас, або от панов рад наших положоного, а до войска се не поспешал, або на року се гетмана нашого не постановил без слушное причыны; тогды таковых огурных и непоспешных гетман великий у в особливый реестр маеть казати писати, и доложывшы того як который долго мешкал; а тые вси таким способом караны быти мають, иж пан гетман маеть их послати на границу, або там где того потреба Речы Посполитое розумети будеть, а они там совитым почтом, а ве двое так много яко змешкали, тамь заслуговати будуть повинни.
Артыкул 14.
О таквом, хтобы з битвы утек.
Уставуем теж, хто бы первей раз з битвы утек, таковый именье тратит; пакли теж и другий раз з битвы утек, таковый за слушным доводом от гетмана через вырок наш господарский почтивость свою тратит.
Артыкул 15.
О тых, которые на войне коней зброй и броней кому иному позычають.
Теж уставуем, хтобы кому на войне будучы у войску позычыл коня зброй торчы древа и всякое броны, а то бы на него переведено; от того таковый статок увесь через гетмана нашого до рук наших забран быти маеть. А кгды бы се тот же у другий раз тогды пустил; таковый яко омылный слуга Речы Посполитое горло тратит.
Артыкул 16.
По чому от попису брати.
Уставуем, абы гетианове наши не казали болше брати от попису войска писаром своим, только по пол-грошу от коня, то за працу их в тот час коли войско наше зъежджается; а коли войско нашо маеть быти роспущоно, тогды не маеть гетман ани писар от попису ничого брати под ласкою нашою господарскою. А пан гетман з реестру войско роспустити мает.
Артыкул 17.
О старшых, которые над людом войска нашого послани бывають.
Теж уставуем, которые бы были послани от нас господара або от гетманов нашых старшым над частью людей войска нашого в розные стороны водле потребы, абы тых всих старших вси кождого стану, которие под чиею справою послани будуть, были послушни. А старшие оные справцы, роспущаючи людей, и так же ся яко пан гетман заховывати мають.
Артыкул 18.
О хоружых, абы земян дома не осажывали а ни отпущали.
Уставуем теж и приказуем, абы хоружые нашы не мели жаден з них земенина дома осажывати и отпущати, а естли бы который земенин дома зостал, а хоружый бы того перед гетманом не поведил и втаил, а то бы на него было переведено, иж то умыслне оставил; тогды таковый хоружый вряд свой тратить.
Артыкул 19.
О сторожы военной.
Теж уставуем, иж кгды бы жолнеров не было у войску нашом; тогды сторожу вси повинни держати войско Великого Князства Литовского, кгдыж то не чыя иншая потреба и безпечность, одно их властная.
Артыкул 20.
О наезд на дом и гумна на войне шляхецкие.
Уставуем, хтобы на войне будучы один другому на дом або на гумно наежджал, або ставы и сажовки волочыл; тогды тот, который на дом и на гумно будет поеждчати, маеть кгвалт и шкоду платити зособна на кождое наеханье. Так теж и по дорозе едучы, хтобы кому на дом и на гумно наехал, а брал, або ставы и сажовки выловил, або якие шкоды починил; тогды мает кгвалт и шкоды платити за слушным доводом.
Артыкул 21.
О стацыи, на войне кому бы не доставало.
Уставуем, кому бы с подданных наших будучы на войне и лежечы войском на одном местцу стацыи на самого або на кони его не доставало; таковый маеть з вижом гетманским ехати и взяти с потребу жывности на себе и на кони, и заплатити водлуг уставы от нас або гетмана нашого на тот час положоное водлуг урожаю; нижли дрова мають брати волно, где стояти будуть, але домов розбирати, плотов жечы, станов и сажовок волочыти ани спущати, жыт ярин умыслне не травити ани топтати не мають. А хтобы таковый шкоду учынил, тот шкоду совито маеть платити; а хтобы на збожьях и на яринах обозом умыслне положыл и шкоду вчынил, такового маеть пан гетман карати водле шкоды и выступу его; а хтобы теж маючы стацыю у себе у в обозе досыть, а предсе не вжываючы, иншое собе найдовал и за вижом брал, таковый то што озмет, тому, у кого взял, совито ворочати або платити маеть.
Артыкул 22.
О бранью вижа на стацыю от гетманов.
Теж уставуем, хотечы мети на войне, кому бы для недостатку стацый вижа была потреба; тогды гетман наш винен будеть вижа придавати на скупованье стацый. А вижом его вижованое не маеть быти давано на милю по грошу, одно ж на кгвалты бои и тому, хтобы на шкоду свою брал вижа, таковым вижованое маеть быти давано по грошу на милю, и если на местцу не едучы нигде мили, также по грошу мають давати.
Артыкул 23.
О кгвалт або о наход военный у в обозе.
Теж уставуем, если бы хто будучы на службе нашой один другого умыслне або оборочаючы або обычаем звады наехал або на стан кгвалтом, кого забил або ранил, а было бы на него переведено; тот горло тратит. А если бы не ранил, але умыслие своволие нашедшы ударил, а хотя и не ударил; такового пан гетман карати маеть водле баченья своего.
Артыкул 24.
О людех пенежных, як мают с именей своих службу земскую служыти.
Теж уставуем, хтобы кольвек с подданных нашых пенези наши брал, таковые за пенези наши особами мают в гуфе пенежном становитисе, а з особы своее людей годных шляхецских с почты под хоруговью поветовою, або там, здавна где местце свое мають, становити; абы за тые пенези, которые в ротмитсров, служба земская з именей их не гинула.
Артыкул 25.
О чужоземские прибылые люди, як се мають заховать в тегненью.
Уставуем теж, иж людей прибылых так обчых яко и суседных заграничников приймовати и вести до панства нашого Великого Князства Литовского и через тое панство маем, иж за ведомостью и радами рад наших Великого Князства. Ведже тые люди прибылые яко теж и тутошние жолнере не мають иншыми дорогами и до иншого местца стягнути и на лежах се роскладати, одно там где мы господар або гетьман великий тогож Великого Князства ознаймит, а лежу роспишет; а дорог из леж их от нас и от гетмана Литовского даных и ознайменых они ездити в пицованье нигде не мають, але там в дорозе на ночлегох и на лежах и з сторон жывность звезеную они торгом або уставою, яко мы з радами нашими уфалим або гетман в небытности нашой установит, мают куповати. А порядок до данья тое живности и цену также мы з радами нашими сегож панства в он час уфалимы водле потребы.
Артыкул 26.
О шкоды в тяненью о жолнеров так тубылцов яко чужоземцов.
Теж уставуем, иж где бы люди пенежные жолнерские драби прыбылые из инших панств и тубылцы ку потребе нашой земской того панства нашого тягнули, которые спорные на местца им зложоные и назначоные, або на земли нашой украйнной, тогды шкоды ни которие никому не мають чинити ани на дом ани на гуина и оборы шляхецские наежджати и собе з них брати не мають; але жывность собе и всякие потребы за пенязи купити мають ценою, або водлуг уставы, кгды быхмо уставу нашу таковым людем пенежным учинили, а кгвалтом ничого ни в кого не мають брати. Ведже в таковом тягненью за вижы нашими або гетманскими або за врядовым, где бы ити, и з сел подданных своих духовные и свецские стацый на дороге завозити и провадити не хотел; тогды уставою нашою платечы мають брати. А хтобы з них на дом або на обору и на гумна шляхецские так духовных яко и свецских для стоянья и для бранья стацый наехал, або нашол кгвалтом; таковые горло тратять, а шкода маеть быти плачона ис статку его. И так о тот кгвалть яко и оные шкоды, которие бы ся комуж кольвек от жолнеров и от драбов в тягненью без гетмана стали, рохмистрове и з старостами або державцами нашими, под которого поветом або врядом то ся станеть, мають справедливость и отправу каранье зараз не откладаючи чинити, водле сего права и статуту тогож Великого Князства Литовского. Кгды бы ротмистр таковых збытных и шкодников за обсыланьем старость и державец не ставил и справедливости каранья и нагороженья вделати не хотел; тогды тые врядники наши нам господару або гетману нашому мають оповедати або дати знати; а мы або в небытности нашой гетман наш ротмистров таковых, противных статутови и уфале земской, везеньем, а выступников шкодников таковых водле выступу их карати маем, яко вышей есть о том написано. Ведже сесь артыкул и постановенье наше статутовое за границах або на местцах при даванью пенезей маем казати служебным, оповедати для того, абы се не ведомастью не вымовляли.
Артыкул 27.
О блудяги на войне.
Уставуем о блудяги, абы кождый у войску нашом в тегненью не смел коня блудяги держати в себе только через ночь а местцу до третего дня, але тогож часу маеть его вести до гетмана нашого. А хтобы держал далей нижли через ночь таковый конь за злодейство маеть быти поличон; так теж и кождую реч знашодшы нести маеть до гетмана. А гетман наш не маеть казати от блудяги брати болшей толко от коня по грошу, а о иншые речы, в обозе закликати, а то, што нашол маеть, до пана гетмана отдавати.
Артыкул 28.
О указанью а пописованью шляхты поветовое у воеводствах або у староствах головных.
Уставуем теж мы господар и приказуем, всих рад наших Великого Князства Литовского, ведаючи того потребу часу покою, роскажем и рок листы нашими ознаймим всим обывателем Великого Князства всякого стану, яко хто водлуг уфалы земское служыти войну повинен, абы оказывали и пописовалисе в поветех судовых оного дня. А мають ся оказовати и пописовати перед воеводами, а в земли Жомоитской ино перед старостою Жомоитским, а индей перед головными старостами, а хто в розных поветех именья маеть, тот при головнейшом именью иншых именей своих почот показовати и пописовати мають; а тые воеводове и старостове головные в тот час свое почты показовати и пописовати мають, як которые се там для попису и оказованья изъедуть, тые жывность собе не уставою але торгом куповати иають, а от того попису у тых, которые се там зберуть и укажугь, не мають ничого брати.
Артыкул 29.
Яко на войне повинные у войску от гетмана далеко становитисе не мають.
Уставуем теж, абы нихто не смел далей мили от гетмана нашого у войску становитися, але так яко им водле потребы часу пан гетман раскажет.
© Валерый Пазднякоў, 2010, 2015
Надрукавать Надрукаваць без ілюстрацыйДадаць меркаванне
