Дакументы: Статут Вялікага Княства Літоўскага 1566 г. Раздзел 4. Арт. 26-50

Статут Вялікага Княства Літоўскага 1566 г. Раздзел 4. Артыкулы 26—50.

Артыкул 26.

О таковых, которые не маючы в повете оселости кого бы там оселого позвал.

Теж уставуем, кгды бы хто не маючы в котором повете оселости, другого кого там оселого позвал, а шло бы им обудвум об одну реч, тоть позваный оселый може заразом не отповедати и в право се не вдавати, аж бы се оный противник его неоселый там поддалсе и обовязалсе, теж ему в той речы, кгды ж об одну речь идет, там жо в его повете отповедати и всправедливити не беручы се до своего повету; а кгды се под то поддаст и на то обовяжет, тогды предсе оный позваный за тыми ж позвы на он же час наперед будегь повинен ему се усправедливитися.

Артыкул 27.

О рокох, на которых судья подсудок и писар зъежджатися мають и позваные перед ними повинни се становити.

Теж уставуем, иж суд земский маеть быти три кроть до году, то ест три роки судовые, на котором се будуть повинни судья подсудок и писар на одно местце до замку або двора нашого, которые местца вышей суть описаны, зъежджатися, а там мешкати две недели, если много справ, а если менш справ, тогды поки росправять и розсудять, а позваные и поводовые будуть повинни перед ними се становити, а обычаем и способом нижей в особливых листцах и артыкулех описаным. Роки мають быти сужоны: первые от святое Троицы рымского свята, и на завтрей се в понеделок почнуть; другие в осень на день Светого Михайла рымского ж свята, и также на завтрее почнуть; третие зиме по Божъем Нароженью, о Трех Кролех святе рымском, которые на завтрее теж судитисе на завтрее зачнуть; червертые в другом году также на день Святое Троицы рымского свята и на завтрее се почнуть. А судья подсудок писар маеть суды справовати и на судех седети кождого дня от поранку до не испорное годины, а позвы судити порядне з реестру не гледечы на особу и нефолкгуючы в том никому, але который первей позвал, тот на первей сужон быти маеть, а которые се на тые роки позвали, тых всих на початку роков писар повинен в реестр вписати и з реестру до права волати будеть. А ведже под тым часом роки сужоны быти не мають, наипервей естли бы сойм вальный Великого Князства Литовского был зложон, тогды перед соймом за чотыри недели роки судом устати мають; другое естлибы теж листы военные зашли, ино для готованья на войну за шесть недель не мають быти роки сужоны, а ведже естли бы в том часе на войну не выехали, тогды на потом предсе мають роки за тыми ж позвы и под таковою ж моцъю сужоны быти; третее естли бы, чого Боже уховай, в том повете поветрее моровое было, а то бы значне показовало, под таким часом также роки не мають быти сужоны, а по том часе, яко поветрее моровое оминеть, маеть вряд в том повете, где суд есть, роки выволати, а тые, которым бы была потреба, мають се справовати за тыми ж позвы своими на других рокох, которие по том поветрею выволаные близко припадати будуть.

Артыкул 28.

О позвех и о року, який за позвы будеть складан, а кождый жалобу свою меновите маеть на позвт описати, и о збиванью позвов.

Теж уставуем, иж хтобы до кого мел якое дело о крывду албо о якую кольвек реч, тот маеть от писара земского того повету позвы взяти под печатью нашою, от нас тому повету даною, и в тых же позвех жалобу свою достаточне и меновите выписати, а чого в позве не доложыть, на то сторона позваная отказывати неповинна. Ведже где бы сторона сама хотела собе позвы написати; тогды кгды принесеть готовые написаные водле права, писар, от него взявшы доход свой грош, записовати их будеть повинен, и тыми позвы перед кождыми роками судовыми мають се позывати, даючы их очевисто и кладучы на именьях их, с которых се кривда дееть. А кого очевисто позовуть, рок чотыри недели, а кому на именью положать, шесть недель маеть быти складан, не от даты позву в нем описаное, але от того часу и дня яко на именью положоны будуть, а меншые и близкие роки не мають быти за позвы складаны. А пакли бы хто на першых рокох судовых не стал; тогды на других и на третих рокох позвов и артыкулов в нем описаных ничым сбивати не можеть, ани будеть мочи, але повинен будеть отказовати, естли бы теж хто кому грабеж могуть вчынил, ино о грабеж позывати перед роки за две недели.

Артыкул 29.

Которые бы се деели якие кривды от врядников слуг и подданных чыих кольвек.

Уставуем, естли бы теж княжатом панятом радом духовным и свецким, шляхте и кому кольве с подданых нашых, им самым бояром слугам людем от врядников, слугь бояр и подданых также князских, панов рад, панов хоруговных, шляхты кривды якие кольвек в чом деели; тогды маеть сторона жалобливая (взявшы) листь наш господарский або от суду земского поветового, в котором оный и именья их будеть, ехати з возным до того пана, от чыего врядника и бояр слугь и людей кривды кому се деяти будеть, справедливости просечы и жалобы своее реестр маеть дати. А где бы самых панов в тых именьях их не было, ино врядников их, абы они на слугь бояр люДей пана своего справедливость чынили. А рок праву не маеть быти далшый от них покладан одно две недели. Если бы панове сами так и врядники их права дати и справедливость вчынити не хотели; тогды сторона жалобливая маеть позвы от суду земского взяти по того пана, с чыего будуть именья кривды деяти, и позвы на роки судовые его позвати, абы сам стал и тых, от кого се кому кривда будеть деяти, поставил. А ведже в небытности того пана в том меньи не маеть его сторона жалобливая нигде индей шукати, але на том ж именью позвы положыти маеть; а суд земский поветовый будеть повинен межы ними того досмотрети и справедливость вчынити. А где бы позваный сам або через умоцованого своего стати и тых врядников бояр и слуг людей своих, кому вина дана, поставити не хотел; тогды суд повинен ку таковым непослушным заховатисе водлугь сего статуту, яко о том в том же судейном розделе у артыкуле двадцатом ест описано. А если бы тот пан и хтож кольвек сам або врядники их комуж кольвек у кривдах их рок справедливости зложыл, а на року зложоном справедливости вчынити не хотел без слушное правное причыны; тогды такового пана и слугь суд земский в том судити маеть, а он тому, кому обецавшы справедливость учынити, а не вчынил, за разом у суда стороне рубль грошей заплатити маеть. А ведже если бы се то показало на праве, иж тот пан чынил оному справедливость слушную, але он ее упором своим не принял и на ней не переставал, и от того суду земскому притягнул; тогды тот того рубля грошей платити не повинен будеть, але еще тот упорный сам оному тот рубль грошей тут же заразом у суда заплатити маеть. От того часу пан шляхтич яко листов наших або врядников их о учынене справедливости обнесен будеть, и такового урядника слуг и подданных его в тот час там застато очевисто и припоручоно было и то доведено; тогды тот оного врядника и слуг и подданых своих маеть у ведомости мети, и за позвы повинен будеть их в суду земского на року зложоном становити. А ведже если пан при прошеню права врядника слуги и подданого своего у везде имати и до вряду близшого притягнувшы, если бы неоселый был, правом з ним обыходити, а пан его в том боронити не маеть.

Артыкул 30.

Яко стороны у суду заховатися мають за позвы.

Теж уставуем, хотечы то мети, абы у суду жалобы отпор порядне без сваров и непотребного забавенья и проволоки шли, так уставуем, иж наперед сторона поводовая не чынечы жалобы, але вместо жалобы маеть дать на праве позов чести и позву своего слушным доводом подпирати, а сторона позваная маеть на тот позов яко на жалобы отказывати и справоватися. В котором споре если бы сторона поводовая што против него услышала, на што бы размышленье потребовала; тогды судья отступленье и пораду з ее приятяли маеть допустати, а будеть ли повторей таяж сторона взычанья часу на порадку просити, и того судьи повторе боронити не мають, также теж и обжалованой стороне по два-кроть одного дня толко яко и поводовой стороне размышленя на час не маеть суд боронити, а болш того свару и споров и отволок суд не маеть допущати. А кгды вжо на обе стороне справу свою перед судом выповедять, а судья с подсудком потребовали сами собе в том розмышленья; тогды мають первей сторонам поменути, абы все, што бы на праве покладати и отказовати мели, мовити и учинити. А кгды вжо то все учинят и писар то спишеть тогды; вжо над то стороны ничого большей прикладати не будуть мочы, ани суд того приймовати и писати казати не мають, але судья и подсудок мають ся намышляти. Если бы того дня або завтрей розмыслитися не могли, и до третего дня то все взяти на поряду и розмышленье могуть, а третего дня вжо суд конечное сказанье будеть повинен чинити водлугь жалобы и отпору сторон, ничого не прикладати ани выймовати. А в том часе кгды судья и подсудок намышляютца, стороны естли бы хотели взяти собе на вгоду и еднанье, тогды того они им допустити мають. А мы, господар воеводове и врядники наши судья и подсудок и суд замковый або дворный и нихто иный ничого с головы и з умыслу своего судити и сказовати не мають и не будугь мочы, только водле статуту сего, яко в нем стоить выображоно.

Артыкул 31.

О заступованью в суду одному за другого.

Теж уставуем, хотечы мети абы так было на вси потомные часы, иж коли бы хто кого другого о которую колвек реч в суду заступил; тогды тот вжо будет повинен сам без жадных позвов, на тот час за тою ж жалобою з суда не сходечы, за него отказовати и усправедливитися. А заступованье инакшое не маеть быти только очевистое, у права ставшы заступити, не через листы и прокураторы. А где вжо очевисто у права ставшы заступить; тогды позваный або обжалованый от того волен, а поводовая сторона будеть о том с тым заступцею мовить, и речи свое на нем доводить листы и выписы и оповеданье, и все тое право и довод, которие поводовая сторона против обжалованое стороны в том праве мела, маеть противко тому заступцы ити и у права местце мети так яко против обжалованому; и мы заступцу за имя обжалованого будем розумети, и заступца не маеть собе до повету ани до суду своего належачого откладати и брати, але повинен будеть сам або при собе маючы прокуратора того ж часу, скоро заступит, отказывати и до конца усправедливитися.

Артыкул 32.

О злеценью речы и отдаванью моцы иным за себе у права мовити.

Уставуем теж, иж кгды бы хто за позвы або на котором року припалом не мог на праве быти, так за хоробою яко и за иными некоторыми прычынами и потребами своимы; тогды прокуратора або умоцованого своего можеть у место себе у права мети. А ведже умоцованый або прокуратор инакшый иначей установлен и у права приймован быти маеть, абы ему очевисто злецыл реч свою перед врядом которым кольвек, тым земским або замковым, и с того вряду выпис с книг маеть взяти. А княжата панове рада и панове хоруговные врядники наши шляхты, котории суть печатей значных, могуть в речах потребах своих прокураторов и умоцованых до права слати з листы своими отвороными, припечатовавши их печатью своею и рукою своею власною подписавшы, хто писати умееть; за таковыми листы умоцоваными и выписы врядовыми суд прокуратору маеть допустити у права мовити и справовати, а который бы сам писати не умел, тогды перед врядом маеть до книг сознанье вчынити. А где бы теж хто з шляхты вряду близкости або за хоробою своею до вряду ехати и порученья прокуратору очевисто перед врядом сознаньем своим дати не мог; тогды теж таковый может листом отвороным до вряду прокуратора умоцованого послати и ему реч свою злецити, в котором листе при печати своей маеть о приложенье печатей шляхтича веры годного просити, тогды таковый лист, в котором поменившы реч, о што идет, остаток на позов указати зыск и трату доложити, и так вжо за ним прокуратор моцный у права быти маеть.

Артыкул 33.

Хтобы сам не мог, або не умел у права мовити.

Уставуем теж, хто бы очевисто у права стоечы не могь або не умел сам мовити або речы своее справовати, поручыл устне кому иному реч свою мовити; тогды таковому злеценья инакшого листовного не будеть потреба, але судья злеценем устным маеть его за моцного приняти, хотя и неоселого. К тому кгды бы хто, не могучы сам справовати речы своее у суда и не вмеючы мовити, прокуратора потребовал; тогды суд повинен ему з уряду прокуратора дати, и казати прокуратору от него мовити, а реч его справовати. А в вображенью маестату нашого господарского обецуем прокуратора обвиненой стороне дати. За се будеть повинен суд з ураду дати прокуратора, и дармо казати ему мовити от убогих сирот и вдов немаетных и тым теж, которыи бы або за приязнью або теж убозтвом своим прокуратора мети и сами речы своее за недостатком своим в суду справовати не могли.

Артыкул 34.

О прокураторох, якие мають быти и яких теж суд маеть приймовати.

Уставуем теж, иж о именья и всякие иные речы лежачые рухомые не маеть быти прокуратором жаден чужоземец и неоселый у Великом Князстве Литовском; а ведже кому идет о горло о честь, в таковой речы можеть собе прокуратора чужоземца и неоселого мети и от себе установити. А судья подсудок и писар так теж и тые, которые только духовные именья держать, прокураторовать не мають; а однакож и тые вси выш помененые в речах своих властных сами через себе и чрез прокураторов своих справовати могуть.

Артыкул 35.

О каранье фальшывых и подступных прокураторов, и к тому иж волно стороне прокуратора своего у права подперети, и самому мовити, и другого прокуратора на его местце установити.

Уставуем теж, иж кгды бы который прокуратор поднявшысе кому реч его мовити и справовати, а выведывшисе на нем тое справы и листов его огледавшы, выдал его в том стороне противной, або до тое стороны его противное пристал, и от него за се напротивко тому, кому се первей обецал и поднял речы мовити, а то бы на него яким явным и слушным доводом доведено было; тогды таковый, естли есть шляхтич, честь тратить, а не шляхтич горло тратит. А хтобы теж у права стоечы хотел отставити прокуратора, а сам свою реч мовити, або другому прокуратору реч свою злецити; то ему вольно будеть.

Артыкул 36.

Причыны нестанья прокураторов, иж то им и сторонам их шкодити не маеть.

Теж уставуем, иж кгды бы прокуратор перед роком права не могучы стороне своей о форобе своей дати знати, иж бы иншого на его местце послала, або едучы вжо на дорозе рознемогсе форобою обложною, так же бы сам на рок до суду быти не могь; тогды то яко стороне той, чыю справу на себе взял в речах тых, так теж и прокуратору ничого шкодити не маеть, а хотя бы третие роки остатние або рок завитый был, предсе ничого тратити не будеть. А ведже прокуратор в той форобе скоро се рознехожеть, маеть до вряду близшого о собе дати знати, и потом врядовне тое форобы довести, а обмогшысе потом на першых рокох будеть повинен присегнути, иж правдиво за обложною форобою на тот час становитисе не мог. Так теж слуги посланые от панов, которых бы на роки до суду пославых в дорозе фороба великая и обложная зашла, по тому ж будуть повинни заховатисе яко вышей описано. А ведьже естли бы прокуратор або посланец и слуга таковый о форобе своей дати ведати и присегчы на других рокох учинити не хотели; тогды суд не дбаючы о таковых вымовках их, сказанье маеть чынити ведле сего статуту. Так теж если бы хто кольвек хотечы кому шкоду учынити, а прокуратор се учинил и листы от него под печатью его справил, а тогды бы ему сторона не поручыла, а за тым што кому утратил; таковый суд не маеть быти держан, а тот прокуратор, хто бы то учынил, ничим иньш только горлом маеть быти каран.

Артыкул 37.

Чого прокуратор без стороны своее справовати не можеть.

Теж уставуем, иж прокуратор за моцъю жадных записов и никоторого вызнанья ни от кого не маеть у суду чынити и пенезей записаных брати и с них квитовати, не маючы при собе стороны своее. А ведже естли бы хто не иогучы або не поспеючы до вряду по пенези ехати, а хотел через кого иного тые пенези брати и квитовати; тогды иначей не можеть и не маеть только через такового прокуратора або слугу своего, кому особливою на то моц и порученье листом своим подписаным рукою своею дасть, або перед врядом близшым поручыть, и выписом того вряду моцным его на та меновите учынить, таковый моцный можеть пенези брати и моц мети будеть квитовати.

Артыкул 38.

Иж нихто с бронями перед суд приходити не маеть.

Уставуем теж грозно приказуючы, абы нихто с подданых наших княжат панов рад, почоншы от вышшого аж до нижшого стану, яко сами панове так и слуги их при панах своих и без панов приятель за приятелем, не смел в зброях кафтанах и с такими бронями, то ест с древом зо щепом з ручницою з луком и с кушою и з иными всякими, до суду замкового земского приходити и при собе мети; а ведже корд и меч то при собе мети можеть и носити. А который бы через сее росказанье наше важылсе с таковыми бронями перед суд прийти, таковый (в подл. пробел) и ознайменем вряду нашого маеть нам господару заплатити дванадцать рублей грошей, а предсе суд его справы не маеть до того часу, поки будеть с таковою бронею до суду приходити. А если бы предсе упором своим не хотел от себе таковое заказаное брони отложити и там з нею у суду был; тогды суд заховуючы сторону жалобливую послушную, а другая бы сторона противная чынила сему росказанью нашому, досыть маеть подле права поступок сказанье напротивко упорному учынити, так яко бы теж и в праве не стоял.

Артыкул 39.

Хто бы кого перед правом словом або рукою сегнул, попхнул, або ранил.

Теж уставуем, коли хто будучы стану шляхецскаго, стоечы перед судом уступившы речы своее, один на другого словами се неучтивыми торгнул; тогды за то маеть з сказанья того суду вместо вины седети не замку близшом шесть недель. А естли бы пхнул або рукою ударил, а хотя бы и не вдарил; тогды маеть заплатити стороне вместо навезки дванадцать рублей грошей, а за вину седети шесть недель. Пакли бы корда меча або шабли и якое кольвек брони без слушное причыны добыл, хотя бы и не ранил; таковый руку тратит, кгды бы ранил, тогды ничым иншым только горлом маеть быти каран. А ведже хто бы свовольне дал причину кому словы и рукою початок учынил, а тот бы у в обороне примушоный початком его брони своее добыл, ранил и забил; такий таковое покуты и каранья не повинен терпети. А хто бы теж кольве ранившы кого перед судом утек, таковый маеть быти з земли выволан.

Артыкул 40.

Хто бы на суде судью подсудка и писара так вряду земского яко и замкового зсоромотил, збил, ранил, або забил.

Уставуем теж, если бы хто кольвек пришедшы до суду замкового або земского словы доткливыми славе и почтивости его зсоромотил; таковый за то винен будет на замку близшом шесть недель у везенью седети. А если бы ранил або забил; таковый маеть горлом каран быти, а головщына близким з именья его маеть быти плачона, ведже обвиненый в таких речах позван быти маеть перед нас господара, а коли з суда так найдетсе, тож в том по суде з выроку нашого так каран быти маеть.

Артыкул 41.

О том, где бы судья подсудок и писар так замковый яко и земский седечы кого на суде зсоромотил, або се на него рукою торгнул.

Теж уставуем, иж кгды бы хто с того вряду нашого так замкового яко и земского, седечы на суде, кого словы неучтивыми зсоромотил; тогды маеть о то позвы нашими перед нас позван быти, и будеть ли то на него слушным доводом переведено, тогды маеть на замку нашом шесть недель седети. А естли бы судья подсудок и писар сам квалт местцу нашому и суду учынил, а кого ранил або забил, тогды маеть быти каран горлом, а близким з именья его головщызна плачона быти маеть.

Артыкул 42.

Если бы хто, на роки приехавшы до суду земского або замкового, кого другого часу роков зранил, кгвалт або шкоду якую кому учынил.

Уставуем теж, естли бы хто, на роки приехавшы до суду земского або замкового, и часу того поколь роки будуть, кому заступившы на господу кгвалт або находку вчынившы, кого зранил и притом якую кольвек шкоду учынил, а шкодный того ж часу утек се до суду и то обжаловал; тогды суд замковый и земский або дворный наш господарский тамошний обжалованого будеть повинен вознымы обослати, абы он не зъежджаючы проч перед судом стал и обжалованой стороне се справил, который без позву винен будеть стати и того ж часу на тых же рокох справитисе. А пакли бы не росправившысе зъехал; тогды за непослушенство маеть до суду заплатити три копе грошей, а стороне жалобливой другую три копе грошей, а заплатившы маеть стати яко на завитом року и стороне се усправедливити. А пакли бы на першых рокох яко на завитом не стал, або и ставшы в отказе быти не хотел; тогды суд замковый або дворный, не чынечы жадное проволоки стороне жалобливой, так о зраненье яко и о вси шкоды сказанье на тых перших рокох учынити маеть.

Артыкул 43.

Иж позваный не мает розрывати права речми непотребными.

Уставуем, если бы позваная сторона, будучы у права, а отступившы от позву, стороне поводовой што такового нового задала, або теж з стороны до того се правом своим приповедала, хотечы право розорвати а проволоку вчынити; таковой стороне то у суда ити не можеть, маеть суд отложыти то на сторону, а предсе стороне поводовой справовати чынити водле позву, о то о што позвано, и то кончыти и сказанье чынити водле права. А в таковых новоприпалых речах, естли будуть суду земскому приналежати, суд маеть им казати, абы се о то знову на иншые роки позвали. А естли бы се што такового межы ними о почтивость дотыкало; суд маеть им обема сторонам рок перед нами господарем станью зложыти, которого будеть сторона обжалованая потребовати, и через выпис с книг рок нам господару ознаймити, на который рок зложный обе две стороне без жадных позвов мають се перед нами господарем становити.

Артыкул 44.

Яко братью неделную або вчастников, то есть себров, позывати.

Уставуем, если бы колко братьи або вчастников держали адно именье себреное, люди тяглые або подданые, а кому бы се кольвек от того именья людей кривда деела в рухомых речах, а они бы яко з себе так и с таковых людей справедливость чынити не хотели; тогды жалобливая сторона лист врядовый через вознаго также врядовне посланого на том именью положыти маеть, абы се той жалобной стороне справедливость стала. А если бы се той жалобной стороне справедливость не стала; тогды усих учасников о то перед суд позвы позвати маеть ни на том же именью позвы положыти, а хотя бы се оные учасники не зъехали, тогды суд на роках судовых будеть сказанье подле права на именью чынити подлуг того, яко о том о рокох судовых написано.

Артыкул 45.

Иж врядников наших з их врядов нихто судити немаеть одно мы сами господар.

Теж уставуем, иж врядников наших, то ест воевод старост державец замков и дворов наших и тивунов з их врядов, которые от нас держать, кому бы кодьвек кривда се деяла або видела, не маеть их нихто судити одно за позвы нашими мы сами господар. Але з именей своих я если бы кому якую кривду учынили; тогды перед судом земским будуть повинни становитися и отповедати.

Артыкул 46.

О мещанех и о людех наших и кривдах их от шляхты.

Уставуем, если бы хто с княжат панов шляхты всякого стану ак и с подданых их учынил кривду якую кольвек мещаном нашим мест наших, где права майдеборскаго не мають, так теж и людем именей наших господарских; таковых о учыненье справедливости воеводове старостове и державцы наши мають сами або врадники их, раз обослати листом своим, а где бы его на именью не было, тогды возный маеть лист на именью его положити, абы сам з себе и с подданых своих справедливость учынил. А если за тым першым обосланьем справедливости не вчынил, вряд наш маеть у суду земского позвы взяти и таковых позвати на роки судовые, которые в том повете будуть, который на первшых рокох яко на завитом року под страченьем права маеть стати и подданых своих поставити; а суд маеть, яко с тым самим паном, так и с поддаными его, от которых бы ся мещаном або людем нашим кривда деела, яко на завитом року справедливость учынити, и справа в чом бы против мещан и людем нашым стали винни, кождый грабеж, на чом довод слушный учынять, з навезкою казати заплатити.

Артыкул 47.

О мещанех права майдеборскаго.

Теж уставуем, если бы которому з мещан наших права майдеборскаго которая кривда деела от князей панов земян, а они бы сами доброволне усправедливити не хотели; тогды такового кождого мещанин маеть до суду земского поветового позвати, и далей поступовати противко ему подле поступку права и статуту земского.

Артыкул 48.

О учасникох, яко мають близкости именья доходити лежачого.

Теж о реч сполечную, которую ж кольвек вси учасники веспол у права мовити и се доходити мають, а один без другого сам чынить а ни ку кривде иншых учасникох своих никоторое речы сполечное притягивати не можеть. А ведже естли бы иншые участники вси посполу которое речы сполечное у права доходити а ни о ней мовити не хотели; тогды тот, который доходить всхочет, маеть о то припозвати оных участников своих на роки судовые перед вряд поветовый, в котором оные участники его оселостями своими будуть, а в небытности их самых, тогды позвы на именьях их положыти, складаючы рок очевисто чотыры недели, а заочне шесть недель. А хто бы с таковых участников за першыми позвы не стал, тогды того другими позвы о тое ж на другие роки позвати; а естли бы и за другими позвы на других рокох не стал, тогды и в третее яко на завитый рок позвати; а где бы за третими позвы и на третих рокох судовых яко на завитом року хто не стал, тогды вжо оный вчастник, который речи сполечное доходити усхочеть, сам один можеть доходити и без иных вчастников, а позваный будеть повинен вжо ему самому, хотя бы иншых учасников не було при нем, отказовати. И иншые вчастники, которые бы и за третими позвы перед урядом становити не хотели; тые позваного, если прав зостал, о теж напотом у право поволокати а ни на нем того доходити не мають, а ни теж учасника своего, которий бы того дошол, частей своих у права доходити не могуть, и кгды ж вже от того за непослушенством и нестаньем своим через трои роки отпали, выймучы таковых учасников, до которых бы за троими позвы для далекого отъеханья яко по чужых сторонах по рыцерству и науках их, а ведомость о таковом позванью их подле доводу слушного их и узнанья судового прийти не могла. А ведже абы небытностью таковых учасников тот участник, который бы того доходити хотел, для продлуженья напотом не шкодовал, а если бы добре оселый иожеть сам один того доходити, описавшысь позваному на оселости своей; а естли бы того права отсужон был, ино вжо оные учасники его повторе на нем того ж права поискивати а ни доходити не мають, и естли бы поискивали и хотели, тогды он сам от них у права заступовати боронити своим накладом маеть и повинен будеть.

Артыкул 49.

О заповеди и о заруки о реч сужоную.

Теж уставуем, хто бы на ком правом што презыскал, то ест именье люди або земли якие ж кольвек кгрунты лежачые; тогды маеть ему в то увязанье справа дано быти, а зарука з уряду заеть быти положона, абы тот, хто на праве упустил в то се через тое не вступовал и увязыванья не боронил. А пакли бы увязыванья не допустил албо се по ввязыванью в то вступовал; тогды тую заруку з уряду положоную маеть платити половицу на нас господара а половицу стороне жалобливой, а ведже зарука болшая не маеть быти только водле важности тое речы, о што идеть, а тот, кому што присужоно, предсе то маеть держати.

Артыкул 50.

Хто бы после права и присяги того ж искал, што перед правом утратил.

Теж уставуем, если бы хто чого искал, а пустил бы его на присегу, або теж с права была бы ему всказана присяга, а он бы присегнул а потом бы он што его обжаловал, хто бы колвек тое ж речы на нем и чого ж кольве, што правом утратившы, у другое того искал, менуючы иж бы несправедливе присегнул, и хотел на того, который присягнул, доводити; тогды таковый довод водле права не маеть ему быти допущон, але иж по присезе тоеж речы искал, которую у права утратил, маеть чотыри недели на замку нашом седети, а шкоду оправити, на чом слушный довод стороне укажет и учинит. А где бы ничого такового не примовляючы словы не соромотечы только речы сужоное у другий раз искал; тогды седенья не будеть повинен, только маеть шкоду платити, на што слушный довод учинит.

© Валерый Пазднякоў, 2010, 2015

Надрукавать Надрукаваць без ілюстрацый
Дадаць меркаванне