Дакументы: Статут Вялікага Княства Літоўскага 1566 г. Раздзелы 7, 8

Статут Вялікага Княства Літоўскага 1566 г. Раздзелы 7, 8.

Роздел семый. О записех и продажах.

Артыкул 1.

О записех на именья свои отчызные и материстые.

О записех на именья свои отчызные материстые и всяким обычаем набытые, которий ся уфалил на сойме вальном Берестейском, в року тисеча пять сот шестдесят шостого, месяца Іюня. Кгдыж в старом статуте и в поправах статуту нового бачили панове рада обоего стану, также и вси станы, на першом вальном сойме Берестейском от нас господаря зложоном отменити четыри артыкулы в розделе том семом о записех: первый, другий, третий и четвертый и праве их на сторону отложити и на тое местце тот нижей описаный установити и в статут вложыти, якож на то сполне и одностайне вси зезволившыся и уфалившы, до нас господара донесли и утверженье того нас просили. Мы господар, приставуючы тому зволенью и уфалы их, утвержаем место оных чотырох артыкулов выш помененых, откладаючы их на сторону, на перед нижей описаный ку уживанью и справованью в том панстве Великом Князстве Литовском и во всих землях ему належачих, межи всими станы и особами праву земскому и сему статуту прислухаючих. Што вси от сего часу и дня волно и моцно кождому именья свои отчызные и земские материстые и выслужоные купленые и яким кольвек обычаем набытые и названые, не смотречы третее и двох частей, яко перед тым бывало в статуте обычаем стародавным, але все с домом, хто их што маеть, будь теж половицу або и которую их часть, и по собе и у одно або люди земли, што хотя от них водле доброе воли своее и мысли, отдати продати даровати и записати заставити, от детей и близких отдалити, подле баченья своего тым шафовати. И хотя бы перво которую часть албо половицу именья своего альбо што кольвек люди земли кому продал записал; тогды остаточных именей своих потому ж волен шафовати вечностью заставою, як воля его будеть, отдаляючи то от детей близких своих. А ведьже кождый таковый, або продаеть альбо даруеть, сам очивисте перед нами господарем объявити маеть, або перед урядом земским, где в котором повете тое именье лежит, або до которого суду земского прислухаеть. А пакли бы до которого повету было далеко, в котором именье тое лежит, алимъьбо до которого суду прислухаеть, тогды будеть еиу вольно запис свой оповедати и до книг записати; а тот кому, продано або яким кольвек обычаем записано будет, с тым листом записом сво и теж записом врядовым маеть ехати або послати до того вряду земского поветового, где в котором повете именье лежати будеть, а то оповедавши маеть до книг земских тот запис свой увести, а уряд урядови верити маеть.

Артыкул 2.

Если будет кому потреба запис чинити кроме роков земских от лежачих книг.

Теж хто бы хотел што записати оселость кому вечностью межи роки судовыми, без которых суд не звык заседывати на суде, и книги подлуг статуту лежати не будуть; тогды маеть прийти перед вряд замковый дворный, где суд от нас господара засажоны, и там же запис справеный перед воеводою або старостою альбо державцою, где такие суды суть, оказати вызнати и дати его до книгь записати замковых слово от слова, и выпис взяти, который выпис замковый будеть тривати до году а не далей. А в том году маеть быти оный запис пренесеный до кних земских и при врядникох земских в тые ж книги земские дати записати, тым обычаем таковый запис маеть быти при моцы захован, и тот, што им кому будеть записано, маеть то одержати. А где бы так доводу не вчинил; тогды таковый запис жадное моцы мети и за оным тую реч, што кому записано, одержати не маеть. А в небытности воевод старост и державец судовых на таковых урядех и местцах их; такие записи за листы вызнаными предся очевисто особы будучи сами, хто што записуеть, вызнавшы и такие записы сами ж оказавши вряду тому, то ест перед подстаростим наместниками и при судьи, от таковых особ урядовых могуть быти и выписы даваны под их печатьми и с подписаньем рук их, а при намней двух, если бы вси три писати не вмели.

Артыкул 3.

Хто бы хотел именье свое отчизное продати або зоставити.

Хочем теж мети и уставуем, абы кождый таковый, хто бы хотел именье свое отчизное продати або заставити; тогды маеть прийти перед нас господара або перед вряд земский, в котором повете тое именье лежит, объявити перед судом земским, которая продажа за таковым обычаем будеть моцна и вечне держана, хотя бы на то и потверженья нашого господарскаго не было. А ведьже тот, кому будеть записано, того ж часу маеть, взявшы возного з уряду поветового, увойти в держанье и того именья; пакли бы по оном записе в держанье того именья не пришол, а давность земскую десеть лет промолчал, тогды таковая продажа и застава потом моцы ни которое мети не будеть.

Артыкул 4.

О вольности продати третюю часть на вечность.

Уставуем, хто бы хотел именье свое отчизное продати на вечность; тогды только третюю часть именья отчизного вольно ему на вечность продати, а две части того ж именья в суме зоставити. А ведьже не маеть большей на тые две части именья отчизного брати, только так яко бы сума не превышала на уфалу и постановене наше, яко вышей в розделе о судьях ест написано; а где бы больш на тые две части пенезей дано, тогды дети яко близкие не будуть повинни больш платити, только шацунком потому яко вышей описано, а што будеть превышати, то оному, хто вышей дал, маеть згинути.

Артыкул 5.

О записех именей купных.

Уставуем теж, иж кождому будеть вольно именье свое куплю и выслугу отдати и продати и кому хотечы записати, бы теж кому и обчому, от детей и близких своих все не менуючи третее части; а ведь же тые тым же обычаем, пришедши перед нас господаря або перед вряд земский часу роков судовых, маеть объявити и сознати и до книг земских тую продажу свою записати, за которым оповеданьем тая продажа маеть вечне держана быти. А хто бы хотел записати нам не объявивши перед нами господарем, або перед паны рады нашими, або теж перед врядом земским, бы теж и печати людей сторонних у того листу были; тогды таковый лист або запис у права моцы никоторое мети не будеть. А естли бы хто продал именье на рокох судовых, таковый маеть перед врядом замковым сознати; и тот, хто купил, взявши выпис з уряду замкового, маеть потом на перших рокох судовых земских перенести и дати записати.

[Артыкул шосты ў рукапису прапушчаны].

Артыкул 7.

Не маеть нихто никому жадного спадку записовати, чого в руках немаеть.

Теж естли бы хто хотел кому записати которим спадком, который бы мел на него прийти веновье або материстое або которою кольвек близкостью, которий бы кольвек по ближнем по пустой руце мело спасти, а тот бы еще был жив; тогды такового спадку нихто не можеть записовати ни продати а ни отдати а ни сумы никоторое на том записовати, оли ж бы в руках своих мел. А если бы хто кому таковый спадок записал або продал теж записал на том которую суму пенезей, таковый запис перед правом не маеть быти держан, бо нихто никому не можеть дати, чого в руках своих не маеть. А пакли бы хто кому што записал от своих близких, не маючи того в руках, сам на перед умер, однакож запис ни в вошто маеть обернень быти предсе, то маеть прийти на прирожоных близких.

Артыкул 8.

Хто бы кому записал именье або землю по своем животе, а тот, кому записано, того смерти не дождал и наперед умер.

Теж уставуем, если бы хто кому записал именье або люди по своем животе, а тот, которому будеть тая реч записана, того смерти не дождал, которий то будеть ему записал, и сам наперед умер; тогды тот тую реч можеть иному записати, кому воля его будеть. Нижли еслибы тот жив был, а он ему записавши, и потом иншому Другим записом хотел записати; тогды от першый запис маеть при моцы зостати, а последний ни во што маеть обернен быти. Так теж хто бы кому именье або люди або земли продал; тогды тот, хто первей купил, маеть то одержати, а тот, которий опосле купил, маеть пенезей своих на истцу смотрети.

Артыкул 9.

Хто бы на которую кольве реч добровольне дал запис, тот маеть при моцы зостати.

Теж уставуем, если бы ся хто кому записал на которую кольвек реч рухомую або суму позычоную добровольне запис, под печатью своею и под печатьми людей добрих подле обычаю права учиненый; таковый кождый маеть у таковом записе зостати, а тот запис кождый маеть управа мети иоц.

Артыкул 10.

О именье должное и давность земскую.

Теж уставуем, коли хто купил якое дедицство и держал с покоем заплатившы, а на том же бы именью хто иншый долг мел первей врядовне записаный, поки еще было не продано, и в молчанью был о тоть долгь десеть лет, через давность земскую, и правом его не доходил; таковый хотя и листы упоминальные мел, то не маеть на том именьи долгу смотрети, але истца у своих пенязях искати. А естьли бы тот истец не мел чим платити, тогды в том долгу маеть его суд за шлюб выдати, нижли если бы от того долгь также врядовне записаный до права позывал того, который именье держит тое, давности земское не омешкавшы, тому подлуг запису его першого тот долг на том же першом именью маеть быти держан, а тот, который в держанью того дедицства, оный долг маеть заплатити тому, хто первшый запис маеть, а сам маеть тых пенезей и кождого оного накладу на истцу доискивати.

Артыкул 11.

Хтобы под ким искал близкости, а тот держал именье записом слушным.

Хто бы под ким именья искал близкости своей, а тот бы, под ким ищет, держал тое именье записом слушным, а поведил бы, иж то не одному ему але иншим тым же записом тое именье записано, и рек бы : про то я без них о тое именье не хочу отповедати; тогды тот, хто именья ищет, маеть оных всих учасников припозвати, которим тот запис служит.

Артыкул 12.

О долги двох або колко на одном именью.

Коли бы хто именье закупное у которой суме держал, а другий бы ся долгом своим ку тому ж именью приповедал, менечи иж тем ему на том же именью сума есть описана, и с права бы тую ему перевел, и давность бы земская не замолчана, а тое бы именье обои сумы стояло; тогды тот который маеть большую суму повинен заплатити, або обадва тое именье иншому в обоей суме зоставити, а тые пенези межи себе водле записов розделити. А пакли бы колько должников ровными долги до одного именья збеглося, а именье бы вже за тые долги не стояло; тогды хто бедеть мети первший запис, або бы в держанью именья был, а именье теж большое сумы не стоить, тогды (тот при таковом именью зостати маеть, а тые з) остатными записы мають тых пенязей своих на истцу доходити.

Артыкул 13.

О реч заставную, хто в большой суме заведеть.

Теж коли бы хто реч заставную у большой суме зоставил, а тот чыя реч у кого ль бы свое застал, и ку бранью пенезей, которые пенези або предок его будеть на тую реч взял, и ку праву его позвал, а перед правом суму пенезей водле запису своего положил; таковые пенези отдавши реч свою маеть взяти, а тот, которий на чужую реч большую суму даеть, на истцы нехай того собе смотрит, што бедеть на звыш первое сумы дал.

Артыкул 14.

Кождая застава давности мети не можеть.

Хочем теж мети и уставуем, абы кождая застава давности земское не мела; и вольно будеть всякому дедичу, отложивши перед правом пенези, дедицтва своего дойти, так за правом своим прирожоным яко кольвек и набытым.

Артыкул 15.

О одкладанью пенезей на заставу.

Коли бы хто ииенье або иншую реч которую у пенезех заставил на рок мененый, и хотел бы пенези ёго на року ему отдати, а заставу к собе взяти, а не будеть ли хотел пенязей в его своих брати ани заставы еиу попустити, а позван бы был ку праву, абы пенязи свои взял, а он бы на року завитом не хотел стати; тогды жалобник перед правом пенязи маеть положыти, а вряд ему маеть дати увязанье во именье, и кождый заставу свою з уряду одержати маеть водле опису своего. Пакли бы оный, которий именье або которые оные речы заставным обычаем закупил, а на року позваном стал; тогды взявшые тые пенязи свое заставы, то есть именья лежачаго або рухомых речей, жалобнику маеть поступити водлуг запису своего и умовы, жадною давностью не отбываючи. Пакли бы такому заставил на рок; тогды естьли тот жыв, а рок пришол, а он на рок не выкупил; тогды он тую заставу маеть держати, аж до другого року не можеть окуповати водле запису на то даного. Нижли бы тот, хто заставил, умер свое заставы не выкупившы; а сын заставцы, або близкие тогды того року не мають смотрети, але кгды будеть припозван, без року маеть тот пенези взяти а заставы поступити.

Артыкул 16.

Рок праву о заставную реч мает быти положон завитый.

Хочем теж мети и уставуем то, иж кождый первый рок за позвы зложоный о кождую реч заставную маеть быти завитый под страченьем права; от которого часу позван будеть тот, который заставу держит, и от того часу не маеть большей за именей казати жадных доходов и пожитков брати, а што бы кольвек после положенья позву через возного з именья того взял, то все маеть при выкупанью именья ему вернути.

Артыкул 17.

Хто бы што запродал на рок.

Теж если бы хто кому заставил рухомую реч на рок под страченьем, а коли бы рок пришол, а тот, хто заставил, не выкупил; тогды тот, хто закупил, оповедавшися вряду можеть тые речи обернути, кгды хочеть, ку своей потребе на вечность.

Артыкул 18.

О именье заставное, без року не окупати.

Так теж именье если бы хто кому заставил на рок под страченьем на упад; тогды если бы рок пришол, а тот, хто заставил именье, на тот рок не мог выкупити; тогды тот, хто закупил, и по оном року врядовне обослати маеть ближних, а ближние не могли бы по оном обосланью до году того именья окупити, тогды тот, хто закупил, по оном году, естьли такий не выкупить, маеть вечне держати.

Артыкул 19.

О отнятье именья заставного.

Теж уставуем, естьли бы хто заставил кому именье або люди в которой суме пенезей на рок, и засе пенезей не заплатившы тое именье або люди, што будеть заставил, в него отнял до року; тогды тому маеть кгвалту платити дванадцать рублей грошей и заруки в листе описаные, а колько будеть до року тые люди, колко их заставит, не робили, за кождый тыж день маеть навезки платити за службу суполную по шести грошей, а люди предся маеть пустити. А если бы один другого заставил люди або землю, а стороны пришедшы бы хто третий тые люди отнял; тогды кому то отнято будеть, ли не всхочеть ли позвати от кого ему кривда, тогды маеть позвати оного, хто заставил, а он с права будеть повинен ему, хто заставил, очищати, а не чищит ли, ино так можными людьми землями маеть то нагородити, або и самого истца не будеть, ли тогды только с тое заставы маеть доходити на том, хто заставу в него отыймуеть.

Артыкул 20.

О реч рухомую в заставе.

Уставуем, коли бы хто кому заставил в суме пенезей якую колвек реч рухомую, кром дедицства лежачого, на рок, а тот бы маючы заставу припозвал того, абы заставу свою выкупил, а он бы с тое заставы окупити не хотел; тогды вряд маеть ему дозволити и допустити тые речы рухомые продати, и што бы звышей на той заставе на одну суму его превышало, тогды тое, што будеть назвыш, маеть оному, чия то застава была, вернути. А где бы без року тая застава запроДана; тогды вряд маеть рок положити чотыри недели, и на которий маеть выкупити заставу свою, а не выкупить ли на оный рок, тогды по оному року под тым же способом, яко вышей описано, мають о тую ся заставу росправити.

Артыкул 21.

Хто бы кому заставил коня або вола без року.

Уставуем, если бы хто кому заставил коня або вола без року або и на рок, а в том часе оное заставы конь альбо вол здохнет без причины ображеня, иж робечы им не порвал, або голодом не вморил; тогды такового коня або вола платити не повинен, тому скуру показати, и тые пенези в чом был закупил, тратит.

Артыкул 22.

О речах заставных, што вы згинуло в чием схованью.

Уставуем, хто бы мел речи в себе якие кольвек рухомые в заставе або у схованью, а тые бы речи были сполу у в одном кгмаху з речьми домоваго господаря, и с пригоды огнем погорело або покрадены, а он бы то вряду, под которым седить, тогды ж оповедал, и к тому будеть ли еще при тых и властивое маетности его што выкрадено або сгорело; тогды маеть на том сам присегнути, иж оных речей не користил, и ничого ку пожитку своему не обернул, за таковым отприсяженьем маеть быти волен. А пакли бы поведал, же толко того речы, хто дал ховати, сгорели або покрадены, а его самого господаря домового целы; таковый тые речы вси повинен будеть оному вернути або заплатити, а естли в суме пенезей заставлено, ино пенези взяти, а тые речи предсе вернути, на што слушный довод учинит. Так теж если бы хто у кого зложил в склепе або у яком схованью речы своее и замкнул, а домовый господарь тые речи в небытности его рушыл, або и на иншое местце перенес, а в том бы се шкода стала; тогды тот, хто рушил, маеть тую всю шкоду платити за слушным доводом або присегою оного шкодного.

Артыкул 23.

О заповеданью речей рухомых чужих.

Уставуем, кгды бы хто свое речы дал в схованье кому, а инший з стороны доведавшися о тых речах в захованью приповедался, иж тот и тые, хто тые речы зложил, винен ему албо должен; тогды господар маеть тые речы у себе мети, а их не выдавати до росправы. А естли бы их хто заповедал, хотел отъехать проч, тот маеть на местце свое перед судом прокуратора встановити, который в небытности его будеть оного долгу доходити; пакли бы сам ехал, а прокуратора не зоставил, ино тые речы, которые заповедал, мають оному выданы быти, чии суть, а в том господар домовый никоторое трудности ани шкоды меть не маеть.

Артыкул 24.

О листы на долги на именья и на заставы згинулые.

Теж уставуем, кому бы листы на долги и на заставы на именья згинулые где кольвек на дорозе от огню або от воды и яким кольвек обычаем стороны, а тот, кому листы тые належали, которого ж часу по оной згубе перед нами господарем або перед врядом оповедал и записати дал, а потом пришло бы ку праву; тогды тот, хто листы стратил або кому тые листы прислухають и належать, маеть довести людьми добрыми веры годными, которые листы видели и их сведомы, а потом сам и з сведками, колько их можеть мети, на том прысегнути маеть, иж таковые листы страчоны, а кгды того доведет людьми добрыми и присегою своею, маеть оную реч, на што листы згинули одержати.

Артыкул 25.

Як много без листу вызнаного маеть позычити.

Уставуем, иж кождый шляхтич мещанин нихто инший не маеть без листу вызнаного болш позычити десети коп грошей; а если дал большую суму, а листу вызнаного на то не мел, тогды тот, хто больш дал без листу вызнаного, пенези тратитит, а тот, который позычил, не повинен больш платити только десеть коп грошей и то за присегою оного, хто на нем тых пенезей доходит.

Артыкул 26.

О позычках купецских.

Теж купцы мещане жидове не шляхта реистрами, окром записанья до книг або церокграфов, долгов никоторых доходити не могуть. А ведьже хто бы хотел до листов печати прикладати, тогды до всяких листов на заочную просьбу ани теж написанье листов на заочную просьбу печати прикладаны быти не мають, кром устное и очевистое прозбы, маючи певную ведомость, што на тых листех записных будеть написано.

Роздел осмый. О тестаменьтех.

Артыкул 1.

Хто можеть и не можеть о речах своих рухомых тестамент чинити.

Уставуем, иж кождый маеть мети моц о речах своих рухомых тестамент чинити, кром тых парсун нижей описаных, которые парсуны иж подле права не мають ничого вольного, для того тестаментом никому ничого отдати не могуть: наипервей дети лет зуполных не маючие, законники будучи в законе не привильеваном, принемши и потвердившися в законе, сынове з отцем недельные окром речей набытья своего властного або выслуг, бо теж в чужую моц поданые, то ест тот кого бы кому выдано з его статки, шаленые, кацеры, невольники, от розуму отходячие, а ведьже тые, коли к собе прийдуть, моцны тестамент свой чинити, так теж и чти отсужоные не могуть тестаментов чинити.

Артыкул 2.

О тестаментех на речи рухомые на именъя набытые, як мают чинены быти.

Коли бы хто на речы рухомые або на именье набытое хотел тестамент чинити; тогды таковый будь здоров або фор, коли бы только был при доброй памети, моцом будеть речы свое и именье набытое таковое отказовати, кому хочеть так духовным парсунам яко и свецким, призвавшы к тому вряд земский судью подсудка писара каплана, а где бы вряду иети не мог, ино перед трема сведками веры годными можеть тестамент чинити. А коли сам потом умрет, а тую волю свою остатнюю смертью потвердить, хотя бы и печати не приложил; таковый тестамент маеть при моцы зостати, только бы по смерти его не омешкали тестаменту перед нами господарем або перед врядом земским оповедати на рокох першых судовых. Пакли бы хто учиненью тестаменту жив зостал, вольно таковому тестамент свой колько кроть хочеть отменити, а остаточный тых двох тестаментов смертью потвержоный врядовне учиненый в кождого права при моцы зостати маеть. А именье набытое тестаментом яко рухомую реч кождый можеть записати, коли хочеть, нижли хтобы хотел именье набытое на церковь записати маеть тым обычаем: которые кольвек духовные будуть тое именье держати, мають с того именья службу земскую служити конно збройно водле уставы и уфалы земское. И вже от того часу уставуем, хто записал именье на костел, тогды с того именья потомуж маеть быть служба, яко и первей бывало. А а ведже тые сведки, которые при справованью тестаментов бывають, мають в собе слова, которые слышать от того, хто тестамент чинить, правдиве до тестаменту казати вписовати и выразити значне без кождого охиленья, теж и тот, хто тестамент чинить, маеть меновите кождую реч у тестаменте докладати.

Артыкул 3.

О сведках, которые мають быти при справованью тестаментов.

Теж уставуем, при тестаменте мають быти три сведки веры годных и неподойзреных, про то тые сведки нижей менованые быти не мають: наипервей тые, которые тестаментов своих чынити не годни, теж невесты и екзекуторове або опекунове того тестаменту, так теж и тые, которым в том тестаменте што будеть описано. А ведже если бы ся приходило кому тестамент на войне и в дорозе и в дому а у пригоде, або не могли бы трех сведков мети; тогды колко можеть быти, только бы веры годни, а при таковых можеть тестамент чынен быти, нижли скоро по вчыненью маеть тот тестамент объявлен быти перед нами господарем або перед судом земским на первых рокох судовых, а на войне перед гетманом альбо хоружым поветовым, а тые сведки присегою своею мають тот тестамент потвердити. А трафит ли ся таковый тестамент чынити в чужия земли; тогды тестамент маеть быти объявен перед тым врядом, где ся пригодить, а приехавшы до того панства и вказавшы от оного вряду выпис, предсе маеть перед врядом земским оповедати, яко вышей описано.

Артыкул 4.

Ни хто не можеть невольнику своему ничого записати, вольным не вчынившы.

Уставуем, иж кождый якого кольвек стану невольнику своему, не вчинившы его на перед вольным, ничого тестаментом записати не может, абы его первей вольным учинил. А ведьже тестаментом иж каждым листом явным может невольника своего вольным учынити, а учинившы, тым же тестаментом можеть ему што рухомого водле воли своее записати.

Артыкул 5.

Кождый слуга путный и мещанин мгъст неупривилъеваных, и теж человек простый як мает тестамент чынити.

Уставуем, иж кождый с таковых людей волен тестамент чынити о речы свое рухомые и описати третюю часть маетности своее всее кому хочеть, а две части тых же рухомых речей маеть зоставити дитяти в дому своем, для отслугованя с тое земли свое, на которой седить; а не будеть ли мети детей ино предсе тые две части маетности его маеть зостати в дому его ку службе оного пана, на чыей земли седить. А естли бы дети будучи вольные, а хотели проч пойти, тогды тую две части маетности вземшы мають пойти проч, только землю мають пану своему подати и с жытом засеяным и с хоромами с тым всим, с чым будеть тую землю пана своего на службу взял.

Артыкул 6.

Если бы тестамент в чом не был достаточне справован.

Коли бы в котором тестаменте яким незначным або яким закрытым письмом который артыкул в нем был написан, або теж на местцу значном або на дате было скробано, тогды таковый тестамент маеть быти никчемный; а где бы на местцу мало потребном было скробано не ку шкоде стороне, тогды шкодить не можеть. Так теж хто бы хотел бурить тестамент, а если бы в в одном або в кольку артыкулех был нарушон, а иные вси порядне водле статуту справлены; тогды одным або колько артыкулов всего тестаменту касовать не можеть. Так теж о записех всяких на кождую реч розумено и сужено быти маеть.

Артыкул 7.

Причыны для которое отец сына можеть от именей выделити або отдалити.

Уставуем иж с причин тых, где сын кгвалтовну руку поднесет на родичов, альбо именье за жывота з рук отцовских кгвалтовне отыйметь. Другая кгды значную кривду вчынить родичу, альбо которым обычаем на горло стоит. Третяя кгды сын або девка правне не для Речы Посполитое а зе злостью або з ненависти стоит на горло родичу або матце. Четвертая кгды час потребы рукоемства, або взятья з везенья, ку постановенью своей руки на рок в речы, кгды идет о горло отцу або которому кольвек, реч отмовял або зборонялсе взяти. Пятая кгды девка нерядные учынки чынить, чыстость свою ображаючы, а родичы малженства и вена ее не забороняли, а в той нерядности перед леты двадцатма и петма в малженство не пошла, а нерядности своее уживати хотела; тогды родичове могут от именья выдедичыть, а то для того, аж их послушна быть и в малженство пойти не хотела. Шестая кгды родичов опущают взешстью розумов их. Семая коли бы родичов в неприятельских руках будучых окупити або чым иншым вызволити не хотели, маючы именье и маетность в руках своих. Осмая кгды упорне кацерства не следують, або ку вере хрестиянской пристать не хотят. А ведже и за тыми причынами первей жадных записом а ни тестаментом выдедичити не можеть, иж бы тые причыны або которою з них перед врядом оповедал и до книг записал.

Артыкул 8.

О человеку слепом.

Если бы се теж пригодило человеку слепому тестамент чынити, таковый при тестаменте своем маеть мет осм сведков а не мней, при таковых сведкох тестамент подле права справованый маеть быти и за слушный принят.

© Валерый Пазднякоў, 2010, 2015

Надрукавать Надрукаваць без ілюстрацый
Дадаць меркаванне