Дакументы: Статут Вялікага Княства Літоўскага 1566 г. Раздзелы 12, 13
Статут Вялікага Княства Літоўскага 1566 г. Раздзелы 12, 13.
Роздел дванадацтый. О головщызнах и навезках людей посполитых.
Артыкул 1.
О головщинах и навезках людей простого стану.
Головщызна панцерному слузе пятдесят коп грошей, путному слузе тридцать коп грошей, бортнику двадцать пять коп грошей, тяглому двадцать коп грошей, паробку десеть коп грошей, а жонам их совито. А навезка панцерному слузе шесть рублей грошей, бортнику два рубли грошей, тяглому рубль грошей, паробку полтина грошей, а жонам их совито, а жонца, которая мужа не маеть и не мела, полтина грошей.
Артыкул 2.
Головщизны и навезки тивуном, ключником, войтом, старцом, лавником сельским.
Тивуну, ключнику, войту, старцу головщизна сорок коп грошей, естьли бы невольник в котором с тых врядов был, тогды ему во вряде головщизны двадцать коп грошей, а навезки рубль грошей. А пакли бы в ключох або у войтовстве которий шляхтич был; таковому предсе головщизна маеть быти водле стану шляхецского. А навезка тивуну, ключнику, войту, старцу по три рубли грошей, а лавнику два рубли грошей.
Артыкул 3.
Головщизна ремесным людем.
Золотару, органисте, пушкару, гафтару, малерови, сокольнику, машталору, кравцу, гафтарце, коверникутым всим головщизна по тридцати коп грошей, а навезки по три рубли грошей, а жонам их совито. Дойлиде, ковалю, столяру, псарцу, возницы, мулеру, шевцу, гончару тым всим головщизны по двадцати коп грошей, а навезки три рубли грошей, а жонам их совито. Потомуж и иншых ремесником, которых тут не написано, маеть быти плачоно яко дойлиде и жонам их совито.
Артыкул 4.
О ношенью жидовском.
Жидове в коштовных шатах з ланцуги золотыми сами и жоны их в золоте и в серебре, так теж и сребра на пасах и на кордах носити не мають; але убер их маеть быти значный: шапки або бирет жолтый, так теж и завиванья белых голов полотно жолтое, або тому подобное, иж бы знак и певное розознанье было християнина от жида.
Артыкул 5.
Жид, татарин и кождыи бесурмянин на вряд преложон и хрестиян в неволи мети не мает.
Уставуем, иж от того часу мети хочем, абы жид, татарин и кождый бесурмянин на достоенство а ни на который вряд от нас господаря а ни от панов рад наших преложон не был и хрестиян в неволи не мел. А естьли бы который з них християнина купил у вечную неволю; таковый пенези тратит, а тот хрестиянин маеть быти волен. А естьлибы хлопа або жонку закупил, тогды маеть прийти перед вряд и в чом закупил, або теж и з суда в заплате яко будеть выдан, до книг записати; и будеть ли сума невеликая, тогды тот закуп и закупня за сем лет с тых пенязей маеть выробитися, а кгды бы сума великая была, ино с тых пенязей на кождый год выпуску маеть быти хлопу полтину грошей а жонце пол-копы грошей. Нижли маючи таковых закупов и детей их в жидовство а ни в бесурмянство намовляти а ни обрезовати не мають, а который бы смел то вчинити, а было бы то на него переведено перед врядом; тогды без кождого милосердья таковый огнем маеть быти каран, чого вряд наш с пильностью стеречи и о том выведоватися достаточне маеть. А мамками християнки у детей жидовских и теж кождых детей бесурмянских быти не мають; а хтобы хрестиянок ку тому приневолял, а то бы слушне ведле права на него было переведено, таковый горлом маеть быти каран. Тым же обычаем хотя бысмы которому татарину або жиду або которому бесурмянину двор наш або именье з людьми дали; таковые мають се жидове и бесурменин на выслугах своих против християнских людей як выступных так и тяглых заховати, абы их ку подачком и службам незвыклым не приневоляли. А пакли бы тые люди наши за таковым зневоленьем проч отошли и засели на землях наших або князких панских и шляхецских; таковых за вольных мети хочем, нижли земли их мають зостати при таковых, кому дано водле данины нашое.
Артыкул 6.
Навезка татаром.
Уставуем, которые князи и мурзы татарове закону бесурмянского мають оселости именья земские з наданья продков наших и нас самых, и естли тые бывають на службах наших господарских и земских и в ротах, або при гетманех наших, и в реестрах военных суть написаны; таковым навезка маеть быти яко шляхтичу, а жонам их совито, а головщизны сто коп грошей кром седенья. А которые татарове формином ся жывять, и огородные речы справують, быдлом торгують, кожы дубять, и якими кольвек речами жывность собе заробляють; таковым навезки рубль грошей, а жонам их совито, а головщизна дванадцать коп грошей.
Артыкул 7.
Человек вольный за жаден выступок в неволю выдан быти не мает.
Теж уставуем, иж человек волный за жадный выступок в неволю вечную выдан быти не маеть, а естли бы в суме великой выдан был; маеть с тое сумы выроблятися, и выпуску на каждый год мужику полтина, а жонце пол-копы грошей. А естьлибы с тое сумы до смерти выслужитися не мог, а будет ли мети дети; тогды дети не мають се с тое сумы выробляти. А выпуску дорослым детем потомуж маеть быти, яко вышей описано. А закупным людем тым же обычаем из сумы пенежное выпусть быти маеть.
Артыкул 8.
О человеку отчизном.
Кгды бы который человек отчизный, отшедши от пана своего и заложившися за кого иншого, не далеко в пети або в десети милях мешкал; тогды вже о такового человека вечне молчати маеть. Пакли бы тот человек отчизный отшедшы от пана своего и мешкал далеко в колькодесяти милях, а пан его о нем не ведал, а по том бы засе пришол и перемешкивал поблизу; тогды хотябы в оном часе и давность земская зашла, вольно будеть ему того человека за отчича правом доходити, только бы давности не омешкал от того часу, як ближей прийдет.
Артыкул 9.
Хто бы на человека вольного и невольного права доходити не хотел.
Теж еслибы который человек не похажалый або челядин невольный за кого зашол, а поведился быти вольным, а он пан, чий человек або челядин, просил у в оного пана права, а тот пан ему на него права дати не хотел; тогды таковый маеть притягнен быти ку праву земскому. А естьли тот пан, чий человек непохожий або челядин, зыщет правом иж его отчич або невольник, а на оного пана, в кого тот человек, переведет правом, иж в него просил справедливости раз и два, а он не дал; тогды тот пан маеть навезати оного человека або челядина от того часу, як в него права просил, за кождую неделю по шести грошей, а естли бы втек, тогды маеть платити потому, яко вышей о головщизнах написано.
Артыкул 10.
О челядь невольную, которая втечеть от пана своего.
Уставуем, кгды бы хто чию челядь невольную вывел, або ведаючи заказ в себе переховывал, а то бы на него правом было переведено; тогды таковый повинен будеть ту челядь отъискати, а одыскавши тому пану отдати. А где бы не мог одыскати, або не хотел; будеть повинен тую челяд сам ценою платити, яко выше написано, и шкоду оправити от того часу, от которого ему тая челядь не робила, мужику и жонце за кождую неделю по шести грошей.
Артыкул 11.
О вольных людех, которые в голод продають.
Хто бы в голод сам себе або сына або теж которого человека вольного в неволю продал, и лист на то дал; таковый лист не маеть быти держан, але яко голод минеть, а он пенезей добудеть, маеть ему пенези отдати. Нижли естли бы хто челядь свою неволную продал; тая ведле продажи маеть вечне держана быти.
Артыкул 12.
Хто бы в голод челядь свою выгнал.
Теж уставуем, естьли бы хто в голод челядь свою неволную выгнал або выбил з дому своего проч, не хотечи ее кормити и переховывати; таковые вжо не мають быти невольными, але вольными. А ведьже тым обычаем, иж коли тую челядь выбьеть, тогды се они оповедати мають врядником в повете або вряду местскому бурмистром або мещаном, иж их выбил а кормити не хотел; а тые, которим се оповедають, мають обослати того пана, чия челядь, естьли зознаеть, же для голоду выгнал их из дому не хотечи кормити, тогды оная челядь вечне маеть быти вольна.
Артыкул 13.
Невольницы мають быти трояких причин.
Теж уставуем, иж неволницы мають быти трояких причин: первые которые суть здавна в неволи, або з невольных се родят; другие которые полоном заведены суть из земли неприятельское; третие коли бы се сами в неволю поддали, а хто бы, ведаючы жонку неволную, в малженство понял, хотя человек вольный, тогды таковый сам и дети их в неволи быти мають. А естьли бы се неведоме поняли, а один з них будучи вольным не хотел в в том быти; тогды того ж часу мають се втечи до права духовного, ведле которого их мають розвести, а по розводе таковый вольный маеть зостати вольным, а невольный, неволным.
Артыкул 14.
Если бы хто до кого слугу приказал, а тот слуга зашкодивши втек от него проч.
Хто бы кому приказал слугу, а тот слуга шкоду вчинивши тому пану своему втек от него проч; тогды тот, хто его приказал, маеть ку праву стати, а суд маеть ему рок зложити, на которий маеть его доискавшися ку праву поставити. А естьли ж бы тот на оный рок, которий судьи положат, того не постановил; тогды он сам повинен будеть тую шкоду оправити, на чом слушный довод учинен будеть. А естлибы се потом оному пану, за кого слуга втечеть, пригодить ли его видети на торгу або поткаеть в дорозе; тогды вжо он сам не маеть имати, нижли того приказцы своего смотрети маеть. А где бы хто мел слугу не приказного, а он ему шкоду учинивши проч втечеть; тогды он, где кольвек его увидит або поткаеть, маеть его поймати и вести до оного права где поймаеть, а перед правом маеть на нем шкод своих до доходити.
Роздел третийнадъцать. О грабежох и навезках.
Артыкул 1.
О грабенье стада свирепъего.
Уставуем, естлибы хто пограбил на яком колвек кгрунте стадо свирепъе князское, панское, земянское, а держачи стадо жеребца або свирепу и колко их уморил або охромил; таковый за жеребца князского панского земянского повинен будеть заплатити осм коп грошей, а за свирепу чотыри копы грошей, нижли за кождого с тых жеребцов будеть ли торгуючы што давано, тогды тую уену будеть повинен платити за слушным доводом.
Артыкул 2.
Яким обычаем мають се заховати о испаш и о грабеж на испашах.
Теж уставуем, иж нихто стада свирепьего на дедизне чужой на испашах так теж и на своей власной займовати не мають, ани в грабеж брати, а хто бы на чией дедизне стадо занял або грабеж учинил; таковый маеть тому кгвалт заплатити дванадцать рублей грошей и шкоду оправити, а што бы се тому стаду стало, подле уфалы вышей описаное. Бо не маеть за испаш стада брати, бы и застал на испаши, але маеть осветчивши суседови отогнать, до того пана, чие стадо есть, и испаш маеть обвести людьми добрыми сторонними; тогды тот повинен испаш заплатити, чие стадо шкоду вчинило. А ведьже вызволяем одно стадо свирепье, абы на испаши не было займовано, а быдло кони волы и коровы свинье и гуси на испаши мають быти займованы подле обычаю, и скоро занявши маеть обослати того пана, чие быдло свое на поруку взял, а о испаш на купу шол; и што купа на испаши шкоды присудит, тот пан чие быдло занято, маеть платити. А где бы на обосланье того, кому се испаш стала, быдла своего на поруку взяти и на купу ити не хотел; тогды тот, хто займет, маеть быти з людьми добрими сторонними, и што тая мсторона шкоды окупують, он маеть в той шкоде своей оставити того быдла только, што бы за его шкоду стояло, а досталь отослати до того пана чие быдло. Нижли стадо свирепье кони и кождое быдло только до светого Юрья без пастуха маеть вольно ходити, а по светом Юрьи в тыж день кождый маеть около добытку своего сторожу або пастуха мети, через все лето аж до первого дня месяца Октебра. А давность отправе за испашь не маеть дальшая быти только подле стародавного звычаю до Божъего нароженья. И хтобы о испаш присужоною, не хотечи платити подле права, дал се позвати; тогды с права, достанет ли винен, маеть совито заплатити.
Артыкул 3.
Хтобы под шляхтичом або под шляхтянкою грабеж учинил.
Теж уставуем, хтобы под шляхтичом або под шляхтянкою грабеж вчинил, кони побрал при костеле на торгу або на поли, где ж кольвек бы, теж бою не вчинил, або под слугою коня взял, або з воза выпряг, хотя бы оная особа при том не была, а был бы на то перед врядом слушный довод; таковый оный, который грабеж учинил, маеть такового навезати и шкоды, если будут при том грабежи вчинено, за доводом оправити.
Артыкул 4.
О грабеж коня князского, панского и шляхецского.
Теж князского панского, шляхецского коня из кождого грабежу безправного вызволяем. А естли бы хто без права князя або пана и шляхтича, хотя в небытности его, коня пограбил; таковый маеть коня конем навезати.
Артыкул 5.
Яко челядь невольная втеклая маеть быти заповедана.
Если бы чия челядь невольная втекла, а заповедана бы з якого перейму, и женучи за нею в погоню в кого ее нашол; тогды маеть тому, в кого челядь зостанет, переем дати, с чого будеть первей заповедал. А естьли бы заповеди и перейму, в кого оную челядь нашол, недал, а тот бы ему не хотел тое челяди без перейму выдати, и взял позем кгвалтом, а до права о то был позван; тогды тот за тым позвом повинен будеть стороне жалобливой платити яко за кгвалт дванадцать рублей грошей. А естли бы хто чию челядь в себе ховал, а тот по колко кроть заповеди и по торгу закликал, оповедаючы ее, и потом бы тот, чия челядь, в колко неделях тую челядь свою в него нашол; тогды только маеть, за страву ему от кождого челядника на неделю по два гроши давши, челядь свою добровольне взяти.
Артыкул 6.
О грабеж человека князского, панского и земянского.
Уставуем, естли бы шляхтич чиих людей пограбил на торгу при церкви на добровольной дорозе; таковый маеть стороне обжалованой вины заплатити шесть рублей грошей, а грабеж з навезкою отдати, то ест коня конем вола волом навезати. А пакли бы шляхтич або хтож кольвек пограбил у чиих людей на поли або где индей, а бою не вчинил; тогды маеть заплатити три рубли грошей, а грабеж также навезати. А мужик мужика естли бы при костеле або на торгу на дорозе пограбил; маеть заплатити три рубли грошей, а грабеж всякий также з навезкою платити маеть, коня конем, вола волом, а корову коровою, и кождое быдло, якое пограбил, таковым навезавши маеть отдати, або ценою заплатити, яко нижей описано.
Артыкул 7.
Цена конем рабочим.
За коня або за свирепу робочую копа грошей, а за третека жеребка от робочих свиреп копа грошей, а за третячку свирепу полтина грошей, за лонское жеребя пол-копы грошей, за летошнее двадцать грошей.
Артыкул 8.
Цена быдлу малому и великому.
За вола осмдесят грошей, за вола стадника осмдесят грошей, за корову петдесят грошей, зо яловицу сорок грошей, и за быка неука сорок грошей, за телицу пол-копы грошей, за теля лонское двадцать грошей, а за теля сеголетнее дванадцать грошей, за вепра кормного пятдесят грошей, за вепра некормного пол-копы грошей, за кнороза сорок грошей, за свинью двадцать грошей, за подсвинка десеть грошей, за порося пять грошей, за овцу петнадцать грошей, за барана дванадцать грошей, за скопца барана двадцать грошей, за ягня пять грошей, за козла пол-копы грошей, за козу двадцать грошей, за козеня пять грошей.
Артыкул 9.
Цена птахом домовым.
Гусь три гроши, каплун шесть грошей, курица пол-тора грошей, утка два гроши, селезень грош, голуб грош, утка круговая шость рублей грошей, пава або пав три копе грошей, лебедь домовый три копы грошей.
Артыкул 10.
Цена птахом на мысливство хованым.
Кречот красный дванадцать рублей грошей, за белого кречота десеть рублей грошей, серый кречот шесть рублей грошей, сокол шесть рублей грошей, а ястреб великий три рубли грошей, болобан два рубли грошей, за рабца або за кгрокгулца рубль грошей, за дремлюга пятдесят грошей.
Артыкул 11.
Цена збожъю.
Пшеница копа петнадцать грошей, жита копа дванадцать грошей, ярицы копа десеть грошей, ечменю копа осм грошей, овса копа шесть грошей, гречки копа пять грошей, гороху копа шесть грошей, проса копа чотыри гроши, илну копа дванадцать грошей, репы бочка пять грошей.
Артыкул 12.
Цена собаком.
За пса домового брехуна три рубли грошей, за наследника и за набрехника зверинного шесть рублей грошей, за окгара три копы грошей, за узлайника три копы грошей, за выжла три копы грошей, за щайку под ястреба три копы грошей, за по дстрелного три рубли грошей, за пса обсочного шесть рублей грошей, за меделянского пса шесть рублей грошей, за хорта подсокольего шесть рублей грошей.
Артыкул 13.
Если бы кого пес непривязаный укусил.
Уставуем, кгды бы кого пес непривязаный уел с чиего прищванья, а он бы ставши за позваньем перед урядом к тому прищванью се не знал; таковому маеть суд сказати отприсегнутися, иж того не вчинил, а где бы присегнути не хотел, тогды, жалобливая сторона кгды его в том поприсягнет, повинен его будеть навезати ведле стану его, якобы его сам ранил рукою своею. Пакли ж бы хто кому пса умыслне а не от руки забил або застрелил; таковый будеть оного пса повинен платити водле цены вышей описаное, естли бы его забил от руки кием або якою бронею не пометом а ни стрелбою, таковый не повинен будеть ничого платити.
Артыкул 14.
Которое бы быдля або пес в суседстве шкоду чинил.
Уставуем, естли бы в кого пес домовый або быдля якую шкоду в околицы чинил, а тот домовый господарь о том ведаючы оного быдляти стеречи а пса на привези мети не хотел; тогды таковый будеть повинен всю шкоду в суседстве платити и оправовати, на што слушный довод уделан быти маеть.
© Валерый Пазднякоў, 2010, 2015
Надрукавать Надрукаваць без ілюстрацыйДадаць меркаванне
