Дакументы: Статут Вялікага Княства Літоўскага 1566 г. Фармуляры актаў

Статут Вялікага Княства Літоўскага 1566 г. Фармуляры актаў.

Даровизна речей рухомых от мужа жоне правом дожывотным.

Я Н. зезнавам тым моим листом добровольным записом всим вобец, кому бы о том ведати належало, тепер и на потом завжды, иж я дознавшы против себе хути и уприймость и милость и зычливость малжонки мое милое, урожоное панеи Н. хотечи ей то заемною милостью и зычливостью нагородить, з уприймой милости мои ку ней малженскей, нынешним записом моим записую доживотье на маетности моей дедичной, в повете Н. лежачый в селе Н. и всех ее принадлежностях, таким способом: иж она помененая малжонка моя милая тые вышъменованые добра, так яко се в собе мають, зо всими их доходами и приналежностями, поддаными, ставами, млынами, корчмами и згола зо всим тым, яко сам тепер уживам, обнявшы, без вшелякое перешкоды и импедыменту близких кровных и повинных моих, спокойне аж до остатнего кресу живота моего держать уживать маеть. До того той же малжонце моей милой по животе маоем даю даруе и тым листом добровольным записом моим на вечность записую вси речи мои рухомые, то ест: золото, сребро, пенези готовые на именье уданые и мне яким кольвек правом служачое, перла, шаты, коберцы, кони ездные, возники, стада быдла рогатое и не рогатое малое и великое, цын, медь и увесь спрят домовый, што се тылько речъю рухомою назвать и меновать може, все посполитостью завираючы, што тепер з ласки Божое маю, и што еще з нею мешкаючы прибавлю, прикуплю, и яким кольвек способом набуду, отдаляючи от того всих близких кревных и повинных моих, вольно теды есть и буде помененая пани малжонка моя милая от даты того запису моего тое маетности вышей менованое в спокойным держанью, яко вышей, аж до остатнего кресу живота своего тримать. А по смерти моей тые вси речи мои рухомые, от мала до велика, што се едно кольвек по животе моем зостане, через мене ей нынешним записом моим вечне дарованое, взять, держать, и оных ку потребе своей уживать и оборочать, кому хотечы отдать, даровать, продать, записать, и яко хотечы по воли своей шафовать. В чым помененой малжонце моей милой по животе моем нихто з братьи сестр близких кревных и повиниых моих о тые речи рухомые, през мене ей по животе моем вечне дарованые и записаные, жадное трудности правное задавать и оное импедиовати не мають под закладом.

Способ запису замены добр.

Ставши обличне перед судом шляхетный Н. дедич Н. з одное стороны, и шляхетный. Н. з другое стороны, здоровый на умысле и на теле и при добром розуме будучы, явне и през вызнанье свое вызнали, иж межи собою учинили добр дедичных вечною и неодзовною замену, давшы собе з обо полные добра за добра, земли за земли. Так, иж преречоный Н. дал и заменил добра свои дедичные, то ест весь Н. зо всим тое вси дедицством и зо всим правом панством властностью и титилом дедичным, Н. з Н. Который Н. за его добра дедичные, то ест весь Н. преречона, также теж зо всим дедицством тые вси дал и заменил зо всим правом панством и властностью и титулом дедичным, так иж преречоный Н. преречоне добра Н. то есть весь Н. з своими потомкаии будеть держал мел обычаем дедичным, посяде так широко довго и в круг, яко преречоные добра або дедиуство, преречоные вси Н. в своих границах з стародавна ест розделено и ограничено зо всим и каждому зособна, пожитки которие з стародавна к тому Н. дедицству приналежали и зо всими, ничого не вымуючи, присеглостями. И также преречоный Н. преречоные добра свои, то ест весь Н. зо всими тое вси Н. дедичством, зо всим правом панством и властностью и титулом дедичным, зо всими потомками своими, буде держал мел и в дедизне, осяде так широко довго и в круг, яко речоные добра або дедицство вси Н. в своих границах и межах з стародавна ест розделено и розграничоно, и также веспол зо всими и каждему зособна пожитками и прилеглостями, которие з стародавна ку маетности Н. приналежит, ничого не выймуючы. И юж тые преречоные замену чынечые дали собе зобополне в преречоные добра так одмененые истотные и в везанье и речоное держанье през возные земские, будучи повинни и обовязани сполне собе и потомки свои взглядом преречоных добр так замененых боронить, шчитити, и зобополне се высвобожать, и в спокоях от всих правных трудностей и першых обовязков записов позвов занесеных, и которые занесены быть мають зысков, презысков которих кольвек, и все замыкаючы от вшелякого пренагабанья правного, и от всих особ стану обое плоти през давности земские, яко на кототорой особе давность належит, под шкодами земскими або закладом ста гривен пенезей монеты польское. О которые шкоды або заклад один от другого взглядом преречоное обороны позваное и потомкве его позвани до суду земского Е. або замкового Н. на першом року яко завитым стать обличне, и занехавши всих вымовок зволок, с которое кольвек причины, або теж квитов, которие с права звыкли быти давани и позволяны, и всих инных правных зволок, и также рушенья судьи отповедать, и от суду не отходечи декретови судовому быти послушон, то ест заступить, и о вси сужоные речи досыть учинить буде повинен, и потомкове его будуть повинни тыле кроть, иле кроть им нихто потомком будеть потреба.

Муж жоне, жона мужови сполне доживотье учинить тым способом.

Ставши обличне перед судом шляхетный Н. одтул аж дотуль, и также шляхетная Н. малжонкове, здоровы на умысле и на теле, уживши приятельское рады, явне и меновите вызнали, иж всих добр своих дедичных и заставных рухомых и нерухомых, которие тепер маю и по тым мети буду, зобополне и сполечне позволили собе уживанье до часу живота своего таким обычаем. Иж если бы преречоному Н. первей, нижли преречоной Н. придалосе умерть; теды она Н. вси добра так рухомые яко нерухомые преречоного Н будеть тримать, и оные посяде зо всим правом панством властностью, ничого не выймуючы, и будеть их уживать аж до часу живота своего. А по смерти преречоной Н. добра преречоные так рухомые яко не рухомые цале зуполным правом на потомки преречоного Н вернесе, без вшелякое переказы и спору потомков преречоное Н. И также где бы се преречоной Н. придало первей умерть нижли самому; и теды преречоный Н. добра вси так рухомые яко и нерухомые преречоной Н. будеть держать, и посяде зо всим правом властностью зо всими ку тым добром речами приналежными, и буде их уживать до часу тылько живота своего. А по смерти преречоного Н. добра преречоные, которие кольвек оной Н. приналежали, на потомки преречоное Н. цале вернут се, без вшелякое переказы и спору преречоного негды мужа потомков.

Запис от мужа жоне на суму.

Я Н. одступившы свое властное собе потомком и добрам моим належное юрысдыцый, а под той лист добровольный запис мой собе самого потомки и добра мои вси лежачые рухомые и сумы пенезей добровольне поддавшы, зезнавам тым листом добровольным записом моим, кому бы то ведать належало тепер и на потом завжды, иж зосталом винен урожоной ей милости паней Н. малжонце моей истотней сумы пенезей Н. на долгу позычоного, в каждый золотой по 30 грошей польских личечи, которое сумы пенезей, абы так при животе яко и по животе моем, оная малжонка моя Н. певна тылько на всих добрах и маетностях моих лежачых рухомых дедичных и набытых, сумах пенежных и на маетностях, в сумах обычаем зоставным заведеных, так тут Н. и где кольвек будучых, тепер през мене маючих, и на потом за ласкою Божею набытых и приспособеных, на всих огулом, жадных не выймуючы а ни зоставуючы, записую, и утверждаю, и зараз в моц держанье и уживанье подаю и поступую. Волно ест и будеть помененая пани малжонка моя тых добр, которие тепер маю и на потом мети буду, от даты того листу моего, так при животе посполу зо мною, яко и по животе моем зоставившысе, держать, и того всего яко властности свое аж до отданья тое сумы пенезей Н. зол. поль. уживаю, (sic) кром жадное перешкоды од мене самого. А по смерти моей дети близкие кревные и повинные мои, не отдавши помененой еи иилости пани малжонце моей, албо тому кому бы то она з великое милости свое тую суму пенезей Н. зол. польск. отдала албо даровала, и кому бы то от нее и по ней належало, в тые добра по мне зосталые уступовать. И никоторое переказы и трудности ей и держачему тых добр задавать не маю и мочи не буду, и о вшем от кождого такового, хтобы трудность якую задавал, все огулом замыкаючы од вшелякого пренагабанья правного, и от всих особ я сам а по мне потомкове мои боронить и заступовать, не выймуючи, своим властным коштом и накладом.

От того ж той же на доживотье.

Я Н. зезнавам тым листом добровольным записом моим, кому о том ведать належало тепер и на топом завжды, иж я не будучи до того ни от кого примушоный а ни намовленый, але сам з доброе воли мое, а за радою их милости п.п. приятелей моих и з милости моей малженское доживотье на добрах моих лежачих и рухомых, в Н. на Н. и где кольвек будучих, и сумах пенежных где кольвек и у кого кольвек будь на заставах, будь за записами, и яким кольвек способом през мене маючых и держачих, и речах всих рухомых: золото, сребро, клейнотах, шатах, рыштунках, конех, стадо, быдло, цын, медь, збожъю озимным ярим, так в гумнах зложоным, яко и на полю засееным и всим, што бы едно речъю рухомою названо и выражоно быть могло, жадное и наменшое речы не выймуючы, ей милости панеи Н. малжонце моей записую таким способом. Иж естли бы Пан Бог вперед на мене смерть допустить рачыл; мае и вольна буде преречоная пани малжонка моя милая по смерти моей добр моих лежачих и рухомых, ойчистых и материстых, спадковых тепер, и на потом по ком кольвек на мене припадаючых, и набытых, также сум пенежных, где кольвек будь на заставах альбо за записами мне служачых, и всих речей рухомых, золота, сребра, клейнотов, шат, рыштунков, кони, стада быдла, цыну, меди, збожъя озимнего и ярего, так в гумнах зложоного, яко и на полях засеяного, и всего што бы едно речъю рухомою назвать и выразить се могло, жадное и намнейшей рече не выймуючи, спокойне держать и уживать и оными вольно шафовать аж до остатнего кресу живота своего, без жадное перешкоды в спокойном держанью и уживанью того всего помененой пришлой малжонце моей милой, и трудности правное задаванья от потомков моих. А по смерти ее, теды тое зась иаеть вернуть на потомки мои.

Запис на вечистую продажу.

Я Н. дедич, я Н. зезнавам и ознаймуе листом добровольным записом моим всим вобец и каждому зособна, кому то ведать належало тепер и на потом завжды. Иж я маючи вольность, с права посполитого и статуту земского, добрами и маетностями своими ведлуг воли и уподобанья своего шафовать, ку доброму и пожитечному своему оборочать, теды маетность мою ойчистую фолварки село Н. в воеводстве Н. повете Н. лежачое, з двором з людми з боярами поддаными осядлыми, подворишными огородниками и подсуседками, з их повинностями работами подводами чыншами подачками пенежными медовыми и осыпными, з кгрунтами з землями тамошними пашными и не пашными, з полями з сеножатьми з пущами борами лесами дубровами гаями, запустами зарослами вшелякими, садами пасеками з бортями , з деревом бортным и зо бчелами и без пчол, з ловы звериными пташими и бобровыми гоны, з потоками реками речками болотами, с ставищами з ставами з млынами, рудами озерами сажалками, корчмами мытами гребельными и мостовыми, и вшелякими пожитками и приналежностями, так яко се тая маетность село Н. сама в себе в кгрунтах пожитках при належностях и обходех своих здавна мела и тепер маеть и завирает, ничого на себе малжонки потомки кревные и повинные мои не зоставуючы а ни выймуючы, так иж менованый не менованому а менованый менованому шкодити не маеть, все огулом яко мне служило и належало з титулом вечистым предалом, и тым листом доброволным записом моим записалом правом вечистым некгды неотзовным и назад неворочаючимсе урожоному его милости пану Н.Н. за певную готовую суму пенезей, то есть Н. золличбы и монеты польское, хотечи в кождый золотый по 30 грошей польских, которую суму зараз от его милости одобралом. И жоне и его милости тым же записом моим квитую и вольным чиню вечне, в которой маетности Н. Н. позволями допущам зараз его милости пану Н. потомком его милости увезанья и увойстя в вечыстую посесыю през возного и шляхту, которих собе его милост способит. Также вси права листы и записы на тую маетность належачую его милости пану Н.Н. отдать маю, которие на его милость и потомки его милости вливаю, а сам се з них зрекаю вечне. За чим его милост пан Н.Н. и потомство его милости волны тую маетность, помененое село Н. зо всим яко се вышей поменило, спокойне держать уживать розмножать и розшырать, пожытков собе примножать и причинять, любо кому хотечи отдать, даровать, продать, записать, фримарчить, заставить и ведлуг воли и налепшего уподобанья своего яко властностью своею шафовать. А я молжонка и потомкове мои, от даты того запису моего вечистое продажи, в той маетности вышъпомененой в кгрунты пожитки и приналежности в намнейшой их хути уступовать, и жадное трудности перешкоды и пренагабанья правного и неправного в спокойное посесыи его милости сам през себе, малжонку, потомки, кревные повинные близкие и далекие, слуги, подданые и направные особы чинить и задавать не маю и не буду могл. А по мне потомки мои не будуть о вшем от вшеляких и импедиментов правных и неправных з екое кольвек мери от кольвек заходячых, также отправ записов перших и последних ручных и зезнаных, от вен привенков, декретов екзекуцый от каждое особы его милости пана НН. и потомство его милости и кождого тую маетность от его милости держачого, у кождого права суду и уряду и на каждым местцу своим коштом боронити и заступовати, и тые добра очищати и освобожати, и вольными от каждое особы от всих импедиментов и тежаров учинить (так яко бы его милость пан Н. и потомки его милости в той маетности в спокойной посесыи зоставал и жадное трудности и шкод не поносил) маю и повинен буду, а по мне потомкове мои мають и повинни будуть тыле кроть, иле бы того потреба указывала. Што все и каждую реч зособна маю и повинен буду зыстить и выконать, а по мне потомкове мои под закладом Н.Н. зол. пол. и под нагороженьем шкод за тым поднятых, кром вшелякого доводу и присеги голым словом през его милость пана Н. и потомки его милости ошацованых. О который заклад и о шкоды, взглядем каждое не досыть учиненью ее приходячые и припадаючие, и до учиненья досыть тому записови моему добровольного вечистое продажи и кондыцый в нем выражоным, волно буде его милоети пану НН. и потомков его милости мне самого, а по мне потомков моих, позвать до каждого права суду и уряду, хоть ине добром и потомком моим неналежного, кгродского зеиского и трибуналского, в которие кольвек поветы воеводстве, альбо до суду коптурового, которим се я с потомками и добрами моиии вшелякими, отступивши свое власное юрисдицыи воеводства повету суду и уряду, добровольне поддаю и форум там собе, где тылько буде позваный, назначаю. Где за позвом першим, яко на завитым року, ставши противко тому листови добровольному записови моему и его кондыцыям и ликгаментом ничого не мовечи, пленипотентови пленипотенцый стороны поводовое, положенью позву, хотя бы невчесне было, ани позвами ничого не жадаючы, термену ничим не збияючи и борон жадных не вносячы а ни зажываючы до того мужа кладаючисе, послугою его Королевское Милости Речы Посполитое лекгатами до посторонных панств войною ексцептами сеймовым вальными сеймиками поветовыми, вторгненьем до короны неприятеля креста светого и моровым поветрем не вымовляючисе, деляцыи правдивое хоробы свое и умоцованых своих большей справы на муиимерта на виктора не заживаючи, малых лет потомков не щитечисе, иншими припадками не вымовляючисе от декрету суду и уряду оного, до которого буде позваный, не апелюючы, апеляции през припозвы не попираючы, и осведчанья жадного на суд и сторону не чынечы, и вшеляких згола и каждое зособна менованых а неменованых оборон и добродейств правных с права посполитого походячых и з довтепу людского знайденого не заживаючы, и на помоч собе не беручы, заклад и шкоды от суду и уряду оного до которого буде позваный не подходячый его милости пану НН. и потомком его милости и каждому тые добра держачему и о тое правом чинячему, заплатить и его милости винковать и добра очищать и весь тежар справы, от кого колвек взглядом тое маетности и ее приналежности, его милости пану НН. або потомком его милости и каждому от его милости держачему, жадное на себе взять и за раз за их милость респендовать маю и повинен буду, а по мне потомкове мои будуть повинни. Где бым теж будучи позваный о которую кольвек реч в том записе моем выражоно до права не стал, або ставши в том се не усправедливил и дал бым на себе право перевести; теды тое все, што буде позван, на мене на потомках моих и на добрах моих не порядком статувым але разом всказано и присужоно быть маеть, а суд або вряд вшеляких екзекуцый на мене и добрах моих за реч осужоную ведлуг права уживати буде повинен. Которие кгды бым сам альбо през кого кольвек заборонил; теды суд одослать мене маеть на дальшую якзекуцыю, то ест на баницыю до суду головного трибуналю Любельского, на воеводство которое кольвек, Киевское, Волынское и Браславское, и в который кольвек повет Луцкий, Влодимерский або Кременский, любо на консерваты тых воеводств напервей припадаючих. За которим одосланьем процесу правного през злое отриманье и присегу на неведомость зносити не маем и не буду могл, и от суду ми тое позволено быти не маеть; але баницыя за спротивненье се праву посполитому на мене през суд головный трибунальский, хоч без бытности стороны поводовое, всказана и публикована быть маеть, по которой баницыи моцная экзекуцыя и за тую суму заклад шкоды и презыски всказанье на мене потомках и добрах моих вшеляких лежачых и рухомых и сумах пенежных, которые тым листом добровольным записом моим онарую през суд и уряд належный одправа его милости пану НН. або потомству его милости або кому бы то право от его милости належало, теж моцно учинено быть маеть. При которой отправе если бы се якие шкоды кому кольвек стали, буд крови розленья або забойство, того так на стороне яко и на вряде правным и ни яким способом доходить не маю и потомкове мои не будуть, и о вшем зо всего квитовать, кгды бы того потреба была, маю а по мне потомкове мои мають и будуть повинни. А где бы теж за противным всказаньем судовым пришло его милости пану Н.Н. и потомком его милости, албо держачему добра мои и кождому той запис мой маючему в декрету аппелевать; теды тая апеляцыя яко стороне поводовой от кождого суду на воеводство Киевское Волынское и Браславское, або на консерваты тых воеводств наипервей пропадаючих, для прудшое справедливости допущона быть маеть. Которому то листови записови моему добровольному вечистое продажи и всим его кондыцыям и ликгаментам досыть чинить маю и повинен буду с потомками моими тыле кроть.

Даровизна вечистая сум записаных и речей рухомых от мати детем.

Я НН. одступивши свое власное належное юрыздыцыи права и повету, а теперешнему записови моему доброволному и всим его кондыцыям с добрами и потомками моими подаючисе, сознавамы и ознаймуе тым листом записом моим добровольным вливковым кому о том ведать належы теперь и на потом завжды. Иж я маючи часто молестоване от малжонка моего теперешнего его милости пана Н. а бым вси суммы добра и права мои, которыи кольвек мне належать, на его милость влила, забегаючи я теды тому абым потомком моим милым пану Н. сынови и панне НН. цорце вси суммы и добра мои вцале зоставила, суммы мои вси и вшелякие где кольвек яким кольвек способом и правом лене належачым, то ест перше сумму Н. которую маю записаную от зошлого урожоного его милости пана НН. малжонка моего, на дворе фальварву и селе Н. дожывотье собе зоставивши; другую суму которую маю НН. прыселку до Н. належачым; третее которий ми винен НН. Н которую ми винен на листы записы свои добровольные водлуг права справеные, о чим шырей од остатнего запису помененые, в собе обмовляе тые иншые всы сумы огулом добра лежачые милуючи дети мои, которыем мела о зешлым урожоным его милостью паном Н. даю дарую и на сына моего пана Н. вливам. Также томуж сынови моему На. Н перше суму Н зол. пол. а особливе другую суму Н. которую На. Н. от пана Н. за вливком права належачого. зол. поль. которую ми винен ННН. 4-х суму, которую мне винен НН. тое сынови моему вечне даю и на его вливаю, до того теж сынови моему пану НН. кони стадо быдло вшелякие цын медь, и што кольвек речъю рухомою нижей быть названо, даю дарую и не выймуючы, ани зоставляючи записую вечне. А цорце моей, панне НН, тую суму Н зол. пол. которую маю от малжонка маего пана Н. даровано з маетности НН. учтивой, даю дарую и на цорцу мою вливаю место посагу таким еднак зпособом, же бы тых Н. зол. от отца своего тестаментом ей записаных у брата своего а сына моего, пана Н. не брала и оного первей урядовне квитовала. А где бы се цорца моя панна НН. упоминала Н. зол. пол. з отчызны от отца ей записаных; теды тылько ей сумы Н. мне записаное половину пан НН. сын мой маеть дать сестре своей, а цорце моей, а половину тую другую Н. зол. при собе доставити, абы сполна Н. выносила сума посагу цорце моей НН. особливе в золоте , в сребре, в штуках, в клейнотах, шатах; то я сама повинна дать цорце моей, зоставиши собе однак того всего так сум яко и речей рухомых доживотное уживанье. А естли бы, стережи Боже, сын мой пан Н. без потомне с того света зышол, на панне НН. цорце моей вливам и ступуе, сама се з них вызуваючысе и вырекаючысе на особу их цедую. Мають и волны будуть помененые потомкове мои, и меновите сын мой, вышеречоное сумы всее и каждое зособна поднести, с подвероных кгвинтовать, и оными ведлуг воли и уподобанья их и панов опекунов их диспоновать, о чым от мене и от жадного з близких кревных повинных и инших потомков моих жадное препедицыи и пренагабанья меть не мають, и на том дала.

© Валерый Пазднякоў, 2010, 2015