Дакументы: Статут Вялікага Княства Літоўскага 1588 г. Раздзел 4. Арт. 11-20

Артыкулъ 11.

О беспечности возного, будучи ему на справахъ, вряду его належачихъ, такъже и стороне, при немъ будучой.

Уставуемъ тежъ, естли бы хто возного на справе за листы воеводъ, старостъ, вряду замкового и земъского албо суду головного трибунальского любъ тежъ вряду подъкоморъского и комисарского албо и безъ листовъ, будучи ему на справахъ, вряду его належачих, самъ або черезъ слугъ, подданыхъ своихъ збилъ албо, листы от него отнявъши, содралъ албо возного любъ сторону позвы, листы ести [у арыгінале: естли] примусилъ албо поличковалъ, волосы або бороду ръвалъ и тымъ вряду не учъстилъ, тогды таковый кождый маеть быти о то позванъ на рокъ завитый до вряду земъского албо кгродского, где сторона жалобная похочеть, на перъшие роки. А тамъ за доводомъ слушнымъ маеть навезати возъного совито водле стану его. А за нашу вину на замъку албо дворе поветовым дванадцать недель седѣть у вежи веръхней, а сторону, которую бы при возномъ збито або, яко вышей описано, обельжоно, маеть такъже за слушнымъ доводомъ навезати совито водъле стану, якого будеть, и шкоду возному и стороне, и естли се ей што в тотъ часъ станеть, совито заплатити. Пакъли ж бы конемъ хвосты поурезано альбо поранено, тогды за то виненъ будеть толко коня конемъ навезати и за то седенья не понесеть. А где бы претивная сторона за сказаньемъ суду земского або кгродского седети, навезокъ и шкодъ платити не хотела на часъ, от вряду назначоный, тогды таковый еще в другую совитую заплату навезокъ и шкодъ присужоныхъ для тое противности своее попадеть, што врядъ возному и стороне заразом водлугъ порядъку о отправахъ речей сужоныхъ, нижей постоновеного, на йменью такового отправити маеть. А тое непослушенство его з стороны седенья врядъ земъский або кгродъский, передъ которимъ се то приточить, маеть намъ, г[о]с[по]д[а]ру, ознаймити, а мы, г[о]с[по]д[а]ръ, тому не фолькгуючи, без всякое проволоки и откладанья на инъший часъ, але заразомъ взявъши о томъ от того вряду нашого ведомость через листъ отвороный, такового обвиненого и вряду нашого непослушного маемъ зо всихъ земль паньства нашого казати выволати. А пакли бы хто возного на таковых справахъ, вряду его належачихъ, або сторону, при немь будучую, забилъ, таковый, будучи о то притягненый до суду кгродского и с права поконаный, самъ горъломъ каран, а головщина забитого совито зъ именья его плачона быти маеть. А за нестаньемъ стороны объвиненое вряд в томъ далей поступовати маеть, и мы, г[о]с[по]д[а]ръ, за отосланьемъ врядовымъ заховатисе противъ таковых будемъ водлугъ арътыкуловъ, на судъ кгродский около речей крвавыхъ описаных. Одно жъ за головщину и шкоды такого возного або стороны забитое врядъ заразомъ, скоро позваный не станеть, совитое сказанье и увязанье въ именье такого свовольного и непослушного дати маеть, положивши на листе увяжчомъ еще такъ великий закладъ, яко самое речы скажеть. А гдѣ бы што с тых речей менованыхъ возному або стороне ку зельживости сталосе не от самого пана, до кого бы былъ посланъ, але от слугъ, подданыхъ и от кого колвекъ иного з дому або на именью оного, будь при бытности самого пана в томъ дому або в небытности его, а онъ бы, будучи о то позваным, до того се не зналъ, жебы се то мело стать зъ его росказанья, тогды о томъ черезъ тотъ же врядъ, до которого будеть позвано, росправа маеть быт[ь] вчинена такимъ обычаемъ, яко в той мере о посланьцохъ нашых в розделе первомъ арътыкуле двадцать четвертомъ ест описано.

Артыкулъ 12.

О печати нашой, г[о]с[по]д[а]ръской, земской и тежъ о печатехъ врядовыхъ, которыми што маеть быти печатовано.

Тежъ мы, г[о]с[по]д[а]ръ, даемъ подъ геръбомъ того паньства нашого, великого князства литовъского, "Погонею" печать до кожъдого повету, на которой естъ написани [!] около геръбу имя того повету. А тую печать писаръ земъский присяжный у себе самъ, а не хъто инъшый, ховати маеть, которою печатью и под тытуломъ нашымъ позвы мають быти печатованы и выдаваны. А иные никоторые листы, выписы и сознанья, кроме только самыхъ позвовъ, тою печатю не маеть [!] быть печатованы, але будуть печатованые всякие листы с того вряду земъского, судовые выписы и сознанья, листы упоминальные, увяжчие и иные печатьми суд[ь]иною и подъсудъковою, а подъписованы рукою того жъ писара земъского.

Артыкулъ 13.

О книгахъ земъскихъ и кгродскихъ, где мають быти хованы и о местъцу на отправованье судовъ земъскихъ и теж о выдаван[ь]ю, кому потреба укажеть, выписовъ [у арыгінале: выпосов] албо видимусовъ.

Уставуемъ тежъ, хотечи то мети, и приказуемъ, абы в кождом таковомъ повете, где судъ земъский естъ в замъку албо в дворе нашомъ, судья, подъсудокъ и писаръ земъский посполу зъ шляхтою и всими иными станы опатрыли, збудовали таковые местца, где бы завжды книги земъские безпечне от вшелякое пригоды были захованы. Прото воеводове и старостове судовые в кожъдомъ воеводъстве, земли, повете в замъку або дворе нашом судовомъ схованье доброе и варовное поступити имъ на то винни будуть. А где бы таковыхъ схованей не было, тогды на збудованье склепу ку захованью книгъ местъца пристойные в замкох и дворехъ нашыхъ указати и подати и сами жъ таковые воеводове и старостове судовые оное схованье книгъ земъскихъ доброю сторожою подъ кожъдымъ часомъ опатровати мають. А кгды роки отсужоны будуть, тогды по выволанью роковъ мають книги еще немней трехъ дни лежати, при которых мають быти, не от[ъ]еждчаючи, судья, подъсудокъ и писаръ для сознанья, уписован[ь]я и выписовъ бранья, для иныхъ потребъ шляхетъскихъ. А роз[ъ]еждчаючисе, мають иньшие перъвшихъ роковъ книги вложити и заховати въ скриню моцную за трима замъками, отъ [у арыгінале: оттъ] которых одинъ ключъ будеть у судьи, другий у подъсудъка, а третий у писара, и печатьми [у арыгінале: печатьти] своими запечатати мають. Але книги тых одныхъ судовых роковъ, с которых се по отсуженью ихъ будуть роз[ъ]ежъдчать, мають быти у писара земъского, яко врядника присяглого, ажъ до другихъ роков судовыхъ, а то для порадного справованья и начысто переписанья книгъ. А писаръ в томъ часе, межы роковъ переписавъшы тые книги начысто, маеть ихъ на других рокохъ до одное скрини и захованья з судьею и с подъсудком, яко о томъ вышей доложоно, положити и потомъ ихъ не отворати, ажъ весполокъ зъ судьею и с подъсудъкомъ, кгды того потреба укажеть. И вжо такъ завжды толко от роковъ до роковъ, судовне отправуючихъ, писари земъские поветовые мають у себе книги ховати. А кгды трои роки отсужоны будуть, тогъды по отправенью четвертых роковъ вжо тые справы прошлых троихъ роковъ въ одны книги через писара знесены и вязани быти мають. К тому тежъ воеводове и старостове судовые въ кождомъ воеводъстве, земъли и повете местъца пристойные на збудованье домов для отправованья судовъ земскихъ недалеко замковъ и дворовъ наших судовыхъ вряду земскому и шляхте указати и поступити мають. А врядники земъские со въсими станы оного повету будуть винъни, яко тое схованье книгъ судовых у замку албо у дворе, такъ и тотъ домъ судовый збудовати с тыхъ пенезей, яко то особливою уфалою естъ постановено, што за моцно держано быти маеть. Тым же обычаемъ воеводове, старостове судовые книги кгродские в добромъ схованью варовне ховати мають. А кгды который воевода або староста судовый с того свѣта зыйдет, албо если бы есмо которого зъ ихъ с того вряду на иншое воеводство албо староство преложили, тогды врядники их кгродъские або они сами повинъни будут тому старосте, которому оное воеводство або староство дано будеть, вси книги кгродъские в томъ же повете при въеханью его на тотъ вряд передъ шляхътою зараз в целости здати. А выписы або видимусы такъ с тыхъ книгъ перъшихъ воевод и старостъ, яко и кожъдый врядъ с книгъ своих справъ [варыянт: "с правъ"] кождому, кому кольвекъ того потреба указывати будеть, без вшелякого затрудненья и проволоки мають давати листы с подписомъ руки писара кгродъского присяглого и с печатми самихъ воеводъ, старостъ або ихъ врядников судовыхъ, наместъника албо подъстаростего и судьи кгродъского.

Артыкулъ 14.

О пересудехъ и паметномъ в ыменьяхъ кн[я]зьскихъ, панъскихъ и земяньскихъ такъ духовного, яко и светъского стану.

Забегаючи затруднен[ь]ю и обътяженью справедливости людское, уставуемъ теж [у арыгінале: тежу] с призволенемъ всихъ становъ, што жъ вси панове рады наши духовные и светъские, кн[я]зи, панове, державцы, тивуны и вси иные врядники наши на врядехъ наших несудовых и тежъ в ыменьяхъ своихъ властныхъ, по тому жъ рицеръство, шляхта и вси обыватели того паньства, великого князства литовъского, и в земляхъ, к нему належачихъ, на именьяхъ своихъ чинечи справедливость шляхъте и инъшимъ подданымъ нашим зъ врядники, бояръми и поддаными своими, мають се заховати сами и ихъ врядники въ бранью пересудовъ и паметного водлугъ тое жъ уставы, врядомъ нашимъ вышей в арътыкуле пятом сего жъ розделу описаное, под тою ж виною на сторону по дванадъцати копъ грошей, о которые вины мають быти сами панове, где бы то сами вделали або з урядъниковъ своихъ справедливости о то не учинили, позываны до вряду нашого земъского на перъвшие роки на завитый рокъ.

Артыкулъ 15.

О бранью вижованого, оглядного и иныхъ доходовъ в дворехъ и имѣньяхъ кн[я]зъскихъ, паньскихъ и земяньскихъ.

Уставуемъ и то, хотечи в порядъку слушномъ мети, ижъ во всем томъ паньстве нашомъ, великомъ князстве литовъскомъ, и въ земляхъ, к нему належачихъ, на всякихъ врядехъ нашихъ, господаръскихъ, несудовыхъ, такъже на именьяхъ кн[я]зъскихъ, паньскихъ и земяньскихъ, духовъныхъ и светъскихъ, вижового, оглядного и от вязней потуремного не маеть быти большей брано, только водлугъ сее уставы нашое, нижей описаное, то естъ вижу на кождую речъ взятому и огледаного битыхъ и ранъныхъ на местцу—грошъ одинъ, а естли где вижъ поедетъ за колко миль, тогды ему помилного на милю по грошу у одну сторону, яко и возному повѣтовому—от выдан[ь]я роты присеги духовнымъ особамъ грошъ, а вижу, на то приданому, грошъ; а от вязней от вшелякого везенья потуремного, поланцужного або поколодного от такового вязня, который бы на горло седел, от шляхтича того, которого статутъ имать позволяетъ, дванадцать грошей, от простого ч[е]л[ове]ка—шесть грошей, а который бы в меньшой вине осажонъ былъ, жебы о горло не шло, от таковыхъ по половицы того брано быти маеть. А платити то маеть тотъ, хто винен в чомъ с права зостанет. А естли бы вязень с права от объжалованья стороны противное вольным былъ вчиненъ, тогды сама тая сторона противная, што его осадить дала, маеть его подъле тое уставы з везенья выкупити. Также где бы которий вязень на смеръть былъ сказанъ, тогды тое потуремное сторона жалобъная будеть винъна заплатити. А плачоно то маеть быти разъ одинъ, кгды въжо остатнимъ разомъ вязень або на волность, або на смеръть з везенья выходить. И для того вжо сторожа около всякого вязня маеть быти не того, хто его дасть осадити, але того пана, чый будеть слуга, бояринъ або подданый. Толко где бы лезный неоселый ч[е]л[о]в[е]къ, то естъ дому под тымъ паномъ не маючый, былъ осажонъ, сторона жалобная на день на страву ему по чотиры пенези маеть давати. А естли бы хто з везенья вязня упустилъ, о томъ за припозваньемъ до права належного водлугъ описаня сего статуту маеть быти сужоно водлугъ арътыкулу, в семъ же розделе о врядехъ нашихъ кгродскихъ в таковой речи описаного, ищучи того на томъ, кому вязень поданъ будеть. А не всхочет ли панъ або врядникъ его того вязня до везенья своего приняти, тогды маеть сторону с тымъ вязнемъ на врядъ нашъ судовый пустити, и там вжо на томъ уряде з него справедъливость чинена быти маеть, кгды жъ владзу свою за непринятьемъ вязня до везенья упустилъ. А што будеть от вряду с права сказано, то панъ або врядникъ его за декретомъ врядовымъ на маетъности того вязня рухомой отправити маеть. А естли маетъности рухомое такъ много не будеть, тогды самъ в томъ маеть быти стороне выданъ на выробъ, яко о томъ в ынъшомъ арътыкуле ест доложоно, звлаща где бы горъла не заслужилъ.

Артыкулъ 16.

О зъеханью суду земъского за три дни перед роками и о пильности сторонъ ку праву.

Тежъ передъ кождыми роками земъскими будуть винъни суд[ь]я, подъсудокъ и писар на местъце, судомъ назначоное, за три дни приехати для отворенья книгъ и выдаванья выписовъ, кому того потреба будеть, такъже для вписованья позвовъ в реестръ, абы тотъ, хто первей впишетьсе до рейстру, тотъ тежъ наперодъ сужонъ был. Ведъ же гдѣ бы се обедве стороне межи собою запозвали, тогды тому наперед маеть быти справедливость чинена, хто наперед позвалъ. А от того вписованья в рейстръ писару грошъ. А кгды з рейстру три разы волано будеть, а не отзоветьсе тотъ, кого волають, таковый сказанъ маеть быти, яко не сталъ. Тымъ же обычаемъ и поводовая сторона маеть сказана быти. А тые воланья сторон у кождого суду и вряду розумено быти маеть, ижъ волавши стороны одного дня, и другого, и третего дня, по одному разу на день. Сторона, не пилнуючая року, маеть быти третего дня о нешпорной године здана и сказана за нестанье свое водле арътыкуловъ, нижей описаныхъ. А тых сторонъ, которимъ бы три дни пильности их обудвухъ минули, а для непоспеху врядового третего дня отсужоны не были, вжо четвертого дня и потомъ иншихъ дней врядъ до нешпорное годины ждати не повиненъ, але скоро врядъ на суде засядеть; а которая сторона за воланьемъ возного не станеть, тую вряд водлугъ сего статуту здати и сказати маеть.

Артыкулъ 17.

Яко и пры комъ позвы позыватисе и яко а гдѣ то осветъчати.

Тежъ хто бы на кого позвы взял и тыми позвы позывати его хотелъ, тогды позвы, от всякого вряду взятые, маеть возный з стороною шляхтою очевисто давати и позывати можеть при костеле, у суду, на дорозе и на кождомъ местъцу, гдѣ бы его кольвекъ застати и найти могъ. А гдѣ бы очевисте ихъ дати не могъ, тогды на именью того, с которого се кому кривда дееть, маеть положити в дворе, в дом або у ворота утъкнути и там же у дворе, если бы у ворота до двора не был пущонъ, через плотъ урядънику або тивуну, або, если бы тамъ кого у дворе обачил, оный позов оповедати и обволати, жебы о позве сторона ведома была. А не докличеть ли се никого, тогды однакъ позвы, яко вышей описано, положити маеть. А предъсе маеть тое положен[ь]е позву возный оповедати войту або якому кольвекъ подданому того двора, который будеть наближей того двора. А естли бы в котором именью, с которого се кривда дееть, двора оного пана не было, яко то бывають сѣла данники на Руси и индѣ в томъ панстве нашомъ, тогды тые позвы предсе в томъ же селе покладаны, старцу, войту, лавнику, десятнику або мужу которому оного села даваны, або в дому их кладены и до того повету, в которомъ тые села будуть, позывано быти маеть. Ведъ же кгды возный заочне позвы покладаеть, маеть первей передъ тою стороною шляхтою тотъ позов с противнымъ позвомъ скорикговати и ихъ по достатку вычитати, абы во всем згодливые и нескробаные были. А иж тежъ на некоторих местъцахъ через границы, поветомъ замероные, многие особы таким обычаемъ дворовъ, местъ и людей своих уживають, ижъ по одной стороне границы двор, а на другой стороне место, люди або кгрунты лежать, а будеть ли се кому кривда деети с тых людей або кгрунътовъ, при которих дворовъ нетъ, ино ижъ таковые кривды оному вряду поветовому, подъ которимъ се деяти будуть, оповеданы бывають, тогды тежъ до оного ж повету с такового мѣста, людей и кгрунтовъ и позывано быти маеть. Ведъ же тые позвы, хотя и за границу, возный того вряду, в которомъ се кривъда дееть, до двора оного пана нести и поступкомъ, вышей писанымъ, давати будеть повиненъ, и рокъ, на который позвы подасть, маеть на обеюхъ позвехъ написати, абы позваная и поводовая сторона року ведоми, певни и пилни были. А гдѣ бы возный самъ писати не умелъ, тогды будеть повиненъ оного позванья сознанье на писме обеюмъ [у арыгінале: отбеюмъ] сторонамъ подъ печатью своею и стороны шляхты дати и перед врядомъ кгродъскимъ або и земскимъ передъ рочками и роками за день стороне жалобной тотъ квитъ свой сознати, которое сознанье за слушъное у права земъского и кгродского приймовано быти маеть. А писаръ такъ земъский або кгродъский маеть на томъ же квите возного албо на позве, гдѣ подъпис возного будеть, рукою своею написать, же возный тое поданье позвовъ призналъ. Естли на позве, тогды тыми словы, иж того дня при написе своемъ возный поданье того позву очевисто призналъ; а естли на квите, тогды также, день поменивши, коли сознаваеть, написать маеть, ижъ тотъ квитъ свой возный очевисто призналъ. А от того напису по полугрошку, а не болшъ писар брати маеть, а до книгъ вписовать того не потреба. А естли бы сторона поводовая хотела сознанье возного до книгъ собе записать, то ей вольно будеть.

Артыкулъ 18.

О позъвехъ и о року, який за позвы будеть складанъ, и о грабежохъ.

К тому уставуемъ, ижъ хто бы до кого мелъ которое дело о кривъду або о якую жъ кольвекъ речъ, тогды маеть от писара земъского того повету позвы або мамърамы взяти под печатью нашою, от насъ тому повету даную, и с подписью руки писаръское. Ведь же в мамърамехъ дата, то естъ рокъ и месець и день, коли ихъ хто береть, маеть быти написаный. А где бы сторона сама хотела собе позвы написати, тогды, принесет ли готовые написаные, писаръ, взявъши от нее доходъ свой грошъ, запечатовати ихъ и подъписати будеть повиненъ. А шкодъ рейстръ, похочеть ли сторона жалобная, вольно ей будеть подъ печатью своею або возного при позвехъ позваному дати. А сторона позваная яко на позовъ, такъ и на рейстръ повинъна будет отказывати. И тыми позвы передъ кождыми роками судовыми мають се позывати очевисто за чотыри недели, а заочне, кладучи на именьяхъ, с которыхъ се кривъда дееть,- за шесть недель передъ роками. Ведь же личечы тую чотыри або шесть недель до роковъ, то естъ до перъшого дня, на заседанье суду в семъ статуте описаного, не от даты позву, в немъ описаное, але от часу и дня, яко очевисте поданы або на именью положоны будуть. А кому бы се стала якая кольвекъ кривъда, такъже о грабежъ ново близко передъ роками за недель шесть, пят[ь] або за чотыри и за три, тогды о таковую речъ новую можеть укривъжоный позвати на тые жъ першие близько пришлые роки, только бы се выполънилъ рокъ такъ очевистому, яко и заочному позванью отъ перъвшого дня роковъ судовых в десети днехъ, естли судъ такъ долго заседати будеть. И таковый позовъ жалобникъ маеть в рейстръ уписати в тотъ часъ, кгды ему рокъ припадеть, и далей поступовати водле права. А менъшие и близьшие роки не мають быти складаны, але в дальшомъ часе чотырохъ або шести недель волно позвы закладати.

Артыкулъ 19.

О збиванью позвовъ и зношенью позвовъ з ыменья.

Тежъ уставуемъ, кгды жъ людемъ укривъжонымъ великая проволока в справедливости их збиваньемъ позвовъ ляда причинами деяласе, прото такъ вечными часы мети хочем, абы позвы всякие, яко наши, г[о]с[по]д[а]ръские, такъ кгродские, земъские и подкоморские и з ыншихъ вшелякихъ врядовъ, водлугъ сего статуту выдаючые, также у суду головного, жадными причинами збиваны быти не могли, опрочъ трехъ причинъ, нижей тутъ помененых. Перъвое, где бы сторона поводовая року и позванья водлугъ арътыкулу вышъшого сего розделу семънадцатого квитомъ або написомъ возного и писаръскимъ не довела; другое, хто бы имени позваного власного и имени отца его, также тежъ тытулу упривильеваного, предънейшого, альбо яко ся онъ самъ зоветь и пишеть, не написалъ. Ведь же обчого народу людей такъ писати могуть, яко се хто самъ писати и звати звыклъ. Третее, кгды о што шкрутыния, а к тому о кгвалтъ, бой, грабежъ идеть, а поводови местъца, где се то стало, року, месеца и дня естли бы не доложилъ, на таковый позовъ сторона не повинъна отказывати. А иными никоторими причинами врядъ збиванья позвовъ не маеть допускати. Ведь же, позываючи о именье, за чимъ хто деръжить, або о заставу, через продъковъ або близских своихъ вчиненую, хотя часу в позве не доложить, позваный тымъ позву збивати не можеть. А где бы дата в позве не была написана, тогды сторона поводовая, за таковый недостатокъ позву своего заплативъшы судови грошей шесть, а стороне про[тив]ной другую грошей шесть, жалобы и речи своее правне попирати можеть. А где бы хто хитростью для збиванья позвов и проволокаючи кому права, звлаща позваный, оказалъ позовъ не згодъный або скробаный и тымъ его хотелъ збити, а сторона поводовая доведет ли того сознаньемъ возного, ижъ ему далъ позовъ згодливый, нескробаный, тогды по такомъ доводе позваный повиненъ отповедати. А еще позваный за тое скробанье маеть стороне поводовой шесть грошей, а суду другую шесть грошей заплатити. А естли бы се тежъ то пригодило, жебы хто, не будучи позванымъ, одно ставши у суду або умоцованого пославши, менилъ, же позовъ, писаный на имя чие инъшое, естъ положонъ на его властномъ именью, тымъ не згола маеть быти позовъ зражонъ, але ажъбы тотъ, хто позовъ зносити хочеть, первей того слушне водле права довелъ, же то естъ и было его имен[ь]е властное и еще передъ заложеньемъ того позву врядовне в держанье пришол. А хто бы без причинъ правных на первшихъ рокохъ не сталъ, тогды, на другихъ рокох вину нестанъную заплативши, позву збивати не будеть мочи, але будеть виненъ усправедливитися.

Артыкулъ 20.

О згубе позву.

К тому и то уставуемъ, естли бы сторона позваная, ставши на року, а поведила, же позовъ, которим его жалобникъ позвалъ, згубила, тогды жалобная сторона винъна будеть той стороне позваной копию с позву жалобы своее под печатью своею або с печатью возного дати. А позваный по данью ему тое копии назавътрее жъ повиненъ будеть у права отказывати. Гдѣ бы тежъ жалобная сторона менила, ижъ позов пригодне вжо на рокохъ згубила, а позваный, хотечи ся усправедливити, хотелъ бы ей с позву копию дати, тогды жалобникъ, принявши от него копию подъ печатью его або возного и с подписью [у арыгінале: кодписью] руки властъное, хто писати умееть, такежъ назавтрее маеть жалобы свое попирати. А естли бы копии брати и речы свое попирати не хотелъ, противъ таковому жалобнику вряд сказан[ь]е чинити маеть водлугъ моцы або важности року. Нижли естли бы позваный, до усправедливенья не беручисе, копии с позву дати не хотелъ, то при воли его будеть, а жалобникъ, похочеть ли, о то знову позвати его маеть. А пакли бы жалобной стороне позовъ згинулъ еще передъ роками, тогды он о томъ стороне своей противной листомъ своимъ отворонымъ с печатью своею, а хто писати умееть—и с подъписью руки своее, через возного и одного шляхтича маеть знати дати, абы онъ на роки тые не ездилъ и до утраты прожное не приходилъ, такий листъ на именью покладаючы.

© Алег Ліцкевіч, 2010