Дакументы: Статут Вялікага Княства Літоўскага 1588 г. Раздзел 4. Арт. 31-40

Артыкулъ 31.

О опатръности везенья на врядехъ нашихъ и о бранью потуремного отъ вязней.

Уставуемъ, ижъ от вязневъ потуремного, поланцужного и от иного всякого везенья вряды наши, почавши от места нашого столечного Виленьского ажъ по всимъ инымъ замкомъ и двором нашимъ, не мають болшей брати, толко от шляхтича сорокъ осмъ грошей литовскихъ, а от боярина путного и чоловека простого двадъцетъ чотыри гроши литовъскихъ. А то врядъ маеть брати одинъ разъ, кгды остатнимъ разомъ вязенъ або на смерт[ь] або на вольность з везенья выходить. И естли вязень на волност[ь] выйдеть, то онъ самъ выкупитися тымъ з везенья маеть або тотъ, хто его невиньне осадити далъ. А где бы на смерт[ь] былъ выданъ, тогды сторона жалобная маеть то вряду заплатити. Ведъ же кождый врядъ нашъ, приймуючи вязня до везенья, вжо отсихъместъ в строжи от стороны тое, хто вязня подасть, потребовати не маеть, але принявши вязня за своею сторожо[ю] и [у арыгінале: о] опатрностыо доброю такъ, яко бы до справы не утекъ, повиненъ будеть ховати, а сторона вязню своему, естли будеть неоселый, толко на страву на день по чотыри пенези винъна будеть давати. Прото для лепшое опатръности мають воеводове, старостове везде в замкохъ и дворехъ нашихъ судовыхъ казати побудовати вежы моцные и глубокие по шести сажонъ в земли, и при томъ инъшие, не в земли, лжейшое везенье, але предъсе за замъкненьемъ и добримъ моцнымъ обварованьемъ мети. А где бы вязень таковый, на которомъ вряде осажоный, утекъ, тогды тотъ, хто такового вязня в заведанью своемъ за порученьемъ воеводъ, старостъ судовыхъ мел, если вышогородъский або городничий, где такие вряды суть и будут ли мети собе вязни поручоные. А где вышогородъских або городничихъ нетъ, тамъ наместъникъ або подъстаростий, кому которий вязень от стороны жалобливое до везенья подан будеть, маеть того вязня надалей за дванадъцать недель отыскати и до права стороне ставити. А не отыщет ли за дванадцать недель, тогды шкоду, на чомъ сторона жалобная поприсягнеть або якимъ иншимъ слушным доводомъ доведет, виненъ будеть платити. И для того панове воеводове и старостове судовые тотъ врядъ догледанье вязневъ мають злецати и звератисе того людямъ добримъ, вери годнымъ народу шляхетского. А естли тотъ вязень будеть на горъло седелъ, а не могъ бы быть надалей до полугодья отысканъ, ино тот же врядъ, яко верху описано, которому бы от стороны тотъ вязень былъ поданъ або от воеводъ, старостъ ку осаженью и догледанью везенья злецонъ, з розсудку воеводъ, старостъ маеть отприсегнутисе, же тое утеченье сталосе без рады, ведомости и фолькги его и не за неопатръностью або недъбалостью его. А за голову або за раны, шкоды стороне за доводомъ слушнымъ нагороду и заплату учинити. А воеводове и старостове мають в такихъ речах безотволочную справедливость чинити такъ, ижбы в тыхъ часехъ, вышей замероныхъ, за дванадъцать недель або за полъгода сторона жалобная конечную справедливость и зъ отправою речы присужоное одеръжати могла, а оного вязня, гдѣ бы се потрафило, предъсе будеть волно такъ тому вряду, зъ чиего везенья утечеть, яко и стороне жалобной имати и правомъ передъ тымъ врядомъ, гдѣ его постигнеть, поконывати. А если врядъ того вязня постигнеть, тогды маеть на немъ собе шкодъ своихъ позыскивати або вязня стороне жалобной вернути. А коли ему подасть, тогды сторона тую нагороду, што от вряду возметь, верънути маеть. А гдѣ сторона жалобная сама оного вязня пристигнеть, тогды тые шкоды врадови тому верънути будеть повинъна, а того вязня водлугъ права наконецъ поконывать во всемъ томъ, о што ему идеть. А естли бы хто якого ж кольвекъ стану такъ своволный былъ, а вязня зъ замъку або двора нашого з везенья або тежъ вжо выданого на смеръть гдѣ на улицы або на дорозе кгвалтовне отнял або ката при таковомъ вязню забилъ, а не былъ бы заразомъ на таковомъ учинку пойманъ, тогды таковый, будучи о то до нас, г[о]с[по]д[а]ра, на рокъ завитый позванъ, самъ и с помочниками своими, яко бунтовники и взрушители права посполитого, горъломъ и отсуженьемъ почстивости карани быти мають, а шкоды и наклады стороны жалобное за доводомъ совито нагородити и заплатити таковые винъни будуть.

Артыкулъ 32.

О нечиненю фолькги у везенью.

Опатруючи то, абы владза врядовъ нашихъ и моцъ права посполитого ку завъстегненью своволенъства людъского до выконанья своего завжды приходила, уставуемъ и хочемъ то мети, ижъ кгды врядъ судовый земъский в которой земли або повете албо тежъ судъ головный за який выступъ кого водлугъ арътыкуловъ сего статуту до везенья скажеть и отошлет на везенье до замку або двору нашого судового, тогды врядъ нашъ кгродъский маеть и повиненъ будеть не только безъ жадныхъ вымовъ и фолькги таковыхъ людей до везенья приймовати, але гдѣ бы от суду земъского, головного и кгродъского которая особа на горъло была сказана, а змоцнивъшисе не далъ бы се осадити, тогды не толко врядъ врядови ку пойманью такового сказаного помочъ давати повиненъ, але врядъ местъский и место, в которомъ се то деяти будеть, противъ таковому непослушному або противному взрушитисе мають, яко бы таковый свовольникъ пойманъ и до везенья данъ и водлугъ сказни врядовое каранъ былъ.

А помочники таковые, которые бы поймати его боронили, таковой же вине и каранью подълегають, яко тотъ самъ злочинца, правомъ переконаный. К тому тежъ такий вязень, на горъло сказаный, по сказанью врядовомъ, кгды апеляцыя дойдеть до нас, г[о]с[по]д[а]ра, або до суду головного, тогды што намоцней везеньем осмотренъ быти маеть в той вежи, которая естъ на головники описана, до учиненья противъ нему декретъ от нас, г[о]с[по]д[а]ра, або от суду головного, до которого права апеляцыя належная допустить. Ведь же тыхъ, которые рукоемъство слушное по собе дадуть, тыхъ водле трыбуналу заховать. А такового вязня, который бы на горачомъ учинъку, за што горломъ карають, былъ пойманъ, и до замъку данъ, маеть моцъ врядъ оковами и ланцухами у везенью другомъ, где головниковъ не сажають, его опатрити, яко бы с того везенья не утекъ ажъ до росправы. А хто бы зъ едънанья за який выступъ свой везеньемъ теръпети самъ доброволне черезъ який часъ поднялъсе, тогды передъ часомъ, замероным седенью, врядъ кгродский не маеть вызволяти, ани фолькги у везенью чинити безъ позволенья самое стороны. А тымъ, которихъ право на седенье до вежи на дно скажеть, хотя бы и сторона противная волнымъ везенья чинила, вряд никоторое фолкги чинити не маеть, а тому всему мають досыть чинити подъ виною, в семъ арътыкуле нижей описаною. А хто бы з воеводъ, старостъ судовыхъ або ихъ врядниковъ того се важилъ, а тому вязню до вежи на дно, будь от насъ, г[о]с[по]д[а]ра, або от вряду кгродского, або тежъ от которого иного вряду нашого сказаному, якую фолькгу у везенью чинилъ и допущалъ ему собе седенье вышъшого, нижли на дне, чинити або комины у вежи будовати, або бы кому и в ынъшомъ лжейшомъ везенью фолкгу якую надъ сказанье судовое чинилъ, таковый воевода, староста або врядъ его и хто кольвекъ везенье в моцы своей мети будеть, будучи о то от стороны болячое до суду земъского позванъ на рокъ завитый, за доводомъ слушнымъ правнымъ повиненъ будеть той стороне болячой сорокъ копъ грошей заплатити, иле кроть о то позвано и переведено то на него будеть, а стороне болячой вольно будеть завжды того догледати, якъ и где вязень, будь за голову або за який иный выступъ, седеть. А врядъ кгродъский не маеть ему того боронити подъ таковою жъ виною, вышей описаною, колько бы раз о то его позвано и доведено. Ведъ же однакъ врядъ кгродъский маеть, хотя передъ нимъ самымъ правомъ переконаного албо от вряду земъского, або суду головного, до везенья по сказанью отосланого, не кождого до вежы в землю сажати, але водлугъ учинку и выступку, яко около того в семъ статуте описано. Прото в которомъ арътыкуле сего статуту вежа которому вязню поменена, тотъ в таковую сажонъ, которому тежъ другая, лжейшая, тотъ такъже в той сажонъ быти маеть водле выступу своего. А гдѣ бы хто оселый за який же кольвекъ выступъ свой поточный, окромъ кривавого выступъку, противъ которой особе народу шляхетъского албо противко врядови якому учиненый, на везенье которое водлугъ сего статуту сказанъ и до вряду отосланъ былъ, а досыть бы тому везенью на часъ назначоный не вчинилъ, тогды за выступокъ стороне своей противной сорокъ копъ грошей, а врядови другую сорокъ копъ грошей упадаеть и тыми винами до седенья маеть быти примушонъ водлугъ сего статуту розделу третего арътыкулу двадъцать семого. А естли бы неоселый тымъ же способомъ до такового везенья данъ былъ, а з него бы утекъ, которого тыми винами не было бы щого [!] примусити, а не былъ бы пристигненъ и повторе пойманъ, тогды тотъ врядъ маеть нам, г[о]с[по]д[а]ру, листомъ своимъ о томъ ознаймити, а мы того жъ часу без кождое проволоки маемъ такового неоселого зо всих паньствъ нашихъ выволати, яко о томъ в семъ же статуте естъ описано.

Артыкулъ 33.

О рочкох, кгродскому суду постановеныхъ, и о давности позванья до кгроду, о выбитье с покойного деръжанья.

Уставуемъ, ижъ рочки ку отправованью судомъ кгродъскимъ мають быти кождого месеца и починатися мають первшого дня личбы месечное. А гдѣ бы первшого дня свято трафилося, тогды назавтрее по святе рочки починатисе будуть, а трвати судовне мають через две недели, на которие рочки кождый, кому бы потреба указывала, маеть сторону свою порадъкомъ статутовымъ такъ от заочного, яко очевистого поданья позву за чотыри недели позывати. А хто бы за недоспехомъ своим не могъ бы за чотыри недели передъ початьемъ рочковъ позвати, тогды и тыдень в рочки рокъ приймованъ быти маеть, толко бъ от позванья чотыри недели сполнилися. А гдѣ бы за припадкомъ выбитья с покойного деръжанья в часе такъ короткомъ, жебы укривжоному ку позванью на рочки перъвшие чотырох недель недоставало, тогды таковому и на другие рочки волно будеть позвати, только бъ от выбитья до позванью десети недель не омешкалъ. Ведъ же если бы хто о выбитье з спокойного деръжанья до десети недель позвати не могъ с тых причинъ, то естъ за служъбою нашою, г[о]с[по]д[а]ръскою, земъскою або для поветрея морового, тогды. доведъшы того слушне водле права, ижъ за которою с тыхъ причинъ в десети неделяхъ не могъ позвати, предъсе и по выстью тыхъ десети недель позвы кгродские таковому ити и даваны быти мають, только бы зась по утишенью поветрея, або приехавши с послуги нашое до именья своего, зася десети недель не омешкалъ. А естли тыхъ причинъ предъречоныхъ не доведеть и не покажеть, тогды вжо о то до суду земъского позывати маеть на рокъ завитый, такежъ о выбитье або отнятье спокойного деръжанья.

Артыкулъ 34.

О позвехъ кгродскихъ и о року за ними завитомъ.

Уставуемъ, ижъ во всихъ таковыхъ речахъ, на судъ кгродский [у арыгінале: кгродским] вынятыхъ, мамърамы на позвы мають быти даваны подъ печатми п[а]новъ воеводъ, а в поветѣх, где воеводъ нетъ, ино старостъ судовыхъ, а не ихъ намесниковъ. А рокъ за кождыми позвы кгродскими маеть быти завитый подъ страченьемъ права. А ведь же писаръ на томъ мамраме мает рукою своею написат[ь] дату, которого дня выдаеть тотъ позовъ, справуючисе далей водле арътыкулу осмънадцатого в том же розделѣ.

Артыкулъ 35.

О промешканью часу позванью до кгроду о голову шляхетскую и о наездъ домовый и иные учинъки крвавые.

Теж хто бы о голову шляхетскую и о наездъ кгвалтовный и крвавый на домъ шляхетский, где бы се стало забитье або зраненье, такъже о кгвалтъ костелный, о кгвалътъ паненъ и невестъ, о розбой, пожогу и инъшие речи крвавые, то естъ за што горломъ карают, на судъ кгродский вынятые, оселого в томъ паньстве не позвал ку праву черезъ тры годы, таковый вжо вечнѣ о то молчати маеть. Одно жъ где бы по забитой голове шляхетъской дѣти або близъские такие, кому бы о то правомъ чинити належало, еще летъ недорослыхъ были, або бы и дорослыми будучи, а въ томъ паньстве нашомъ не были, але бы мешкали где в ынших панъствахъ чужихъ, тогды таковые дети або близъские, дошедъши летъ зуполъныхъ або с чужихъ земль приехавъши, могут о то правомъ чинитн, толко бы по дошъстью летъ або по приеханью своемъ зъ земль чужихъ трехъ годовъ с позваньемъ не омешкали.

Артыкулъ 36.

О присязе старостъ замковъ и дворовъ нашихъ, г[о]с[по]д[а]ръскихъ, судовыхъ.

Постерегаючи мы, г[о]с[по]д[а]ръ, с повинности нашое справедливости светое, жебы на вшелякомъ местъцу в боязни божой отправована была, такъ уставуемъ, ижъ кождый староста замъковъ и дворовъ нашихъ судовыхъ, которие не суть в лавицы рады нашое и до рады на чиненье, захованье и помноженье справедливости и покою посполитого не присегали, такъ тые вжо, што тепѣръ староства такие судовые мають, яко и которие потомъ з ласки нашое, г[о]с[по]д[а]ръское, мети будуть, мають тепѣръ держачие такие староства скоро по выданью ку вживанью сего поправеного статуту на перъшихъ рочкохъ кгродских, а тые особы, которимъ по выданью сего теперѣшнего статуту поправеного на перъшихъ по томъ ихъ вступенью на тые староства рочкохъ кгродскихъ, тежъ при собранью шляхты, которие в тотъ часъ прибудуть, присегу на суды вделати ротою судьи земъского, а поколь того не учинить, потуль врядомъ своимъ шафовати не можеть. Ведь же тые воеводове и старостове теперѣшние украинъные, которие передъ нами, г[о]с[по]д[а]ремъ, присягу на вряды свои учинили, вжо не будуть повинъни повторѣ присягати.

Артыкулъ 37.

О установенью черезъ воеводъ, старостъ судовыхъ врядников ихъ судовыхъ кгродскихъ и о довоженью з ними справедливости.

Уставуемъ, ижъ воеводове и старостове судовые мають зособна кождый з нихъ на вряде своемъ выбрати и на судъ засадити наместника албо подъстаростего, судью замъкового и писара, людей добрихъ, цнотливых, годныхъ, в праве и писма руского умеетных шляхътичовъ, в томъ же поветѣ оселыхъ и родичовъ того панства, великого князства литовъского, которие, присегу вчинивъши ротою судьи земъского, а писаръ ротою писара земъского, а посполу вси три зуполный судъ заседъши, мають и моцъ мети будуть судити и справовати вси речи судовые, замку або двору нашому належачие. А которий бы с тыхъ на вряде былъ неоселый и неприсяглый, а воевода, староста суду зуполного дати не хотел, тогды сторона не повинъна будеть передъ такимъ судомъ отказывати. А тым неданьемъ оселого и зуполного вряду, если бы се кому проволока або якое уближенье праву стало, тогды воеводове, старостове судовые, кгды о то будуть передъ суд головный позваный [!], повинъни будуть сами укривжоному шкоду и наклады за доводомъ оправити и заплатити. А предъсе неоселых на врядехъ мети не мають, подъ страченьемъ того уряду з выроку нашого, г[о]с[по]д[а]ръского, кгды о то до насъ позванъ будеть. А естли бы се от оселого враду што недозреньемъ на томъ уряде и въ справе ихъ поблудило, а зъ статутомъ бы се права посполитого не згожало и што бы се стороне которой с кривдою от нихъ видело, тогды сторона жалобная в той кривде своей маеть от вряду земъского того ж повету листъ упоминалный взяти, абы панъ воевода або староста судовый в таковой речи справедливость з урядомъ своим ей учинилъ. И тотъ листъ упоминалный маеть быти врядовне положонъ такимъ обычаемъ, яко и о инъшихъ листехъ врядовыхъ покладанью естъ в семъ статуте описано. В том же замъку або дворе нашомъ, где хто естъ воеводою або старостою, а от положенья того листу упоминалного меновите за чотыри недели маеть панъ воевода або староста, будь самъ прибывши особою своею до того вряду своего або на местъце свое, кого его воля будеть, засадившы, и черезъ тыхъ особъ засажоныхъ жалобнику справедливости з урядомъ своимъ учинити. А где бы самъ панъ воевода або староста судовый або от нихъ на то особы высажоные справедливости з урядомъ таковым на тотъ рокъ, веръху мененый, не учинили, тогды о то стороне жалобной волно будеть позвати таковый врядъ кгродский до суду головного трибунальского, покладаючи позовъ такежъ на местцу судовомъ воеводъства або староства ихъ. А хотя бы панове воеводове и старостове сами або тые особы, которые от нихъ на то высажоны будуть, чинили справедливость, але бы се стороне жалобной розсудокъ и сказанье ихъ не водлугъ права видело, тогды той стороне жалобной волно будеть в той мере до суду головного трибунальского апелевати и отозватисе. А в томъ часе до очевистое росправы, яко з урядомъ кгродъскимъ, такъ же и зъ самыми воеводами и старостами судовыми никоторая отправа стороне чинена не маеть быти.

Артыкулъ 38.

Абы судъ кгродъский рочковъ не омешкивалъ, хотечи то мети, абы справедливость без отволоки кождому укривжоному доходила.

Уставуемъ, абы воеводове, старостове судовые, а в небытности ихъ, ино врядники ихъ судовые рочковъ судовыхъ кгродъских под тою жъ присегою своею, на врядъ ихъ учиненою, не омешкивали, але ихъ кождого м[е]с[е]ца отправовали. А который бы з урядниковъ кгродъских на которые рочки кгродъские за хоробою своею або за потребами своими властными на тыхъ же рочкохъ або рокохъ земъскихъ, подъ тымъ часомъ отправуючихъ, в ыньшомъ повете припалыми, на рочки не прибылъ, тогды на другихъ рокохъ винен будеть передъ шляхтою поведити, подъ тою жъ присегою, на врядъ его учиненою, ижъ подъ часомъ тыхъ рочковъ, на которые не прибылъ, правдиве хор былъ або свои властные потребы правные на рочкохъ кгродъскихъ або рокохъ земъскихъ въ иншомъ повете мелъ. А где бы которий с тых врядниковъ кгродъскихъ без правдивое обложное хоробы, або властное пилное потребы своее в другомъ повете на рокохъ не маючи, рочковъ судовыхъ омешкалъ або неслушне розоръвалъ, а то бы се до трехъ разовъ на него показало, таковый врядъ свой тратить. А воеводове, старостове повинни будуть такого непильного и недбалого врядника своего, кгды то на него правне доведено будеть, с того вряду зложити, а на тое местъце инъшого уставити.

Артыкулъ 39.

О кривдахъ в речахъ крвавыхъ, суду кгродскому належачихъ, кому бы се деяли от воеводъ, старостъ судовыхъ и ихъ врядниковъ кгродскихъ судовыхъ зъ ихъ оселостей.

Постерегаючи мы, г[о]с[по]д[а]ръ, того, абы всимъ подданым нашимъ однакая и ровная справедливость одному з другимъ деялася, уставуемъ, ижъ где бы хто з воеводъ, старостъ [у арыгінале: староствъ] судовыхъ албо зъ их врядниковъ судовыхъ кгродскихъ, наместникъ або подстаростий, будь тежъ судья або писаръ, маючи именья в том же повете, где они суть врядниками судовыми, а с тых такихъ именей своих кому якую кривду в речахъ крвавыхъ и што кгродскому суду судит[ь] прислухаеть, будь сами або их врядники, слуги, бояре и подданые учинили, а они бы зъ своихъ слугъ подъданыхъ справедливости о то укривжоному вделати не хотели, тогды воеводове, старостове сами о то мають быти позывани с тых именей своихъ до инъшого близшого вряду и суду кгродъского того повету, с которимъ будеть о границу з оным другимъ поветомъ, в которомъ ся што будеть стало, кладучи позвы через возного того жъ повету, с которого и позвы выйдуть, на томъ именью ихъ, с которого се кривда дееть. А врядъниковъ ихъ судовых, естли жалобная сторона не схочеть до воеводы и старосты позвати, тогды волно ей будеть позвати такожъ, яко вышей описано, до другого прилеглого суду кгродъского. А воеводове, старостове и ихъ врядники в ономъ другомъ повете, не вымовляючисе вызваньемъ з своего належного повету, повинъни будуть передъ тымъ другимъ урядомъ за позвы становитисе и росправу в такихъ речахъ водлугъ права приймовати. А зостанут ли в чомъ с права виньни, тому тотъ же врядъ, которий судилъ, и отправу на нихъ и оселостяхъ ихъ водлугъ порадъку сего статуту чинити маеть. Оповеданье тежъ и записыванье тыхъ кривдъ и всякихъ иныхъ поступковъ правныхъ маеть быти чинено, где жалобная сторона похочеть—або в том же кгроде того повету, где се што станеть, або на том же другомъ уряде, до которого и позван[ь]е в семъ артыкуле указано.

Артыкулъ 40.

О поправенью облуженья або сказни неправъное вряду кгродъского и земъского, за нестаньемъ стороны позваное учиненое, и о недопущенье апеляцыи, гдѣ о то врядъ позывати.

Тежъ уставуемъ: где бы се то притрафило, жебы врядъ кгродъский або земъский в нестанью стороны позваное, за упорнымъ сказанемъ своимъ, неправне або в такой речи, которая бы суду его не належала, далъ кому отправу, увезанье в ыменье [у арыгінале: в ыйменье] або в который колвекъ кгрунътъ, або бы очевисте сторонамъ, у суду стоячимъ, в недопущенью апеляцый сторона которая собе кривду от вряду менила, тогды о такие речи судъ земъский, толко судья а подъсудокъ мають быти позвани на рокъ завитый пѣредъ судъ головный. А о кривду в сказанью судовомъ писаръ такъ земъский, яко кгродский позываны быти не мають и за судъ отказывати не будут повинъни, кгды жъ они моци до чиненья выроковъ не мають. А хотя бы были и позвани, тогды становитисе не будуть повинны, одъно ж где бы который писаръ в омылце або недоложен[ь]ю якого писан[ь]я был обвинен, таковый о то такежъ позыванъ быти может до суду головного. А вряд кгродский в таковом обвинен[ь]ю мает быти ку росправе притягиван до того суду и тым порядком, яко о том вышей в арътыкуле сего жъ розделу естъ описано. А естли бы се з очивистого мовенья стороны жалобное з урядомъ тое неправное сказанье которого вряду показало, тогды таковая сказнь маеть быти поднесена и на сторону отложона. И такъ укривжоному маеть быти вывезанье дано и оное именье або кгрунтъ отсужоный зася ему приверъненъ. А тому, кому за токовымъ [!] неслушнымъ сказаньемъ увязанье было дано знову волное мовенье з стороною, естли онъ похочеть, маеть быти заховано. Также и тому, с чюего [!] держанья именье вынявши, тому, хто неслушне право перевелъ, подано о шкоды, которие се стали за держанья его, у суду належного зъ стороною волное мовенье будеть. А к тому стороне той, противъ которой первей сказанье было вчинено и увязанье бы в маетность его дано, виненъ будеть такий врядъ, которые позвани и в томъ винъными найдены будуть, вины дванадцать рублей грошей там же у суду заплатити. Пакли ж бы з розъсудку суду головного противъ врядниковъ земъскихъ або кгродъскихъ або тежъ з суду воеводъ, старостъ судовыхъ противъ ихъ врядниковъ нашлосе то, же сказнь врядовая слушне через нихъ вчинена, тогды тотъ упоръный, который судъ рушилъ и ку волоките невинъне приводилъ, маеть вины тымъ врядникомъ судовымъ, которые от него будуть позвани, дванадъцать рублей грошей там же у суду заплатити. А судъ ихъ правный ку выконанью своему, водлугъ права привожонъ быти маеть. Ведъ же от воеводъ, старостъ и в таковой речы апелевати до суду головного вольно будеть.

© Алег Ліцкевіч, 2010