Дакументы: Статут Вялікага Княства Літоўскага 1588 г. Раздзел 4. Арт. 41-50

Артыкулъ 41.

О злый переводъ права через сторону и гдѣ о то позвати.

Хто бы противъ кого право якое такъ у суду земъского, яко и кгродъского и в которого кольвекъ иного вряду якимъ форътелемъ або омылъкою якою справою заочне, за нестаньемъ стороны позваное, перевелъ, будь рокъ який неправдивый, змышленый в неведомости стороны противное утворившы, або на якую речъ за записы якими змышлеными, неправдивыми, сказанье врядовое одеръжавши, тогды тотъ, противъ кому сказанье выйдеть, можеть о такий злый а неправдивый переводъ права до того жъ вряду, передъ которимъ будеть право переведено, сторону противную позвати. И кгды се в томъ виннымъ с права окажеть, тогды тотъ судъ перший маеть быти подънесенъ и внивечъ оберненъ. А тотъ, хто змышленымъ обычаемъ право переводилъ, за тую вину маеть седети в замку албо в дворе нашомъ судовомъ дванадъцать недель, а стороне своей противной дванадъцать рублей грошей заплатити. А то в речахъ такихъ, где горъла не заслужить. Ведъ же естли бы се на томъ праве оказалъ який фалшъ и подъступокъ значный, явный, за што бы слушнѣ водле права мелъ быти горъломъ каранъ, тогды такового вряд маеть судити, сказовати и карати водлугъ сего права посполитого и выступку его. Пакли ж бы тотъ, хто позоветь о злый переводъ права, тое жалобы своей не довелъ, але бы тое позванье чинилъ ку зволоце справедливости, а тое бы ся противное стороны поступокъ перъший слушный правный оказалъ, тогды сам тотъ жалобникъ оной противъной стороне своей также вины дванадъцать рублей грошей маеть заплатити и на замку або в дворе нашомъ дванадъцать недель седети. А оному суду перъвшому маеть отправа быти чинена водлугъ сказанья и права посполитого. А гдѣ бы хто, о злый переводъ права припозвавши в речахъ крвавых, гдѣ пойдеть о горъло, менилъ то, же ему о позве ведомость не дошла была, тогды маеть на томъ присегнути, же его ведомость о позве не дошла, и по присязе от перъвшого сказанья воленъ будеть, а на речъ самую тамъ же заразомъ отказовати маеть. А то се маеть розумети о заочномъ положенью позву.

Артыкулъ 42.

Роки завитые в которыхъ речахъ мають быти складаны у суду земъского.

Напервей, хто кого позоветь о заставу ку бранью п[е]н[е]зей, хотя сторона позваная не станеть на роки первшие, тогды предъсе судъ не маеть откладати на далшие другие роки. Але на перъшомъ року яко на завитомъ, первой выслухавши доводу стороны поводовое, яко о томъ нижей описано, тожъ маеть всказанье учинити и въвезанье стороне поводовой дати, взявши от него п[е]н[е]зи до вряду, и при книгахъ судовыхъ мають быти положены до того часу, ажъ сторона позваная ихъ озметь. Другое: о выбитье з дому зъ спокойного мешканья и отнятье именья, людей и всякихъ кгрунътовъ, где бы омешкалъ або не хотелъ о то до кгроду позвати. Третѣе: о всякую речъ сужоную рокъ завитый за перъвшим позвомъ. Четвертое: о слугу якого жъ кольвекъ стану або чоловека, або челядина домового, который бы от пана своего такъ шкоду учинивши, яко и не зашкодивши, прочъ утекъ. Пятое: о мыто, о мостовое, о гребелное, торговое и перевозы князские, паньские и шляхетъские, также и всякихъ становъ, естли хто на комъ або на подданомъ чиемъ мыто неслушне возметь або шкоду якую учинить. Шостое: хто бы езами або млынами, гатми, мостами реки портовые гамовалъ, проходу або дороги слушное не вчинивши, а за тымъ бы се шкода кому стала. Семое: естли ся хто кому добровольне описалъ и рокъ в листе своемъ ознаймил, а не учинилъ бы тому досыть. Осмое: о розделъ именей и маетности всякое межи брат[ь]ею и сестрами, и близъкими, также и з опекунами детемъ лѣтъ дорослымъ, за первшыми позвы маеть быти рокъ завитый. Девятое: на поручника и на приказъцу. А поручнику и приказъцы зъ истъцомъ, по комъ ручилъ, маеть быти завитый рокъ. Десятое: о выеханье на кгрунтъ вряду подкоморъского и комисаръского. Одинадъцатое: о обельживость возныхъ на справе уряду ихъ. Дванадъцатое: о кривды подъданыхъ г[о]с[по]д[а]ръскихъ от шляхты, гдѣ права майдебуръского нетъ. Третѣенадъцать: о вдове утратъной, на вдовимъ столцу будучой. Четвертоенадъцать: о вины нашы, г[о]с[по]д[а]ръские, врядовые и сторонамъ належачие. Пятоенадъцать: о головщины людей стану простого. Шеснадъцатое: о бранье пересудовъ и потуремного надъ уставу статутовую через кн[я]зей, пановъ, шляхъту и врядниковъ ихъ и о вину на подъкоморого. Семнадъцатое: о грабежъ вшелякий и о заплату испаши. Осмънадъцатое: хто бы под часомъ роковъ який збытокъ учинилъ и, не росправивъшисе, уехалъ. Деветнадъцатое: о кривды от врядниковъ г[о]с[по]д[а]ръскихъ зъ их врядовъ, одно не о добра, столу нашому належачихъ, и о оборону ихъ, яко о томъ въ инших арътыкулехъ естъ описано. Двадъцатое: о полюбовъный судъ. Двадъцать перъвое: о выбитье або отънятье з деръжанья по увезанью. Двадъцать второе: о загамованье листовъ отвороныхъ. Двадъцат[ь] третѣе: о кривду подъ часомъ военънымъ вчиненую. Двадъцат[ь] четверътое: о дохоженье долъгов по змеръломъ должнику на именьяхъ спадъковых оного змерълого водлугъ арътыкулу осмънадъцатого в розделе семомъ. Двадъцать пятое: о навезку за выводомъ шляхетъства водлугъ арътыкулу пятьдесятого в розделе одинънадъцатомъ. А в тыхъ всихъ речахъ, тымъ рокомъ завитымъ подъданыхъ, в семъ артыкуле и тежъ въ иншыхъ арътыкулехъ сего статуту описаныхъ, за позвы земъскими рокъ маеть трвати, водле давного обычаю права, до третего дня такъ позваной, яко и поводовой стороне. А гдѣ бы которая сторона через три дни за воланьемъ возного безъ причинъ правныхъ, в семъ статуте замероныхъ, не стала, тогды вжо в той речи, на позве описаной, упадаеть и вечне то стратить, абовемъ моцъ роковъ завитыхъ у суду земъского и кгродъского такую хочемъ мети, ижъ кождого стану чоловекъ, будучи позваный на рокъ завитый, не можеть се на року завитомъ большими справами въ инъшихъ поветехъ и никоторими иными причынами вымовляти, окромъ трехъ причынъ, то естъ хоробы обложоное и послуги нашое, г[о]с[по]д[а]ръское, земское, в семъ статуте менованое; а третяя причина: естли бы се коли то трафило, жебы одна особа в речахъ крвавыхъ до двухъ судовъ кгродъскихъ была позвана, яко о томъ въ артыкуле двадъцать семомъ сего жъ розделу ширей ест описано. Ведъ же и тая обмова противъ року завитому толко на одныхъ рокохъ и за одными первшыми позвы маеть быти допущона, а на другихъ рокох або рочкохъ кгродъскихъ вжо се и тыми причинами вымовляти нихто не будеть мочи, але албо самъ албо черезъ умоцованого у суду становитисе и росправити повинен будеть, вынявши то, естли бы хто, будучи отосланъ на послугу нашу, г[о]с[по]д[а]ръскую, земъскую зъ границъ паньствъ нашихъ, не могъ се оттоль боръздо звернути, таковому до зверъненья с послуги нашое и земъское фолькга в праве чинена быти маеть водле сего статуту. А гдѣ бы тежъ сторона позваная без причын правныхъ, вышей мененыхъ, не стала, таковая речъ свою, о што позвана, тратить, и суд на таковомъ за доводомъ правнымъ то, што в позве описано, сказати маеть. Такъ тежъ и поводовая сторона, позвавъшы на рокъ завитый, сама не стала и року своего не пилновала, таковая также речъ свою, о што позвала, вечне тратить.

Артыкулъ 43.

О позвехъ наших земскихъ и кгродъскихъ, и якъ долъго трвати мають.

Уставуемъ тежъ, ижъ кождые позвы уряду земского и кгродъского, такъ тые, которыми бы не позвано, и яко и тые, которыми бы позвано, далей трвати и в моцы своей быти не мають, толко на одны роки судовые земъские албо рочки кгродъские, передъ которыми ихъ взято. И для того тые роки земские и рочки кгродъские, на которые се тыми позвы позывати будуть, в оныхъ позвехъ меновите мають быть описаны, окромъ того, естли бы по заложенью позвовъ роки земские або рочки кгродские сполъзли не сужоные за войною або поветреемъ, або за иншыми якими с часомъ припалыми причинами, о чомъ естъ нижей въ артыкулехъ сего жъ розъделу описано.

Артыкулъ 44.

Хто бы кого от суду належного до иного повету албо вряду и суду вызвалъ.

Уставуемъ, хотечи мети, абы нихто никого от суду належного до другого вряду и суду, то естъ яко о речи, земскому суду належачие, до вряду кгродского, такъ о речы вынятые на кгродский судъ, до земъского вряду и тежъ с повету в ынший поветъ, ани до комисаръского, подкоморъского и жадного иньшого суду неприналежного, также ани перед насъ, г[о]с[по]д[а]ра, ани перед судъ головный надъ сесь статутъ и порядокъ его и тежъ надъ артыкулы оного головного суду постановеные не смелъ вызывати. А хто бы то учинил, а до инъшого вряду и суду належного кого вызвалъ, тогды позваный толко ведомость вряду тому, до которого будеть позванъ, о таковомъ непорядномъ и неслушномъ позванью самъ або черезъ посланъца своего, на то умоцованого, маеть дати и обмову в томъ учинити. А таковыхъ позвовъ послушонъ быти и стороне за ними отказывати не будеть повиненъ, але еще тотъ, хто таковые позвы озметь и ими позоветь, за то, же мимо судъ свой належный смелъ то учинити, маеть заплатити вины тому вряду, отъ которого вызвалъ, копу грошей, а стороне—три рубли грошей. А то в тотъ часъ, кгды бы жалобникъ повторѣ о тую жъ речъ позвалъ и тые вины тотъ врядъ належный мает собе и стороне отъправити заразомъ, не позываючи о то, где бы оселый в томъ же повете былъ, тогды на оселости его. А естли бы оселости в ономъ повете не мелъ, тогды на маетности его рухомой. Пакли ж бы жалобникъ, позвавъши до суду належного, самъ не сталъ, а позваный становилсе, тогды предъсе позваному волно будеть о тую вину оного жалобника позвати на рокъ завитый до суду земъского з оселости его, в которомъ колвекъ повете мети ее будеть. А врядъ винѣнъ будеть ему тую вину сказати и на оселости его отправити, окромъ того, хто бы записомъ своимъ листомъ властнымъ, отступуючи повету албо которого суду своего належного, въ який иншый судъ доброволне ся вдалъ и опроч тое причины, которая ув ыншихъ артыкулехъ допущаеть с повету вызвати.

Артыкулъ 45.

О таковыхъ, которые бы, не маючи в которомъ поветѣ оселости, другого оселого позвалъ, а шло бы имъ обудвумъ сторонамъ о одну речъ, такъже и о томъ, который нигде оселости не маеть.

Тежъ уставуемъ: коли бы хто, не маючи в которомъ поветѣ оселости, другого кого там оселого позвал, а шло бы имъ обудвумъ сторонамъ о одну речъ, тогды тотъ позваный оселый можеть заразомъ не отповедати и в право сѣ не вдавати, аж бы се тежъ онъ противникъ его неоселый тамъ поддалъ и обвезалъсе листомъ своимъ и сознаньемъ перѣдъ врядомъ ему в томъ, гдѣ о одну речъ идеть, тамъ же у его поветѣ отповедати и усправедливятися [!], не отзываючисе и не беручи собѣ до суду и повету своего. А кгды ся поддасть под тое и обвяжеть, тогды предъсѣ оный позваный за тыми жъ позвы на оный же часъ наперѣдъ будеть ему повиненъ усправедливитися. Пакли ж бы тотъ приеждчый жалобникъ зъ иншого повету, одеръжавшы собе справедливость, а позваному зася не усправедливившися, прочъ от суду от[ъ]ехалъ, тогды тотъ судъ и сказанье, ему вчиненое, не маеть быти ему выконывано. А естли бы хто нигдѣ в томъ паньстве, великомъ князстве литовском, оселости не маючи, оселого в которомъ повете позвалъ, а позваный бы до него, будь о тую жъ речъ албо о которую иншую дело мелъ, тогды таковый маеть напередъ по собе паруку оселого в томъ же повете дати, ижъ нигдѣ индей, одно на томъ же уряде стороне своей противной усправедливятися заразомъ скоро по своем праве будеть повиненъ. А гдѣ бы по своем праве уехалъ, не росправившисе з стороною противною, тогъды такежъ сказанье оное перъшое ему вделаное, до выконан[ь]я привожоно быти не маеть, а речи своее позваный местъцо истъца на паручнику искати тамъ же заразомъ маеть. А гдѣ бы и поручникъ не росправившисе уехалъ, тогды з нимъ за позвомъ справедливости доводити собе будеть у суду належного.

Артыкулъ 46.

О рокохъ, которые судья, подъсудокъ и писаръ зъеждчатисе и позваные передъ ними становитисе повинни, а подъ которымъ часомъ роки сужоны быти не мают.

Тежъ уставуемъ, ижъ суды земъские мають быти трикроть до году, то естъ трои роки судовые, на которые будуть повинъни судья, подъсудокъ и писаръ на одно местъце в кождом воеводъстве и повете, а в земли Жомоитъской такъже на местъца певные, судомъ назначоные, зъеждчатися и тамъ такъ долго мешкати, поки вси справы судовые отсужоны и сконъчоны быти могуть. А в которомъ повете на двухъ местъцахъ роки земские отсужованы бывають, тогды и до тыхъ местцъ вряд приехавшы по тому жъ ся около мешканья на отправу судовъ заховати маеть, яко о томъ вышей в семъ же арътыкуле описано, прызнаваючи кождому позванью очывистому и заочному рокъ передъ кождыми роками водле артыкулу осмънадъцатого в сем же разделе. А часъ приеханья всихъ трехъ урядниковъ на другое местъце судовое от початья роковъ земъскихъ в чотырох неделях. А позванье и поводъ будуть повиньни перед ними се становити обычаемъ и способы, в особливыхъ арътыкулех описаными. А роки мають быти сужоные: первшые о светой тройцы рымского свята и назавт[р]ее ся в понеделокъ почнуть, а другие — ув осень на день светого Михала рымского свята, и так же се назавтрее почнуть; третие — на день и свято трех кролей зиме и так же ся назавтрее почнуть. А потомъ в другом году, также на день светое тройцы рымского свята назавтрее се почнуть. А суд[ь]я, подсудокъ и писаръ мають суды справовати и на суде седети кождого дня, кромъ недели, от поранку до нешпорное годины. А позвы судити порадне з рейстру, не глядечи [!] на особы а не фолькгуючи в томъ никому, але который первей уписался в рейстр, тотъ наперѣдъ сужонъ быти маеть. А ведь же подъ тымъ часомъ роки сужены быти не мають, перъшое: если бы послуга наша, г[о]с[по]д[а]ръская, земъская, военъная з сойму валного посполитымъ рушеньемъ была уфалена и листы бы наши военъные зашли, ино для готованья на войну за шесть недель не мають быти роки сужоны, то естъ перѣдъ часомъ збиранья войска [у арыгінале: вомска] зложонымъ, а где бы часъ певный и местъцѣ збиран[ь]я войска в листехъ наших не было ознаймено, толко о готовость на войну листы высланы были, тогды предся роки мают быт[ь] сужоны. А кгды бы такъ с тое причины за войною роки сужоны не были, тогды по войне, на первшихъ рокохъ, водле статуту припалыхъ, мають ся стороны, знову припозвавшы, росправовать. Другое: естли бы, чого боже уховай, в которомъ повете поветрее моровое было, а то бы се значне показало, подъ такимъ часомъ в ономъ повете такъже роки не мають быти сужоны; а по томъ часе, яко поветрее оминеть, маетъ врядъ судовый земъский в ономъ повете другие роки судовые, в статуте описаные, близъко припадаючие, судовне, отправовати. А на тыхъ рокохъ мають стороны, знову припозвавшися, росправовати. То ж ся маеть розумети и [у арыгінале другое о] о такихъ рокохъ, которые бы не были сужоны за зейшстемъ з сего света которого врядника судового. А также где бы ся то трафило, жебы в томъ часе межы роковъ хто с которое стороны, будь жалобное або позваное, умеръ, тогды с тое причины позовъ маеть быти отновленъ водлугъ потребы, албо естли бы сторона жалобная сама хотела и при животе позваного позовъ отменити и на нимъ ся поправити, то ей волно будеть.

Артыкулъ 47.

О суженье роковъ земъскихъ и рочковъ кгродъскихъ подъ часомъ соймов вальныхъ и о обранью врядника судового в посельстве.

Забегаючи продлуженью непотребному справедливости людъской, уставуемъ, ижъ подъ часомъ соймовъ вальныхъ роки земские и рочки кгродъские и иные всякие суды отправованы и сужоны быти мають, одно вынемъшы тыхъ особъ пановъ радъ нашыхъ, которые бы на съемъ вальный ехали, такъ тежъ которые бы справы судовые, соймови належачие, передъ нами, г[о]с[по]д[а]ремъ, на сойме мели, будь за мандаты або позвы нашими дворъными. И тежъ послы с кождого воеводъства и повету и земли Жомоитъское, будучы на съемъ вальны [!] от обывателей с поветовъ на соймикахъ обраные и посланые от судовъ всякихъ, подъ соймомъ волни будут, ажъ поки ся з сойму зверънуть. Однакъ же кождый такий маеть ся суду и стороне листомъ своимъ отворонымъ с печат[ь]ю своею и с подъписомъ руки своее, а хто писати не умееть, за печат[ь]ю своею и з двема печатьми людей сторонъныхъ шляхъты черезъ приятеля або слугу своего обмовити. А потомъ предъся тот, хто на сойме валномъ при нас, г[о]с[по]д[а]ри, яко ихъ м[и]л[о]сть панове рада и послове або и инъшые станы, которые справы свои на дворе нашомъ за мандаты або за позвы маючие будуть, естли бы на первшыхъ рокохъ земъскихъ або рочкох кгродъскихъ, водлугъ порадъку статутового по ономъ сойме припалыхъ и судовне отправуючихъ, о бытности своей на сойме або о справахъ своихъ, которие на сойме валномъ мели и судовне отправованы были, сведецъства на писме с канъцляреи нашое не показали, тогды за другими позвы на другихъ рокохъ нестанъное платити, а на речъ самую з стороною росправу прыняти повинъни будуть. А где бы шло о речи, завитому року подлегълые, в семъ статуте в особливыхъ арътыкулехъ описаные, тогды врядъ сказанье за тыми ж позвы на другихъ рокохъ, по сойме напервей судовне отправуючихъ, стороне поводовой кромъ доводу учинити и отправу черезъ возного, яко на непослушного, вделати маеть. Пакли жъ бы которого зъ урядниковъ земъскихъ на соймику посломъ на съемъ великий валный обрано, тогды на местъце такого врядника, в посельстве обраного, мають заразъ на томъ же соймику або на рокохъ земъских шляхъта, рицеръство посполъ з урядниками, тамъ на соймикъ або на роки прибылыми, иншого кого шляхътича оселого, спросталого, ку отправованью тыхъ роковъ, подъ соймомъ прыпадаючыхъ, до зверъненья того врядника обрати. Который обраный шляхтичъ, присягнувшы на справедливый судъ, будет мети моцъ зъ иншими позосталыми врядники тые роки судити и отправовати. А гдѣ бы не хотелъ присягнути, тогды роки сужоны быти не мають. Где бы тежъ обранъ былъ посломъ которий врядникъ судовый кгродъский, на того местъце воевода або староста маеть иншого шляхътича оселого засадити и того листомъ своимъ шляхъте на рочкох ознаймити. А тотъ обраный такежъ виненъ будет на справедливый судъ присягнути.

Артыкулъ 48.

Которымъ бы се деяли якие кривды от врядниковъ, слугъ, бояръ и подданыхъ чиихъ кольвекъ.

Уставуемъ: естли бы кому от чиихъ колвекъ врядниковъ, слугъ, бояръ и подданыхъ якие кривды, шкоды в речахъ поточныхъ, кромя забранья кгрунтовъ, деялися, тогды маеть сторона жалобливая взяти от писара земского позвы, в которыхъ, описавшы всю жалобу свою, того докладат[ь], абы ему с тыми обвинеными рокъ праву зложил и справедливост[ь] вделалъ. А гдѣ бы року зложит[ь] и справедливости вделати не хотелъ, абы за тыми жъ позвы ку праву самъ сталъ и тых, на кого жалоба идеть, у права поставилъ. А то в тыхъ речахъ, которые земъскому суду належать, от земъства, а што кгродскому суду, то также з кгроду позвы таковые браны быти мають, и с такими кождыми позвы маеть укривжоный ехати або слати з вознымъ до того пана, от чиего врядника, бояръ, слугъ и людей кривъды кому ся деяти будуть, справедливости просечи. А кривды и шкодъ своихъ рейстръ дати маеть, звлаща если бы се на самомъ позве меновитѣ не доложилъ. А гдѣ бы самыхъ пановъ в тыхъ именьяхъ ихъ, с которыхъ кривда деется, не было, ино до врядниковъ ихъ, абы они на слугъ, бояръ и людей пана своего справедливость чинили. А где бы возного с такимъ позвомъ у дворъ не пущоно або и пустившы в дворъ, панъ самъ, або врядникъ албо тивунъ, не оказали бы се возному, тогды оный позовъ маеть быти черезъ возного покладанъ на именью томъ, с которого ся кривда дееть, тымъ порядкомъ, яко о покладан[ь]ю позвовъ естъ доложоно. А рокъ праву за такими позвы не маеть быти дальшый от нихъ покладанъ, одно чотыри недели от поданья або положенья того позву. И на томъ же именью, где позовъ будеть положонъ, справедливость чинена быти маеть. Естли бы тежъ сторона тая, которая такимъ позвомъ обнесена будеть, похотела чинить справедливость стороне и ближей, нижли за чотыри недели, маеть черезъ возного листомъ своимъ отворонымъ сторону жалобную обослати, упевняючы его в томъ, ижъ хочеть ему справедливость учынити водле оного позву. Ведъ же не ближей толко за две недели передъ оным рокомъ тое обосланье чынено быть маеть. И будет ли хто за таковымъ позвомъ справедливости на именью своемъ самъ панъ або его врядникъ чинити, тогды того суда своего маеть стороне своей листъ свой судовый подъ печатью своею и под печатьми людей сторонъных и возного, которые бы на томъ праве были, того жъ дня а надалей дозавтрея по сконченью права дати. А где бы листу судового хто не далъ албо хотя бы и далъ, а сторона не хотела бы в онъ часъ заразомъ на томъ суде албо и листе судовомъ перестати, менечи собе уближенье в суде албо в писанью листу судового, тогды возный, которий на такомъ праве будеть, маеть то до книгъ сознати, якъ ся тое право точило, и тымъ ся сторона поводовая у права подъпирати маеть. А естли жъ бы яко панове сами, такъ и врядники ихъ, очевисте будучы такъ упомнени, року праву зложыти и справедливости учинити не хотели, тогды за онымъ же позвомъ повиненъ будеть на рокохъ становитисе и в томъ се усправедливити. А пакли бы заочне тотъ позовъ на именью положонъ былъ, тогъды сторона жалобная маеть от положенья позву за чотыри недели, хотя бы и рокъ не былъ зложонъ, до того именья ку довоженыо собе справедливости ехати албо кого з моцъю от себе ку праву слати. Если жъ бы тотъ панъ албо врядникъ, тивунъ его, на тотъ рокъ справедливости не учинилъ, ино сторона позваная маеть о речи, земскому суду належачые, у земского суду, а о речы, прислухаючые на судъ кгродъский, у вряду кгродъского становити, и тыхъ, от кого кому крывды будуть деяти, поставити. А ведъ же в небытности того самого пана, с чиего имен[ь]я крывда се дееть в томъ именьи, не маеть его сторона жалобливая нигде инде искати, але на том же именьи, с которого се кривда дееть, позвы таковые положити маеть. А врядъ, передъ которий се то приточить, будеть повиненъ межи ними того досмотрети и справедливость учинити. А где бы позваный самъ або черезъ умоцованого своего стати и тыхъ врядниковъ, бояр, слугъ и людей своихъ, кому вина дана, поставити не хотелъ, тогъды судъ повиненъ ку таковымъ непослушнымъ заховатисе водлугъ сего статуту. А естли бы тотъ панъ и хто жъ кольвекъ самъ або врядники ихъ рокъ праву зложили, а на томъ року зложономъ або тежъ за заочнымъ положеньемъ позву на року в чотырохъ неделяхъ припаломъ, вышей тутъ менованомъ, справедливости водлугъ права и сего статуту не учинили албо и учинивъшы справедливость, а отправы речи сужоное на виноватомъ не въделали, тогды такового пана и слугъ врядъ нашъ, передъ который ся то приточить, в томъ судити маеть. А онъ тому, кому обецавшы справедливость учинити на року от него зложономъ, также и на року, в чотырохъ неделях по положенью позву припалом, справедливости водле права не вделалъ або отправы суду своему не вчинилъ, повиненъ будеть заразомъ у суду перъвей, ниж в право вступить, рубль грошей стороне жалобной заплатити под таковою моцъю и повинностью, яко вышей о винахъ нестанъных естъ описано.

А ведь же если бы се то показало на праве, ижъ тотъ панъ чинил оному справедливость слушную, але онъ ее упоромъ своимъ нѣ принялъ и на ней не перѣставалъ и о то его ку суду притягнулъ, тогды того рубля грошей платити не повиненъ будеть. Але еще тотъ упорный самъ оному тотъ рубль тут же заразомъ у суду заплатити маеть. А доконченье тое справы самое, о што межи ними идеть, там же заразом черезъ врядъ нашъ розъсудкомъ правнымъ статися маеть. А где бы панъ того именья самъ або его врядникъ, будь при прошенью права за таковыми позвы албо на томъ року, вышей менованом, праву припаломъ, то естъ от положен[ь]я позву в чотырохъ неделяхъ, врядъника або слуги и подданого своего вырекъся, тогды волно будеть стороне поводовой шкодника своего увезде имати и, до вряду судового близшого притягнувшы, з нимъ, если бы неоселый под нами, г[о]с[по]д[а]ремъ, былъ, правомъ ся обыходити, а панъ его боронити не маеть. А если бы хто вырекшися врядника, слугъ, бояръ або подданыхъ своихъ, а предъся таковыхъ обвиненыхъ в дворе або на именью своем переховывалъ, а то бы на него было слушне у права перѣведѣно, таковый вси шкоды, в позве описаные, за доводом стороны жалобное самъ платити виненъ будеть. А то се маеть розумети о речахъ меншихъ а не крвавыхъ, а в речахъ крвавыхъ, если бы обвиненымъ шло о горъло, тогды врядъ маеть около того заховатися водлугъ артыкуловъ, в семъ статуте о томъ постановеныхъ и нижей описаных. Где бы ся теж то трафило, ижбы хто за обнесеньем позву з урадника, слугъ, бояръ або подданыхъ своихъ справедливости учинити кому не хотел, а тотъ бы або тые обвиненые въ якой кривде або шкоде по заложенью позву перъвей, нижли жалобникъ справедливости собе у суду нашого с паном ихъ и з ними доведет, померъли, и то бы черезъ поводовую сторону слушнымъ доводом было оказано и доведено, же перъвей за жывота тыхъ винныхъ право прошоно, тогды тотъ панъ самъ за доводомъ жалобное стороны на речъ самую, водле права учиненымъ, будеть ей виненъ о то, о што жалоба идеть, самъ у права отказывати и с права што будеть сказано самъ заплатити и нагородити, а собе на маетности оныхъ виноватыхъ того смотрети. А ведъ же въ инъшихъ речахъ, где не идеть о кривду, от врядниковъ, слугъ, бояръ и подъданыхъ водле сего арътыкулу учиненую, о большие важънейшые речы, о именья и о кгрунты мають быть листы упоминальные даваны от суду земского подъ печатьми судей земскихъ.

Артыкулъ 49.

О томъ, если бы ся кому якая крывда стала от чые жоны албо сыновъ, также дочокъ.

Уставуемъ: если бы ся кому стала якая кривъда в кгвалтехъ, наездехъ, боехъ, ранахъ, забийстве, грабежохъ и въ иныхъ якихъ речахъ от жоны чией або тежъ от сына такъ того, который бы уставичне дома пры отцы мешкалъ, яко и одъ того, который, хотя кому служечы, а на часъ до дому отцовского прыехавшы, и под онымъ часомъ мешканья своего на именью отцовъскомъ або пры матъце на ее именью властномъ або веновъномъ мешкаючы, а кому будь в дому отцовъскомъ, матъчиномъ албо тежъ с того дому або именья отцовского, матъчыного на домъ, на село, либо на кгрунтъ наехавши, албо теж на дорозе крывду, шкоду якую учинилъ, тогды укривжоный маеть у того, в чиемъ або з чыего именья то ся ему станеть, справедливости с того за листомъ упоминальнымъ врядовымъ водлугъ артыкулу вышъшого сорокъ осмого просити. А хто бы справедливости водлугъ права учинити не хотелъ, тотъ, будучи о то до суду належного, яко и о слугахъ и людяхъ вышей описано, позванъ, виненъ будеть самъ стати. И доведет ли жалобникъ того слушнымъ доводомъ або присягою, же ся то ему зъ его именья або в дому его от жоны або сына его стало, а онъ жоны або сына за позвы ку розъсудъку врядовому не поставить, то онъ самъ виненъ будет за жону и за сына такового кгвалътъ, навезъки и шкоды вси стороне поводовой платити. Если ж бы мужъ оселости своей не мелъ, а жона бы мела именье от него венованое або свое властное, тогды то, што за ее вину с права будеть сказано, на ее жъ имен[ь]ю, будь венованомъ або властномъ, отъправено быти маеть. А где бы шло о речъ крвавую, за што горломъ карають, а позваный бы обвиненыхъ в томъ передъ врядомъ ку праву не ставилъ, менечи, яко бы не мелъ ихъ у себе мети, тогды таковый маеть ся от того отпрысягнути, же то, што ся жалобной сторонѣ кривды якое стало, тогды ся то стало безъ ведомости, рады и позволенья его самого, также и на томъ, ижъ онъ тыхъ обвиненыхъ часу прошенья права о то за листомъ упоминальнымъ у себе в дому не мелъ и не за ведомостью его о таком ихъ учинку и безъ помочы а рады его з дому его зникнули, ани о нихъ ведаеть, а по такомъ отпрысяженью самъ от горъла и всего, о што обжалованъ, воленъ будеть. А поводовой стороне волно будеть тыхъ обвиненыхъ, где можеть бы в надолъжейшомъ часе, постигати и правомъ их водлугъ ихъ учинку поконывати. Так же ся маеть розумети и о дочце, паньне, и вдове, зятю и внуку, и каждом повиноватомъ неоселом, которые бы, мешкаючы пры родичохъ своихъ, кому в суседъстве кривду якую учинили, тогды такимъ же обычаемъ з ними справедливости доводити. Пакли жъ бы позваный в такой речы без прычынъ правъныхъ не сталъ, против таковому врядъ маеть сказанье чинити водлугъ сего права посполитого и важности року.

Артыкулъ 50.

Хто бы, маючи именье заставное або с права в презыску поданое, в суседъстве кому кгвалътъ албо шкоду вчинилъ.

Уставуемъ: где бы хто, маючи от кого имен[ь]е, собе в суме п[е]н[е]зей заставленое албо с права от вряду в презыску поданое, кому иному в суседъстве з особы его самого або слугъ его такъ в кгвалътехъ, боехъ, грабежохъ, яко тежъ отнятьемъ и привлащеньемъ собѣ до такового именья якихъ кгрунътовъ або пожитковъ и в ынъшихъ якихъ речахъ шкоду с того именья учинилъ, тогды укривъжоный, таковые шкоды осветчившы и оповедавши урядовне, мает з вечности самого дедича того имен[ь]я а заставника з сумы его обудвух однымъ позвомъ позвати, выписавшы в позве крывду свою, в чом се ему от того заставника албо в презыску держачого с того имен[ь]я деети будеть, жебы самъ с тымъ заставникомъ або в презысъку держачымъ сталъ, ему се усправедливилъ, а тые позвы на том же именью покладаны быти мають, который позовъ держачий такового именья виненъ будеть дедичу оного именья ознаймити, з нимъ сполне до права становитисе и в отказѣ быти. А вряд будеть моцонъ за перевѣденьемъ правнымъ отправу на том же именью, с которого ся кривда деяла, учинити. Ведь же за кривды и шкоды, от самое особы держачого або слугъ его починеные и с права сказаные, дедичъ оного именья платити не будеть повиненъ, лечъ тот же держачый платити маеть. А хотя бы укривжоному отправа на томъ именью была з уряду дана, тогды пры выкупенью [у арыгінале: выкупепью] оного именья дедичъ держачому, откладаючи его суму п[е]н[е]зей, таковую суму, за выступокъ его албо слугъ его присужоную, з сумы его вытрутити воленъ будеть. А где бы з ураду большая сума над суму того заставника сказана была, тогды то не на томъ именьи оного дедича, але на особе заставника отправлено быти маеть. По тому жъ где бы ся отъ бояръ и подданыхъ такового жъ именья, яко се вышей поменило, кому в суседъствѣ в чомъ колвекъ якие кривды деяли, тогды укривжоный, одеръжавши листъ напоминалный о вчиненье справедливости от суду належного, маеть оного деръжачого урядовне, яко в томъ наука въ арътыкуле сорокъ осмомъ сего розделу естъ описано, обънести. А кгды бы, деръжачы за листомъ упоминальнымъ, справедливости учинити не хотелъ, тогды и в таковой крывде укрывъжоный дедича и заставника оного именья позвати маеть, ижъбы самъ с тымъ деръжачымъ сталъ и тыхъ бояръ и людей, от кого крывда деетьсе будеть, поставилъ, и далей на нихъ справедливости доводити маеть, яко в томъ же арътыкуле сорокъ осмомъ сего розделу о ужыванье справедливости описано. Лечъ за крывды и шкоды, от бояръ и подданыхъ такового именья починеныхъ и с права сказаныхъ, держачому оного именья дедичъ з сумы его пры выкупенью ничого вытручати не маеть, але на винныхъ боярехъ и подданыхъ того смотрети собе будеть. А хотя бы хто не толко дедичное именье, але доживотное заставное и якимъ инымъ правомъ держачое, кому иншому заставилъ, тогды таким же обычаемъ в крывдахъ, с такого именья вделаныхъ, сужоно и росправовано быти маеть.

© Алег Ліцкевіч, 2010