Дакументы: Статут Вялікага Княства Літоўскага 1588 г. Раздзел 11. Арт. 1-20

Розделъ одинадъцатый. О кгвалтехъ, о боехъ, о головщызнахъ шляхетскихъ.

Артыкулъ 1.

Хто бы на чый домъ або на господу умысльне наехалъ, хотечы его забити.

Уставуемъ: хто бы на чый домъ шляхетский не только на самый дворъ, але и на гумно або на дворецъ, где быдло и иншое господаръство домовое бываеть ховано, кгвалтомъ умысльне наехавшы або нашедъшы, а в томъ дому кого кольвекъ забил и тымъ покой посполитый възрушылъ, а то бы на него было слушнымъ доводомъ водлугъ сего статуту переведено, тотъ горло тратить, а не толко самъ, але и помочники такового, хто з нимъ на томъ кгвалте будеть, также горъломъ карани будуть, звлаща, если бы тые помочники от того отпрысегнутися не хотели, яко о томъ нижей в семъ же розделе, артыкуле втором описано естъ. А головщизна водлугъ стану совито зъ именья того кгвалтовника и тежъ шкоды если бы которые на томъ кгвалте вчинены детямъ або близскимъ забитого, з навезкою плачоны быти мають. А если бы никого не забилъ, толко ранилъ, таковый за доводомъ слушнымъ самъ толко горъло тратить, а помочники его у вежы на дне, на головники постановлено[й] [у арыгінале: постановленоз], рокъ и шесть недель седети повинъни будуть, а навезка водлугъ стану и шкоды, которые бы ся пры томъ кгвалте стали, зъ именья того самого кгвалтовника з навезкою плачоны быти мають. А естли бы кгвалтомъ наехалъ або нашолъ, а никого не ранилъ, ани забилъ, а знаки предъсе кгвалту або шкоду якую учынилъ, тогды толко за кгвалтъ повиненъ будеть платити дванадъцать рублей грошей и шкоду з навезкою оправити за слушнымъ доводомъ, а горъла для нахоженья кгвалту не тратить. Ведъ же предъсе за тую вину кгвалтовную, кгды то на него от стороны жалобное доведено будеть, маеть в замку або в дворе нашомъ судовомъ того жъ повету дванадъцать недель также и с помочниками своими седети заразомъ скоро по сказанью врядовымъ. Ведъ же слуги пановъ своихъ за помочники розумены быти не могуть. По тому жъ естли бы хто кому в месте, або в дорогу едучы, на господу кгвалтовъне нашолъ а кого забилъ або ранилъ, або шкоду якую учынилъ, маеть быти сужонъ и сказыванъ тым же обычаемъ, яко вышей в семъ арътыкуле о кгвалте дому шляхетъского естъ описано. И кгды до росправы судовное в такой речы прыйдеть, а на тотъ одинъ рокъ помочники его не могли бы ку праву прытягнены быти, тогды обвиненый в головахъ кгвалтовникъ, не вымовляючысе небытностью помочниковъ своихъ, виненъ будеть усправедливитисе, а жалобной стороне волно будеть и потомъ с помочниками его правне о то чынити.

Артыкулъ 2.

О доводъ кгвалту, якъ жалобникъ мает осветчати, ожаловати.

Кгды бы се кому таковый кгвалтъ, яко вышей описано, от кого сталъ и на кгвалте томъ забитый былъ, тогды сторона, в том ображоная, скоро по оном кгвалте и того ж часу кгвалтъ и того забитого маеть оповедати и оказати околичнымъ суседомъ своимъ, а в небытности ихъ, ино врядникомъ ихъ, шляхте, людем добрымъ, а в недостатку шляхты, ино такъже околичнымъ суседомъ, хотя и не шляхте, толко людемъ добрымъ, веры годным, маеть оказати, а потомъ жаловати на враде нашом кгродскомъ судовомъ того повету, в которомъ се што станеть, и возного взяти и такъже ему оказати кгвалтъ и забитого. А тотъ кгвалтъ и жалобу в книги врядовые кгродские записати и к тому, трупъ тот на вряд привезши, тому вряду, кого з нихъ на местцу судовом зостанеть, оказати. А по оказанью вряду вжо тотъ трупъ, не ждучы конъченья права, яко то передъ тым чынено, можетъ быти похованъ. А то горачому учынъку и каранью, о нем описаному, шкодити не маеть, и у права, если бы ся ку оному кгвалту и забитому обжалованый не зналъ, тогды вжо тотъ жалобникъ близший будеть суседы околичными, ставечи их очевисте у права, и теж выписомъ сознанья возного на него доводити и при том доводе самотреть з шляхтичами, собе ровными, на томъ кгвалте присегнути. Если ж бы не могъ мети на тот часъ шляхтичовъ з собою ку присязе, тогды самъ, и з жо[но]ю своею, и з детми дорослыми, а не будет ли мети детей дорослых, ино и з жоною своею, и з слугами, и челед[ь]ю своею домовою самъпятъ маеть того кгвалтовника поприсегнути. А если бы господаръ домовый забитъ былъ, тогды жона его и дети, а не будет ли жоны або детей, тогды близские такимъ же порадкомъ и доводомъ того кгвалту зыскивати и доводити будуть. А по такомъ доводе тотъ кгвалтовникъ и помочники его караны будуть водлугъ арътыкулу перъвшого, в сем же розделе о томъ постановеного. А пакли бы помочники на горачомъ учинку не были пойманы, але, обвинеными в томъ будучы, до того не зналися, тогды не згола, але присегою отведшыся, волни быти мають. А если бы не прысегнули, тогды горъломъ карани будуть, яко и самъ кгвалтовникъ. А естли бы кгвалътомъ на домъ наехалъ, а не забилъ, толко ранилъ, тогды также маеть тотъ кгвалтъ оповедати и раны оказати околичънымъ суседомъ и на вряде кгродъскомъ оповедати и записати, яко вышей описано. И при такомъ доводе оного кгвалту и ранъного маеть такового кгвалтовника самъсемъ, з людьми добрыми, шляхтою поприсягнути. А кгды прысягнеть, таковый кгвалтовникъ и помочники его мають быти карани, яко естъ у вышъшомъ арътыкуле описано, а навезка водлугъ стану и шкоды за доводомъ з навезкою зъ именья его, а в недостатку именья лежачого з маетности его рухомое плачоны будут. Нижли естли бы шести светъковъ сполъна не мелъ, тогды з двема шляхътичами, людьми сторонъными, або в недостатку шляхъты з домовыми, яко вышей доложоно, одно жъ вжо самотреть присегнути маеть, а кгвалтовникъ за таковымъ незуполънымъ доводомъ горла не тратить, одно кгвалту дванадъцать рублей грошей, а навезку водле стану и шкоду за доводомъ з навезкою маеть платити. А за вину двадъцать чотыри недели у вежы на дне у везеньи седети. Пакли бы и на томъ доводе своемъ усталъ, тогды толко самъ ранъный на ранахъ своихъ маеть присегнути, которому по прысязе его навезка будеть сказана, а кгвалтъ и шкоды не мають быти сказываны. А где бы на ономъ кгвалте в дому никого не забито, ани ранено, толко одно шкода вчинена, таковый кгвалтъ также маеть быти осветъчонъ, яко вышей описано, а при томъ доводе у права на кгвалтовника маеть тымъ обычаемъ на кгвалте и на шкодахъ самотреть поприсегнути. Не будет ли мети шляхъты з собою ку прысязе, тогды з домовыми своими, яко вышей в сем арътыкуле описано, самъчетверътъ можеть прысегнути, хотя и з нешляхътою. А кгды прысягнеть, маеть быти кгвалт плачонъ дванадъцать рублей грошей и шкоды за доводомъ з навезкою оправити, а горъла не тратить, одно жъ предъсе за вину того кгвалту у везеньи дванадъцать недель седети маеть.

Артыкулъ 3.

О кгвалтъ костеловъ божихъ вшелякого набоженъства хрестиянъского.

Тежъ если бы хто, пришедши кгвалтовне на костелъ божий якого колвекъ набоженъства хрестиянъского, або тежъ на цвинтару, въ школе або в капланьскомъ, поповскомъ, казнодейскомъ дому кого забилъ або ранилъ, а тые бы раны значные и шкодливые были, тогды под таковым же способомъ и доводом маеть быти каранъ, яко вышей о [к]гвалтовникахъ домовъ шляхетскихъ написано. А если бы толко ударилъ, а раны не было, тогды совито кгвалт маеть платити, то есть двадцать и чотыри рубли грошей, и оного удареного навезати и то все заплативъши еще дванадцать недель маеть у вязенью седети в томъ повете, где ся станет.

Артыкулъ 4.

О кгвалтовнику и мужобойцы, который, забивъшы, зъ земъли утечеть.

Тежь если бы таковый кгвалтовникъ, забивъши кого в дому, в господе и на улицы, на дорозе и где ж кольвекъ, а будь заразомъ по том учынъку не будучи позванъ або и после позваня, такъ заочного, яко и очевистого, не становечисе на рокъ, за позвы припалый ку росправе, прочь с того панъства нашого, великого князства, утекъ або хотя бы с паньства нашого не утекъ, але бы се без причынъ слушъныхъ правныхъ ку праву за позвы не становилъ, тогды таковый самъ от вряду нашого маеть быти отосланъ на выволанье до нас, г[о]с[по]д[а]ря, а за головщизну навезки, шкоды, в позве описаные, врядъ, не откладаючи того на далшый часъ, але заразомъ стороне жалобной за доводомъ позву и року и за показан[ь]емъ толко оповеданья суседомъ околичнымъ, и на вряде учыненого, не слухаючы иншых далшыхъ доводовъ, одно для того нестанья обвиненого до сконченья права скутечного маеть дати увязанье в ыменье такого обвиненого. А где бы именье за головщину и за шкоду не стояло, однако жъ тое именье маетъ быти в той головщизне и в шкодахъ подано детемъ того забитого або кревнымъ. А тотъ обвинены[й] и выволаный всхочет ли се потомъ в томъ объжалованью за кглейтомъ нашымъ справовати, тогды маеть се в томъ заховати водлугъ артыкулу трыдцатого в розделе четвертомъ. И на праве естли бы се с того обвиненья выправилъ, тогды жалобникъ виненъ будеть ему именье его, в которое былъ от вряду за нестан[ь]емъ его увязанъ, поступити, а шкоды тые, которые бы за таковымъ увезаньемъ обвиненому в ыменью его сталися, и за омешканье роботы с права за слушнымъ доводомъ тотъ, хто обжаловалъ былъ, платити повиненъ будеть. Ведъ же такий обвиненый або выволаный маеть се в томъ чути и того се справовати надалей от выволанья до году и шести недель. А такъ вжо коли очывисте стороны стануть, которой стороне доводъ або отводъ врядъ чынити вскажеть кгрунтовне водлугъ права наконецъ, всякими поступками правными доводъ албо отводъ чыненъ быти маеть. А естли бы се в томъ часе до году и шести недель до справы не мелъ и кглейту нашого не бралъ, тогъды дети або близские забитого вжо тое именье стороны противное держати и вжывати мають дотыхъместъ, поки выволаного дети або кревные тую суму пенезей, от вряду имъ водлугъ позву сказаную, заплатять. А онъ самъ вжо вечнымъ выволанцом зостати маеть, нижли таковые дети або кревные мають тую суму пенезей откладати, которые того мужобойства не помагали. Естли жъ бы по выволанью тотъ кгвалтовникъ або забойца налезенъ былъ в томъ паньстве нашомъ, тогды на томъ враде, где будеть постигненъ, маеть быти каранъ яко кгвалтовникъ. А не будет ли хто постигалъ або фолдровалъ, тогды вряд нашъ, маючы певную ведомость о таковомъ выволаномъ мужобойцы або кгвалтовнику, маеть там же на томъ вряде своемъ, поймавшы, скарати, яко о томъ вышей описано. А в томъ часе, ним пойманъ и на вряде каранъ будеть, трафит ли ся кому колвекъ его забити, за такового выволанца забитье нихто головщизны платити не будеть повиненъ.

Артыкулъ 5.

О способе выволанья, якими словы маеть быти чынено, и о хованью ката на вряде кгродскомъ.

Кгды бы хто с подъданыхъ нашых народу шляхетъского якого кольвекъ стану, от найвышъшого до нанижшого, за выступокъ и непослушеньство свое впалъ в такую вину водлугъ сего права посполитого, за которую выволанъ быти маеть, тогды выволанье маеть быти на листехъ нашихъ выволаныхъ ознаймено и черезъ возныхъ на местъцахъ, тому водлугъ науки сего статуту пристойныхъ, чинено и оголошано тыми словы: "Кгды ж тотъ, именемъ .н[айме]., учинивъшы такий и такий учынокъ противко пану богу, зверхности г[о]с[по]д[а]ръской и праву посполитому, а будучы позваный, не становилъся, зверъхности его королевъское м[и]л[о]сти, вряду и права послушонъ быти не хотелъ, ани се становилъ на року усправедливенью поводовой стороне, в чомъ его обвинила, с тых причинъ его королевъская м[и]л[о]сть того .н[айме]., яко непослушного выволываеть с панствъ своих, зъ сполъку обцованья подъданыхъ своихъ, зо всих земль своихъ такъ, ижъ нихто з нимъ обцованья мети, ани его в дому своемъ переховывати не маеть, и с права того, с которого ся вси подъданые его королевское м[и]л[о]сти веселят, онъ веселитисе не маеть, ани его уживати до того часу, ажъ водле права посполитого, з ласки его королевское м[и]л[о]сти а за усправедливеньемъ се стороне его противной, засе до сполку и товарыства подъданыхъ его королевъское м[и]л[о]сти и до права посполитого приверненъ будеть. А в томъ часе, покуль выволанцомъ естъ, жона его маеть быти розумена яко вдова, дети его — сиротами, а домъ его пустый". В томъ тежъ повинъность кождого вряду судового кгродъского обовезуемъ, звлаща где права майдебуръского нетъ, ижъ мають и повинни будуть на врядехъ своихъ мистра, то естъ ката, ку каранью злыхъ своволныхъ людей, которые бы правомъ посполитымъ на смерть поконаны або на муку выдани были, жебы сторона поводовая, не ищучы и не набываючи ката зъ иншыхъ местъ, могла его зараз, на том же вряде, ку выконанью сказанья врядового мети. И естли бы который врядъ кгродъский в томъ недбалый былъ а ката пры своемъ вряде не мелъ, тогды часу потребы не сторона, але врядъ своимъ накладомъ будеть виненъ его, откуль можеть, набывати безъ жадное проволоки, а сторона толко то, яко давный обычай естъ, на местъцу кату платити винна будеть.

Артыкулъ 6.

О заморъдованье мужа або жоны на смерть промежку нихъ самыхъ.

Тежъ кгды бы з ненависти и немилости на обедве стороне такъ мужъ, яко и жона, будучи в ростырку, зъ якихъ колвекъ причынъ одинъ другого приправилъ о горло, замордовалъ або струлъ, таковое окрутеньство и замордованье дети або кревные того замордованого мають суседомъ околичнымъ того жъ часу, а потомъ и вряду оповедати и ожаловати, и инъстыкговати або фолдровати на кождого такового мордера. И при выведанью достаточном у суседовъ околичныхъ о зломъ якомъ мешканью и незгоде ихъ и при оказанью причынъ а знаковъ якихъ слушныхъ того мордерства або трутизны тые дети або близские, которые будут инъстыкговать, близшые будуть самотрети [!] зъ суседы околичными, шляхтою, а в недостатку шляхты — з слугами, с челяд[ь]ю домовою самопятый присегнути. И по таковомъ доводе обвиненый горломъ будеть каранъ. А хотя бы сынове або кревные не хотели фолдровати, тогды врядъ нашъ з местца своего маеть того особливе перестерегати и с пилностью около того выведатисе, и в околичныхъ суседовъ близскихъ о того замордованого опытъ чынити и, обравши семи шляхтичовъ, ку присязе привести, которые подъ присегою о томъ справедливе мають передъ врадом поведити [варыянт, пераноснае слова ў канцы слупка 401 на слупок 402: поведати]. И кгды тая семъ шляхтичовъ о того замордованого на кого присягнуть, таковый мордеръ безъ литости маеть быти каранъ горломъ тымъ способомъ, яко бы отца або матку забилъ. А где бы се в такой справе трафило, ижъбы сторона жалобная на доводе, верху менованом, устала, або за выведан[ь]емъ врядовымъ шляхта околичная присегнути не хотела, а предсе бы была ведомость и подойзренье злого ихъ мешканья в малженстве, и то бы суседи околичные посветчали, тогды однакъ тая особа обвиненая не згола маеть быти волна, але повинна будет с такъ же много особами, яко и жалобной стороне вышей описано, от того учынку отприсягнутися.

Артыкулъ 7.

О забойцахъ отца або матки, такъже о забитье дитяти через родича.

Уставуемъ: кгды бы сынъ або дочка отца або матку свою умысльне, зъ якое запаметалости забилъ и якимъ колвекъ обычаем родича своего о горло приправилъ, тогды таковый сынъ або девка, которая причиною своею о горло родича своего приправить, не толко горломъ маеть быти каран, але и почтивость, и вси именья, и мае[т]ность тратить на иншую братью, сестры або близкихъ своихъ, звлаща того учинку невинъныхъ. А такою карностью, смертью ганебною маеть каранъ быти: по рынку возечи, клещами тело [у арыгінале: тсло] торгати, а потомъ в мехъ скуреный всадивши, до него пса, кура, ужа, котку и тое все посполу в мехъ всадивши, и зашить и где наглубей до воды утопити. Тым же теж обычаем и помочники его, которыхъ онъ поволаеть або на нихъ правомъ переведено будет, мають быти карани. А если бы се трафило родичом дитя свое забити не с пригоды, ани за вину, але умысльне, тогды таковый отецъ и матка мають быти карани за тое годъ и шесть недель на замку нашомъ седети у вежы. А выседевши годъ и шесть недель, маеть еще до году чотыри кроть при церкви, при костеле якого набоженства християньского будеть покутовати и вызнавати явный грехъ свой перед всими людми собранья християнъского. А въ такой речи вряд кгродский виненъ инстыкговать и за выведаньемъ певнымъ винъныхъ такъ карати.

Артыкулъ 8.

Если бы хто брата або сестру забилъ.

Уставуемъ: хто бы брата або сестру забилъ в надею имен[ь]я або маетности рухомое, або якою кольвекъ направою о горло приправил, а то бы на него доводомъ слушнымъ переведено было, тогды таковый маеть быти каранъ горломъ. А тое именье, которое бы на него и на дети его прийти мело, спадываеть на иншую братью або на сестры, або тэжъ на стрыев и близкихъ в томъ дому тым же тэжъ обычаемъ. Естли бы зять забилъ шурина своего, тогды жона его, сестра того забитого, дети ее до именей по брате своемъ не маеть мети ничого. А тотъ, хто забилъ, маеть горлом каранъ быти. Тое ж право и на тыхъ, хто бы кровного своего забил, хотя и далекого в роду.

Артыкулъ 9.

Который бы слуга забилъ або ранилъ пана своего.

Тежъ уставуемъ: естли бы который слуга, вземши перед себе злый умыслъ, пана своего забилъ або ранилъ, таковый маеть срокго горломъ каранъ быти яко здрадца четвертованьемъ. А естли бы не забилъ, ани ранилъ, одно брони противъ пану своему добылъ, таковый руку тратить.

Артыкулъ 10.

О звадахъ.

Тежъ коли бы ся хто с кимъ звадилъ, а в оной зваде обадва се ранили, а одинъ бы с тыхъ позвалъ до права, а светковъ бы межи собою не мели, хто бы мелъ межи ними розознать, а одинъ бы другому не допустилъ на присегу, а обадва бы се брали ку присязе, тогды судьи мають имъ сказати жеребей кинути. А чый се жеребей напередъ выйметь, тотъ маеть присегнути на ранахъ своихъ и на початку звады и бою. А коли оный присягнеть, тогды тотъ тому, хто присягнеть, маеть за раны платити якого стану будеть. А естли шляхтича будеть навязывати, тогды еще в замку або в дворе нашомъ шесть недель седети. А где бы се ув оной зваде обадва забили, а не было бы светковъ на обе стороне, ино потомъки або близъские забитыхъ вжо головъщизъны на себе искати не мають. А естли ув одъное стороны раны будуть, а з другое стороны забитый, тогды при ономъ забитомъ тотъ, хто права доходить, близший будеть доводъ чинити, нижли при ранъномъ, и кгды будеть правомъ поконанъ, то естъ пры оповеданью врядовомъ саматреть [!] з детми або близкими забитого або тежъ з людми обчими, шляхътою, а не будет ли меть обчыхъ людей, ино и зъ слугами забитого або з своими, тежъ шляхтою; а в недостатку шляхъты слугъ, ино и с простого стану слугами попрысягнеть, такий забойца горломъ каранъ, а головщизна з ыменья его маеть быти плачона.

Артыкулъ 11.

О зваде вечерней.

Тежъ коли бы при якой вечерней зваде хто кольвекъ свечу загасилъ, а за тымъ бы албо межы тыхъ, которые се звадили, або з стороны иный хто, при той зваде будучий, по згашенью свечы употемъку былъ раненъ, а не ведаючы, от кого раненъ, позвалъ бы до суду того, хто свечу загасилъ, менуючи, жемъ я в той зваде раненъ, а не ведаю, от кого, за прычыною твоею, жесь свечу згасилъ, и на то бы доводъ учинилъ, же свечу згасилъ, а естли бы доводу не мелъ, а смелъ бы прысегнути, тогды тотъ, который свечу загасилъ, повиненъ ему раны платить. Такъ тежъ и о головщизну в таковой прыгоде хочемъ мети, абы сужоно, яко вышей в семъ арътыкуле о ранах описано, вед же доводечы хто головщизны шляхетское не самодин, але самътретей, яко вышей о доводе головщинъ шляхетъскихъ естъ описано, маеть присягнути, а тотъ, заплатившы раны або головщину а заседевъшы за голову шляхетъскую годъ и шесть недель на дне в туръме, маеть собе винъного искати.

Артыкулъ 12.

О кгвалтованье девки и невесты.

Тежъ уставуемъ: естли бы хто девку албо учстивую невесту якого кольвекъ стану усильствомъ зкгвалтовалъ, а оная девка або невеста за онымъ учынкомъ волала кгвалту, за которымъ воланьемъ люди бы прибегли на оный кгвалтъ, а она бы передъ ними знаки кгвалту указала, а потомъ бы оного ку праву притягнула и двема албо трема светками знаки кгвалъту пресветъчила, а к тому пры оныхъ светкахъ на томъ кгвалте своемъ на того сама присегнула, тогды таковый маеть быти каранъ горломъ, а навезка маеть быти з ыменья водле стану якого будеть. Пакли бы оная девка або невеста кгвалъту волала, а люди оные слышели, нижли на кгвалтъ не прибегли, а вед же по ономъ кгвалте скоро бы была волно пущона, а оповедаласе бы тым людямъ, а засе оного ку праву притягнула и тыми людми осветъчила и знаки кгвалту оказавшы, прысягу тежъ на томъ кгвалте учынила, тымъ же обычаемъ маеть каранъ быти, яко вышей описано. А естли бы она хотела его собе за мужа мети, то будеть на ее воли. А естли бы на таковомъ местъцу кгвалтъ такий сталъсе, где бы люди воланье могли слышеть, а девка албо невеста кгвалту бы не волала, а потомъ бы то людемъ оповедала, тогды тое оповеданье за кгвалтъ розумено быти не можеть, и тотъ помовеный от кгъвалту воленъ быти маеть.

Артыкулъ 13.

О кгвалтовное взятье в малъженьство девки, вдовы и кождое невесты.

Уставуемъ: хто бы без воли отца, матки и стрыевъ або инъшыхъ близскихъ, будь тежъ опекуновъ, на якомъ колвекъ местцу взял кого с тыхъ персонъ, вышей мененыхъ, кгвалтомъ, менуючы, ижъбы ему в малженъство пошлюбила, а то бы пришло передъ нас, г[о]с[по]д[а]ря, або передъ который врядъ нашъ, тогды таковая персона маеть первей взята быти до секвестру того вряду, передъ который се то приточыт, и маеть быти дана до росправы на хован[ь]е на таковое местъцо, где бы водлугъ стану своего при белыхъ головахъ учтиве хована была. И кгды се то покажеть с права, же яко приятелей кревныхъ або опекуновъ, такъ тежъ и ее самое на то позволенья не было, тогды тотъ, хто се того важылъ, маеть горломъ каранъ быти. А за навезку третяя часть всего именья его маеть спасти на тую персону, кгвалтомъ взятую, а шкоды, которые се будуть при томъ кгвалте стали, за доводом на двухъ частяхъ того жъ именья его маеть быти сказано, а хто бы именъя лежачого не мелъ, ино на маетности его рухомой. Нижли естли бы девка, укрившы то передъ родичами або приятелы своими, на тое малженьство и на взятье позволила и на праве то сознала, тогды таковая девка отпадываеть от выправы и от всихъ именей своих отчызныхъ и материстыхъ, яко о том вышей написано в розделе пятомъ. А тотъ, хто с позволеньемъ самое девки в малженьство ее взялъ, вжо горла не тратить. Вед же, естли бы такая девка, отходечи такъ своволне от родичов або близскихъ, будь тежъ опекуновъ своихъ, што маетности их забрала, тогды о такую шкоду укривжоному волно будеть с тымъ, хто тую девку и з нею тую маетность взялъ, тамъ же заразомъ у права мовити.

Артыкулъ 14.

О забитье за повабеньемъ або вызваньемъ на руку.

Ижъ тежъ шкодливый въсчалъсе былъ межы подъдаными нашыми, звлаща стану рыцеръского, которые за леда причиною, теръпливости пристойное в собе не заховываючи и правомъ посполитымъ не обходячисе и овшемъ имъ яко бы възгаръжаючы, своволне и быстре одинъ на другого торъгнувшисе, а затымъ на руку повабивши и обовезавшы словы такими, которые се почстивости и доброе славы дотычуть, потомъ спольне бъючыся и раны собе задаючы, о раны шкодливые и зайстя межы собою приходять, а некоторые броней шкодливыхъ яко бы противъко постороньнему непрыятелю и дивныхъ поступков до того уживаючы, насмерть одинъ другого забияють и сполне се моръдують не иначей, яко бы звирхности и справедливости над собою не мели. И хотя жъ подъчасъ то собе обваровывають, естли бы одинъ другого ранилъ або забилъ, же того на собе сами и потомкове ихъ позыскивати не мають, однак же то в речы посполитой жадного помноженья и пожытку не чинить и овшемъ, кгды се кровъ людъская, часомъ и невинная выливаеть, панъ богъ тымъ бываеть обрушонъ, также и покой посполитый ображонъ. А прото мы тому яко шкодливому звычаеви в панстве нашомъ, великомъ князстве литовскомъ, не хотели допустити большей шыритися, а покой посполитый добре объваровываючы, за радою и позволеньемъ пановъ радъ нашыхъ и всихъ становъ, до того статуту належачыхъ, уставуемъ, абы вже от сего часу своволне, безъ призволенья нашого, г[о]с[по]д[а]рского, которое толко за великими а знаменитыми причынами походити маеть, и на особливомъ уваженью и узнанью нашомъ, г[о]с[по]д[а]ръскомъ, с паны радами нашыми, а у вой[ск]е [у арыгінале: войще] — за позволеньем и узнаньем пана гетмана того панства, великого князства, належати будет, на руку повабяти и вызывати нихто никого не смелъ и словы, которые бы се дотыкали почстивости и доброе славы шляхетское, в томъ его не обовезывалъ, и одинъ другому ранъ не задавалъ, и нихто никого не забиялъ, але о всякие кривъды свои, бы тежъ и о набольшые и наголовнейшые, правомъ посполитымъ водле сего статуту каждый одинъ з другимъ се роспиралъ. А естли бы хто над сее право и уставу нашу, вызвавшы кого на руку, раны якие ему задалъ, або хотя бы и тотъ повабленый оного, хто его вызывалъ, зранилъ, тогды за раны не маеть быти чынена нагорода, кгды ж не мелъ на таковое своволное и непристойное повабленье мимо заказъ права посполитого призваляти, одно тотъ, хто другого зранившы, самъ нераненый зостанеть, маеть у везеню на замку нашомъ столечномъ виленьскомъ вышнемъ полгода седети, кгды то на него за позвомъ у суду земского ранный доведеть.

А естли бы се обадва зранили, тогды вжо собе ранъ один другому платити и нагорожати не мають. А тым же обычаем мает быти разумено, естли бы, на руку вызвавшися, насмерть одинъ другого забилъ, тогды тотъ, хто живъ зостанеть, будь вызваный або хто вызвалъ, сам за оного забитого с права от вряду кгродского того повету, в котором оселость свою маеть, не инакъ, одно на горле маеть быти каранъ насмерть и кровъ его своею кровью заплатити маеть за жалобою и попираньемъ права от детей або близкихъ того забитого. Лечь головщина вжо по таковомъ скаранью плачона быти не маеть, кгды ж о том ведалъ и самъ на то зезволялъ. А если бы заразомъ по такомъ забитью тотъ мужебойца пойманъ не был або, позваный будучи, ку праву не сталъ, тогды против нему далей такий поступокъ правный маеть быти чиненъ, яко вышей о мужобойцахъ естъ описано. А для того жъ одному с тыхъ, который бы спокойнымъ будучи, на такое непристойное вызыванье не позвалялъ, такую оборону и обварунокъ постановляемъ: бы тежъ и наболей тотъ противникъ его словъ якихъ, доткливыхъ славѣ и учстивости его, домовляючи и дотыкаючи, на руку его повабялъ, а онъ кгды не пойдеть, а покой посполитый заховываючи, зъ сее уставы и права не выступит, тогды вси тые таковые слова ничого ему и доброму мниман[ь]ю его шкодити не могуть. але и овшем тому противнику его самому яко выступнику мають шкодити, и можеть таковый спокойный, утекшися до насъ, г[о]с[по]д[а]ря, або до вряду нашого належного, заразом такого противника своего до права о небеспечность здоровья своего и о вину за слова доткливые водлугъ артыкулу двадцать семого розделу третего позвати и тамъ далей противко нему поступовати, яко о отповѣдникахъ естъ описано.

Артыкулъ 15.

Где бы хто бременную невесту шляхтянъку збилъ або конем потрутилъ и забилъ.

Уставуемъ: естли бы хто, не будучы примушоный жадною пригодою, то естъ сорваньемъ узды, унесеньемъ твардоустого коня и инъшою якою пригодною причыною, одно зъ зуфалства, або опильства своего, або умыслне то учынилъ, невесту бременъную, шляхътянку, будь тежъ и инъшого стану, бегаючы на кони, потрутил або ее чымъ колвекъ збилъ и образилъ такъ, ижъбы плодъ мертвый поронила, а сама жыва зостала, тогды за доводомъ слушнымъ маеть ее водлугъ стану навезати и за тую вину у везенью в замку або у дворе нашомъ того повету чверт[ь] году седети. А з стороны того збытку его в ображенью плоду пороненого маеть такий зъ жалемъ явнымъ, упокораючыся передъ паномъ бого[м], на собе отнести черезъ годъ одинъ чотыри кроть на свята урочыстые, то естъ разъ на день нароженья пана христусового, другий раз на день громницъ, третий кроть на день з мартвыхъ встанья пана христусового, а четвертый кроть в день свята сосланья духа светого, у дверей костелныхъ вевнутръ на местцу поднесломъ, на то наготованомъ, на локоть от земли стояти и грехъ сво[й] передъ людми входячыми и выходячыми с костела явне вызнавати, а потом того обецовати с пилностью стеречыся и не допущати. Лечъ естли бы обое, то естъ и плодъ и матка, с причыны его змерли, тогды онъ тежъ самъ за то на горле маеть быти каранъ за слушнымъ доводомъ, яко около забойствъ стану шляхетского и тежъ простыхъ людей на своихъ местцахъ доводы сут[ь] описаны. А головщизна предсе з ыменья и з маетности его близскимъ ее толко за самую матку маеть быти плачона водле стану ее. Пакли ж бы тое потрученье и ображенье невесты беременное сталосе неумыслне, пригодне, о томъ маеть быти сужоно, яко о иншихъ мужобойствахъ неумысльныхъ.

Артыкулъ 16.

О томъ, хто бы ножомъ або якимъ иным до бою незвыклым начиньемъ кого забил або ранил.

Кгды бы хто кого умысльне з гнѣву а запаметалости серца злого ножомъ, пуйналомъ, кгинчалом забилъ, таковый, естли будет шляхтичь, а то теж шляхтичу учинить, за доводомъ слушнымъ четвертованъ быти маеть. А естли простого стану ч[о]л[о]в[е]къ шляхтичу учинить, тот будеть каранъ четвертованьемъ. А где бы шляхтичь простого ч[о]л[о]в[е]ка тымъ способомъ забилъ, тотъ руку тратить, окромъ пойманья на горячомъ учынку, о чомъ есть в семъ статуте описано. А головщизна по каждомъ такомъ з маетности плачона быти маеть. А естли хто не забъетъ, толко ранить, тотъ, будет ли шляхтичъ, за шляхтичово ображенье утятьемъ руки, а за чоловека простого заплатою пенежною такъ, яко за головщизну каран будет. Естли жъ пакъ то чоловекъ простого стану учынить, тотъ за ображенье шляхтичово—горло, а за простого чоловека—руку тратить.

Артыкулъ 17.

О забитью або раненью здрадливымъ потаемнымъ обычаемъ.

Хто бы кого неведоме без звады, але молъчкомъ, здрадливе а потаемне в ночи або и в день забилъ, то естъ або в дорозе крыянъкою с куста, зъ заплотья, або в месте, в селе, на улицы заседъшы, або в дому, через дверы, черезъ окно албо в коморъце таемной потребной якою стрелбою пострелилъ, або зручною бронью якою забил, будь теж спячого яко колвекъ о смерть приправил, албо теж в беседе, або в ыншомъ якомъ згромаженья [!] людей, але молъчком потаемне пуйналомъ и якою кольвекъ бронью забилъ, а на томъ бы учынку былъ пойманъ, або то на него слушнымъ доводомъ было переведено, таковый, если то шляхтичъ шляхътичу учынить, срокгою смерътью, четверътованьемъ або на паль битьемъ каранъ и почстивости отсужонъ будеть. А головщизна зъ именья або маетности его рухомое совито плачона быти маеть. А естли не забъеть, толко ранить шляхътича, тот предъсе горъломъ каранъ будеть, и навезка зъ именья плачона быти маеть. А естли то шляхътичу чоловекъ простый учинит, тогды за забитье, по сказанью на горъло, розными срокгими муками зъ сего света зъглажонъ будеть, а за рану стятъ быти маеть. Пакли жъ бы то хто надъ кимъ з направы чыее учынилъ, и, то бы поведаючы, смертью такую повесть свою запечатовалъ, тогды при иншыхъ слушныхъ явныхъ знакохъ, которые бы се в той речы оказати могли за доводомъ слушнымъ правнымъ, и самъ тотъ, хто бы направилъ, такъ, яко и тотъ, хто то учинилъ, каранъ быти маеть. А не будет ли знаковъ, доводовъ явныхъ слушныхъ, толко поволанье, смертью запечатаное, от того обвиненый тымъ поволаньемъ отприсягнутисе виненъ будеть.

Артыкулъ 18.

О запалячохъ местъ и домовъ.

Естли бы хто такъ злого а шкодливого учинку важилъся, а смелъ умысльне запалити замокъ, место або дворъ наш, г[о]с[по]д[а]р[с]кий, альбо тежъ замокъ, домъ князкий, панъский, шляхетъский, а въ томъ бы тому запалячу меновите от ушкожоного вина была дана або бы его заразомъ на томъ учынъку поймано, тогды за доводомъ слушнымъ правънымъ, такъ, яко о инъшыхъ речахъ кривавых, звлаща яко о доводехъ наезду кгвалътовного на домъ шляхетский, а меновите около присеги з шестма шляхтичы естъ вышей описано, зостанеть ли в томъ виненъ, маеть быти самъ огнемъ спален. А маетность, ушкожоная огнемъ, з маетности тежъ его, естли которая будеть, плачона быти маеть.

Артыкулъ 19.

Хто бы забилъ кгвалтовника в дому своемъ и помочниковъ его.

Тежъ уставуемъ: хто бы на чый домъ або на господу кгвалтомъ наехалъ або нашолъ, а тотъ г[о]с[по]д[а]рь домовый, такъ тежъ и гость, который в томъ дому або в господе стоить, оного кгвалтовъника самого або помочниковъ его, боронячы дому або господы своее, забилъ, тогды скоро по ономъ кгвалте маеть суседовъ околичныхъ обослати, обуолати [!] и оповедати. И того ж часу до вряду нашого судового того повету, в котором се то станеть, ехати або послати и, вземшы возного и сторону людей добрых, шляхту або инъшых суседовъ вери годных, оны[й] кгвалт[ъ] [у арыгінале: кгвалту] и забитого [у арыгінале: заьитого] кг[в]алтовника в дому своем оказати. А потомъ, кгды будет о тое забит[ь]е обвиненъ, тогды за оказаньемъ слушъных знаковъ кгвалту мает зъ жоною и з детьми, летъ дорослыми, и с трема ш[л]яхтичами, собе ровъными, а не будеть ли мети жоны або детей, ино с тыми трема шляхтичы, а не будет ли трех шляхътичовъ до отприсеженья зъ собою мети, ино з слугами и с челедью домовою самопять предъсе маеть присегою се отвести на томъ, ижъ тотъ забитый кгвалтомъ наехал або нашолъ, а сталосе за початъкомъ того забитого. А естли бы толко ранилъ, а не забилъ, тогды самъ одинъ панъ домовый або гость, в господе стоячый, маеть присегнути, ижъ яко кгвалътовника в дому своемъ ранилъ. Таковый головщыны, ранъ и шкодъ никоторыхъ платити не будеть повиненъ.

Артыкулъ 20.

Хто бы наехалъ або нашолъ на чужое именье або на село кгвалтом, а тот, боронечи кгрунту своего, забилъ.

Тежъ уставуемъ: которому бы шляхтичу шляхтичь або хто кольвекъ иный умысльне на чие именье, на село, на люди и на кгрунты кгвалтомъ нашолъ або наехал и кгвалтъ або значную якую шкоду чинилъ, яко забраньемъ людей, быдла, статку, жатьемъ або браньемъ збожья, сена, рубаньемъ лесовъ, гаевъ або каженьем границъ, межъ, копцовъ, ловеньемъ озеръ, а тотъ шляхтичъ, боронечи именья своего, оного кгвалтовника своего забилъ або ранил, тогды маеть тым же способомъ, яко вышей о кгвалтовнику домовомъ естъ описано, присегою своею отвестися. А кгды присегою се отведеть, иж его яко кгвалтовника на таковомъ учинку забилъ або ранилъ, за такового головщизны, навезки ани шкодъ такъже платити не будеть повиненъ. А о свою кривду и шкоду, которая се будеть в онъ час стала, предсе тому, на чие именье было наехано, волно будеть на ономъ кгвалтовнику або на именью и маетности его всякой правомъ доходити.

© Алег Ліцкевіч, 2010