Дакументы: Статут Вялікага Княства Літоўскага 1588 г. Раздзел 11. Арт. 51-68

Артыкулъ 51.

За кгвалтъ посполитый суседъский.

Уставуемъ, ижъ за кождый кгвалтъ посполитый суседъский, правне переведеный, маеть быти сказано стороне ображоной дванадцать рублей грошей.

Артыкулъ 52.

О премолчанью кгвалту, злодейства, пожоги и иныхъ шкодъ.

Кгды бы хто кому кгвалтъ посполитый суседский або злодейство, пожогу, бой, грабежъ и якую шкоду учинилъ, а тотъ бы молчалъ от оного часу, якъ ся то стало, три годы, тогды вжо о то будет вечне молчати. А естли бы и позвавши о то, а права не доведши, а потомъ зася знову три годы промолчалъ, о то такежъ не будеть мочи правомъ чинити, вынемши если бы опекуны замолчали, тогды детемъ, кгды дойдуть летъ, право не гинеть такежъ до трохъ годъ.

Артыкулъ 53.

Хто бы после ранъ, по пиромъ и по корчьмамъ бываючи, пилъ.

Уставуемъ: кгды бы который шляхтичь и якого бы кольвекъ стану ч[о]л[о]в[е]къ битый або раненый после ранъ ездилъ або ходилъ по колацыям, по торгохъ и по корчьмахъ пилъ, на беседахъ седал от бою або зраненья до двадцати чотырохъ дней, а потомъ хотя бы от тыхъ ранъ умеръ, тогды тотъ, от кого тые раны або бой ему ся стал, доведет ли того слушным доводомъ, головщизны платити не будеть повиненъ, толко за раны его кревнымъ досыть чинити за доводомъ подле статуту.

Артыкулъ 54.

О рукоемъство на поставенье.

Естли бы хто кого ручилъ на постановенье, и часъ бы тому поставенью былъ зложонъ, а тотъ бы, по комъ ручилъ, перед рокомъ, поставенью замереномъ, умеръ, тогды поручникъ маеть сознаньем врядовымъ, где тотъ истецъ умеръ, вывестися и тымъ будет воленъ от паруки. А естли бы поручникъ самъ такежъ перед роком, поставенью истъца зложонымъ, умеръ, тогды жалобная сторона вжо истъца смотрети маеть, а дети поручниковы не будут в томъ винъны. Нижли естли бы поручникъ на рокъ, поставеню истъца зложоный, не поставилъ и паруки з себе не здалъ, а после того року оный истецъ албо самъ поручникъ умеръ, тогды парука таковая яко на самомъ паручнику, поки жывъ, такъ по смерти его и на дети, и маетность его спадываеть, на чомъ жалобникъ довод слушный шкодъ своихъ учынить.

Артыкулъ 55.

Якого вязня врядъ нашъ не можетъ на рукоемство дати, а якого мает давати.

Кды [!] бы хто кого, обвинивши в учынку якомъ крвавом, за шъто горломъ карають, дасть передъ правомъ до везенья вряду нашого осадити, такого вязня врядъ нашъ не маеть на рукоемство безъ позволенья стороны тое, которая его осадить, давати и з везенья выпущать. А поступокъ в той речы маеть врядъ [у арыгінале: чрюдъ] на обе стороне такий учынити, яко о томъ вышей в семъ же статуте есть описано. Лечъ хто бы кого, обвинивши в речахъ меньшыхъ, где о горло не йдеть албо о долгъ який, будь оселого албо неоселого далъ до везенья, тогды врядъ такового вязня и без дозволен[ь]я стороны поводовое можеть ку постановенью на певный рокъ на паруку дати, а сторона в том не поручника, але вряду смотрети мает.

Артыкулъ 56.

Который злочынца будеть на смерть сказан, а от того бы ся откупилъ або отпрошон былъ.

Тежъ естли бы хто о злодейство або о которое злочынство на каранье горломъ через вряд права посполитого всказан был, а в том каран[ь]и горло свое п[е]н[е]зми откупил або се от того каран[ь]я або от страчен[ь]я горла через приятелей своих або гостей, послов, панов знакомитых выпрохан был, а за таковый свой злый учынокъ у ката у руках был, таковый кождый промежи добрыми людми рыцерскими не мает болшей того привил[ь]я шляхетъского ужывати, а детемъ его то шкодити не мает.

Артыкулъ 57.

О томъ, который бы шляхтичь неоселый, забивши кого под которымъ врядомъ нашимъ або где кольвекъ, а не справившися, прочь уехалъ.

Кгды бы хто, будучи неоселымъ в томъ панстве нашомъ, великомъ князстве литовъскомъ, и никому не служачи, будь ч[о]л[о]в[е]къ приездъжий албо уроженецъ тутошний, забийство албо який иный збытокъ, за што горломъ каранье описано, под которымъ урядомъ нашимъ албо и где кольвекъ инде учинилъ, а не могъ бы быть пойманъ и перед врядомъ ку росправе ставенъ, але бы прочь уехалъ, а сторона жалобная не хотела бы на томъ, у кого бы се такий чоловекъ неоселый переховывалъ, того позыскивать, тогды маеть по такого сторона болячая позвы от вряду кгродского того повету, в которомъ ся то станеть, взяти и тые позвы через возного дати поприбивати у воротъ замку або двору нашого судового и в месте на бронахъ, и тежъ при костелехъ, и казати вознымъ тые позвы голосне обволыват[ь], абы се ку справе в том обвиненью становил. За которыми позвы не станетъ ли обвиненый ку справе на двои рочки кгродские, таковый на выволанье до насъ, г[о]с[по]д[а]ря, обычаемъ, в сем статуте около того постановленымъ, маеть быти отослан. И мы его маемъ казати выволати со всихъ панствъ нашихъ. А по выволанью яко сторона, такъ и вряды наши мають и могут ся против него заховати, яко и противъ иншихъ выволанцовъ, яко о томъ в сем же статуте естъ описано.

Артыкулъ 58.

О присязе на кгвалте и шкодахъ, при немъ починеныхъ, также на шкодахъ при слузе або посланцу, на дорозе вделаныхъ.

Уставуемъ, ижъ на кгвалте кождомъ за наездомъ або найстемъ на домъ або господу шляхетскую, яко о томъ ширей на своихъ местъцахъ естъ доложоно, кгды присега стороне поводовой сказана будеть, а тотъ кгвалтъ сталъся будеть при бытности самого г[о]с[по]д[а]ря домового, тогды на томъ кгвалте нихто иный, одно самъ тотъ, хто о тотъ кгвалтъ позываеть, которого колвекъ стану будеть, маеть водлугъ статуту присягнути.

А если в небытности самого того, кому тот кгвалтъ станется, тогды на томъ, ижъ справедливе о томъ ведомость взял, же ся то такъ, а не иначей стало, и за тою ведомостью тебе, яко кгвалтовника дому своего, поприсегаю. А врядникъ тежъ маеть присегнути, же такъ естъ, яко онъ в томъ справу пану далъ. А на шкодахъ своихъ власныхъ также самъ маеть г[о]с[по]д[а]ръ домовый присегнути. Нижли естли бы се кгвалтъ домовый и при томъ забранье маетности стало в небытности г[о]с[по]д[а]ра домового, тогды онъ винен будеть толко на том присегнути, же такъ много, о што жалуеть, в томъ дому и схованью своемъ от[ъ]ехалъ. А врядникъ, або тивунъ, або тежъ межи убожъшихъ становъ жона, сынъ дорослый, або тотъ, хто на онъ часъ в дому его с порученья его старшимъ будеть, маеть на томъ присегнути, же то естъ при томъ кгвалте побрано. А если при яком кгвалте самому пану шкоды не станутся, толко слугамъ або подданымъ его, то предсе панъ на кгвалте, а слуги, подданые кождый на шкодахъ своих присягнути мают. А не всхочеть ли поводовая сторона, самъ панъ, на кгвалте присегнути, того ему волно отступити, але на шкодахъ похочуть ли, такъ онъ на своихъ власныхъ, яко слуги и подданые [у арыгінале: подданше]—на своихъ, присегнути, то тежъ имъ волно будеть. По тому жъ, где бы хто с кн[я]зей, пановъ шляхты менилъ собе шкоду от кого в чомъ кольвекъ быти, вчиненую на дорозе и где кольвекъ, при слугахъ або якихъ колвекъ посланцохъ своихъ, тогды панъ самъ на томъ, ижъ то, о што жалуеть, послалъ былъ через того слугу або посланца, а слуга, посланец тотъ—на томъ, же то в него отнято, або вкрадено, або при бою згинуло, мають при иншихъ поступкохъ правныхъ присегнути. А слуга, посланецъ и на бои своемъ, если ся ему станеть, заразом можеть присегнути. А по такомъ доводе сказанье маеть быти чинено водлугъ права. А што ся дотычеть поточных посполитых кгвалтовъ не о речи крвавые, где ся в небытности самого г[о]с[по]д[а]ря домового стануть, того могуть врядники, шляхта присегою доводити. А хто бы не мелъ врядника шляхтича, тотъ, похочет ли, самъ маеть таких речей присягою доводити, яко о томъ вышей в семъ артыкуле описано.

Артыкулъ 59.

О писанью шкодъ в позве або менованью при устной жалобе.

Ижъ некоторые люди звыкли были в позвехъ жалобы свое при кгвальтехъ и при иншыхъ розницахъ писати много речей, шкодъ албо и при устъной жалобе словне ихъ много менити, а часу доконанья права, кгды прийдеть ку присязе, тогды тых шкодъ, в позве або устне на жалобе помененыхъ, великую часть отступовали, чымъ яко врядъ в непотребную трудность приводили, такъ и себе они якое мниманье противное приправовали, а такъ мы, г[о]с[по]д[а]ръ, хотячы то в людях таковое мысли впередъ завстегнути, уставуемъ, ижъ хто бы в позвехъ або въ устной жалобе своей шкоды якие описавшы и поменившы, а потомъ на праве або часу присеги которое части ихъ отступовалъ и на всихъ, яко ожаловалъ, присягнути не хотелъ, тотъ вжо и вси иные ш[к]оды, в жалобе его помененые, тратить и присягати на нихъ не можеть, а обжалованая сторона от нихъ волна будеть. Однако жъ и в томъ постерегаючы мы уближенья стороны укривжоное жалобное, такъ то варуемъ, ижъ кгды 6ы ся кому сталъ який кгвалтъ, наездъ домовый и при томъ забранье маетьности або отнятье именья со всею маетъностью, албо тежъ шкода пожогою, злодействомъ, будь тежъ на дорозе розбоемъ и инымъ якимъ обычаемъ, чого бы сторона ображоная про великий жаль, або зраненье свое, або, естли бы самъ панъ былъ забитъ, по немъ жона, дети, близкие передъ такимъ фрасунъкомъ, жалемъ и утискомъ своимъ не могла заразомъ всихъ шкодъ забранъя маетьности своее або листовъ на паметь собе привести або ведомости о всем том достаточъное досегнути, тогды толко к[г]валтъ, наездъ, пожогу, злодейство або розбой, раны маеть безъ омешканья, яко наборзде [!] водълугъ далекости дороги можеть быти, маеть суседомъ околичнымъ и на враде водлугъ науки сего статуту оповедати и до кгнихъ [!] записати дати, докладаючы и того, же ся и шкоды, если такъ будеть при томъ стали, которыхъ она не могла такъ борздо списати и до книхъ послати, а потомъ розмысливъшися и выведавъшыся достаточне о шкодах, собе поделаныхъ, можеть тые шкоды, на рейстръ меновите списавшы, до вряду ку записованью в кгниги послати, а врядъ маеть до кгнигъ прыняти. Не может ли быть ближей, тогды надалей в трехъ неделяхъ, и то стороне жалобной у права ити маеть, вынявшы то, где бы самого пана в томъ именью не было, где ся тая шкода станетъ, а былъ бы где индей в колкудесятъ миляхъ, а врядникъ, тивунъ або жона не ведали бы, яко о тыхъ шкодахъ вряду справу дати, таковому часъ на оповеданье шкодъ маеть быти и до шести недел[ь]. А стало л[ь] бы ся то будучому на службе нашой, г[о]с[по]д[а]ръской, и земской за границою панствъ нашыхъ або на войне, таковому на оповеданье шкодъ часу узычаемъ по зверненью послуги нашое и земъское до шести жъ недель.

Артыкулъ 60.

О каранью такихъ невестъ збытечныхъ, которые бы дети свои або иншыхъ губили.

Ради то видечы, абы в панстве нашомъ хрестияньскомъ всякая учстивость и поважность, поволанью хрестиянскому належачая, была захована, а противные тому жебы каранье слушное на собе относили, откуль бы и инъшые нерадного предъсявзят[ь]я своего повъстегатися могъли, уставуемъ, ижъ кгды бы которая белая голова, не живучы в стане малженьскомъ, але вшеточне ся и нерядне справуючы и такъ плоду набывши, а потомъ для встыду або боязни каранья тот плодъ сама або черезъ кого иного тратила и о смерть приправовала, а на такомъ учынку была бы сама албо тотъ, хто от нее справовати то будеть, поймана, албо бы то якимъ слушнымъ, певнымъ, значнымъ и явнымъ доводомъ переведено было, таковые, яко тотъ, хто ся того чынити а плодъ такий губити подвезалъ, яко тая, которая плодъ свой на страту дала, сами мают горломъ карани быти [у арыгінале: ьыти]. А в таковой речы вряды наши кгродъские и местъские мають выведанье чынити и того постерегати, а дознаныхъ и правомъ в томъ переконаныхъ карати.

Артыкулъ 61.

В чомъ и коли шкрутыниумъ мает быти допущоно.

Шкрутыниумъ маеть быти чынено в такихъ речахъ, где идеть о почстивость и о горло, в чомъ стороны межы собою мели бы доводы або отводы вонтпливые. А брали бы собе обедве або одна которая сторона на шкрутыниумъ, тогды врядъ, выслухавши доводовъ и отводовъ ихъ, того ей допустити маеть обычаемъ, ниже[й] описанымъ, то есть на шкрутиниумъ маеть быти давано в тотъ часъ, кгды стороны, або за пойманьемъ на горячомъ учынку, або за позвы на року, праву припаломъ, росправу з собою мети будуть. А то для того, к[г]ды ся таковые справы о почстивость за отосланьемъ врядовымъ на съемъ передъ насъ, господара, а о горло—за апеляцыею до суду головного приточать, тогды абы обедве стороны з справами своими готовы были. А надъ тые речи, верху описаные и на шкрутиниум вынятые, а где бы не шло о почстивость, або о горло, албо и о иншые речи, о што на шкрутиниумъ инъшые артыкулы в семъ статуте меновите указують, мы, г[о]с[по]д[а]ръ, ани судъ головный, ани который врядъ на шъкрутинию позваляти не маеть, але безъ отволоки кождому укривжоному за доводомъ правнымъ справедливостъ заразомъ на року, слушне припаломъ, делана быти маеть.

Артыкулъ 62.

Хто на шкрутыниумъ маеть выездъжати, и о назначенью часу ку выезду на нее.

Кгды вжо вряд кгродский с причинъ, верху описаныхъ, шкрутыниумъ которой стороне або обудвум допустить, тогды на тое шкрутыниумъ, то есть на выведан[ь]е, маеть староста судовый того повету, в котором ся такая справа приточить, а в небытности самого старосты тогды две особы врядовые, наместникъ або подстаростий з суд[ь]ею кгродскимъ, а естли бы обадва тые не могли зъ якихъ слушныхъ причин ехати, тогды з одным з них которым писар кгродский маеть ехати. А не могло ль бы то быти, жебы два врядники ехали, тогды одинъ который з нихъ маеть ехати. И хотя одинъ або и два поедуть, предся мають при собе мети возного и колку шляхтичовъ [у арыгінале: шлмхтичов], людей добрыхъ, веры годных, принамней трохъ особъ, ни одной стороне, в праве томъ стоячой, неповинныхъ. А часъ выезду на тое выведанье маеть вряд сторонамъ очевисте на рочкохъ ознаймити без продлуженья, але яко наборздей быти можеть скоро по отсуженью рочковъ водлугъ далекости местъца, на которое мають выехати.

Артыкулъ 63.

Якимъ обычаемъ шкрутыниумъ маеть быти чинено.

Тые вышей мененые шкрутаторове мають на тое местце, где се тотъ учинокъ, о што право идеть, сталъ, выехати и там выведанье пилное и достаточное учинити у наблизших суседов, у шляхты, у пановъ самыхъ и ихъ врядниковъ, слугъ и подданыхъ и у кого жъ колвекъ иного, хотя и въ перееждчого ч[о]л[о]в[е]ка, которому бы ся притрафило на онъ час, к[г]ды се што стало, то видети, толко бы в людей годныхъ веры, не выймуючы с того жадное особы, такъ духовного, яко и светского стану ч[о]л[о]в[е]ка, которые повинъни будуть, маючи перед очима своими боязнь бож[ь]ю и сумненье доброе, прирекши и шлюбивши словомъ своимъ добрымъ и почтивымъ, сознати то, чого будутъ в оной речи сведоми правдиве. Але тыхъ особъ, у которыхъ маеть быти опытъ и выведанье чинено, стороны, в праве з собою стоячие, не мають ку тому сведецству способляти и часу того выезду и выведанья перед шкрутаторми становити, одно тые шкрутаторове сами у тыхъ людей, у кого бы розумели водлугъ месца [!], часу и учы[н]ку налепей и нащирей правды ся выведывати, мают опытъ чинити не толко о самомъ томъ учинъку и о причинахъ его, але и о захованью а поступкохъ и обыстью тыхъ обудвухъ особъ, право з собою ведучих. А стороны часу такого опыту и выведанья при вряде быти и того ся прислухивати не мають. И чого ся тые шкрутаторове в той речи выведають, то все достаточне списати мають, докладаючи правдиве, под сумненьемъ своим, кождого повести, также часъ, местце и вси иные знаки и подобенства, и будучи врядъ самъ на выведанью, тое писмо мають при собе до скутечное росправы сторонъ под печатьми шляхты и возного, при нихъ будучихъ, на листе зашитомъ заховати. Вед же вряд нашъ кгродский повиненъ будеть на шкрутыниумъ выездъжати без отволоки под тою жъ присегою, которую на врядъ свой учинилъ.

Артыкулъ 64.

Яко стороны и врядъ по шкрутыниумъ заховатися мають.

Кгды ся вжо тое выведанье тымъ порядкомъ, яко вышей описано, отправить, тогды стороны, такъ жалобная, яко отпорная, кромъ позванья ку доконанью того права и прислуханью выроку врядового, на том же вряде становитися и росправу приняти на первшихъ рокохъ, по шкрутыниумъ припалыхъ. А врядъ, за пилнымъ уваженьемъ и розмышленьемъ взявши порозуменье и обачивши а розезнавши о той справе з оного выведан[ь]я, и за которою стороною будуть на выведанью слушнейшие и певнейшие сведецства и знаки, тую сторону ку доводу або отводу водлугъ науки сего статуту припустити и, прочитавши шкрутыниумъ обеюмъ сторонамъ, то промежку нихъ розсудкомъ своимъ без проволоки кончити маеть, то естъ прийдеть ли до того, с права винъного, на горло, такъже головщизну, шкоды на именью або маетности рухомой сказати маеть. А если которая сторона по шкрутынии на первшихъ рочкохъ ку росправе перед врядомъ не станеть, тая речь свою тратить.

Артыкулъ 65.

О высыланью черезъ насъ, г[о]с[по]д[а]ря, на шкрутыниумъ.

Теж кгды ся от власного суду нашого, г[о]с[по]д[а]рьского, припадает на шкрутыниумъ выслати в речахъ, вышей описаныхъ, тогды мы маем на то высылати особъ двухъ албо трехъ, врядниковъ оного повету, где се тотъ учинокъ сталъ, а по выведанью ихъ по тому жъ се розсудкомъ нашимъ ку сторонам заховати маемъ около припущан[ь]я ихъ ку доводу албо отводу, яко о том вышей о врядех наших описано.

Артыкулъ 66.

О высыланью через судъ головный на шъкрутыниумъ.

Кгды бы тежъ суду головному указала потреба водлугъ сего статуту на шкрутыниумъ выслати, тогды мають высылати, промежку себе на то обравши, двухъ особъ, которые высланые от нихъ особы по выведанью в розсудку самое речи, сами судьи головные мают ся заховати и поступовати такъ, яко вышей о вряде кгродъскомъ шырей есть описано. Але стороны вжо без позву по шкрутинии, одно на рокъ, от шкрутаторовъ зложоный, ку сконьченью права и прислуханью выроку тамъ, где и въ которомъ колвекъ воеводъстве в томъ году суды головные судити будуть, становитисе передъ тым же судомъ головнымъ будуть винни.

Артыкулъ 67.

О апеляцыяхъ в речахъ крвавыхъ от вряду которого судового до судей головных и о даван[ь]ю на паруку сказаных на горъло.

Хто бы оселый у великомъ князстве литовъскомъ в справе такой, которая идеть о горло, по сказанью суду кгродъского, и будучы на горло сказанымъ, хотелъ апелевати до суду головного, а где бы о почстивость шло—до насъ, г[о]с[по]д[а]ря, таковому кождому апеляцыя маеть быти допущона. Вед же подъ тымъ обычаемъ, ижъ тотъ, кого бы врядъ на горло сказалъ, маеть по собе певное рукоемство дати людми оселыми, шляхтою, трема або двема особами, же се ку росправе передъ судомъ головнымъ становити будеть. А сторона жалобная до сконьченья права абы была от стороны противное здоровъя своего беспечна. А где бы таковый, паручъниковъ выдавшы, перед судомъ головнымъ або передъ нами, г[о]с[по]д[а]рем, не сталъ, тогды судъ головный такового, сказавшы на горло, мает черезъ листъ свой его до насъ, г[о]с[по]д[а]ря, на выволанье отослати.

А мы, г[о]с[по]д[а]ръ, будем повинни заразом его казати выволати вечнымъ выволан[ь]емъ, ижъ вжо таковому и кглейтъ нашъ на подънесенье выволанья даванъ быти [у арыгінале: бьти] не маеть. Которого такового выволаньца кождый врядъ кгродъский, где колвекъ пристигнувшы, за жалобою и помоч[ь]ю стороны укривжоное поймати и горломъ его карати росказати, а головщизну и инъшые шкоды и презыски судъ головъный на самыхъ паручникохъ всказавшы, ку отправе того на ихъ имен[ь]яхъ до того вряду кгродъского, подъ которымъ они оселости свои мети будуть, отослати маеть, што врядъ тотъ поступкомъ, нижей описанымъ, выконати будеть повиненъ. А поручники тыхъ всихъ своихъ шкодъ на именью и на маетности того, по ком ручыли, пойскивати мають. А пакли бы тотъ истый, на горло сказаный, за парукою будучы, сторону свою поводовую о смерть приправилъ, тогды паручники, будучы о то от повинныхъ забитого припозваны передъ судъ головный, за доводомъ правнымъ сами горломъ мають быти караны. А естли бы ранилъ, ино раны и шкоды всякие, што бы ся при забит[ь]ю або ранахъ стало, совито навязывати и нагорожати будуть повинни. А того всего поручники и ихъ потомки смотрети собе будуть на ономъ истъцу, по комъ ручыли, и на маетности его лежачой и рухомой. А где бы таковый, кому идеть о горло, рукоемъства по собе не далъ, тогды черезъ врядъ маеть быти у везенью задержанъ до росправы або поки паруку по собе дасть. А судъ головный по оказаню от стороны поводовое декрету суду кгродъского, будет ли тотъ декретъ водлугъ права учыненъ, вжо на выконанье тое справы до конца до того жъ суду кгродъского отослати ее маеть. А где бы тотъ судъ въряду кгродъского судьямъ головнымъ здалъсе не водле права, такого суду они поправивши, мають вряду кгродскому науку дати, яко в томъ далей поступовати маеть. А пакли бы правомъ поконаный, не даючыся вряду загамовать, прочъ упорне зъ замку албо з двора нашого зшолъ, тогды врядъ противъ такового водлугъ розделу четвертого артыкулу тридцать второго поступовати маеть. А за презыски заразомъ жалобнику отправу на маетности его, якую мети будеть, учынити будеть повиненъ. По тому жъ и стороне поводовой, естли бы ся декретъ суду кгродъского не водле права видел, до головного жъ суду апелевати волно. А позваный вжо безъ рукоемъства, яко вышей описано, передъ судомъ головнымъ ку росправе становитися маеть. Где бы тежъ вряду земскому в такой речы и збытку, што ся подъ роками земскими станеть, трафило кого на горло сказати, тогды около допущенья апеляцыи и даванья на паруку таке жъ ся маеть заховати, яко о томъ вышей в семъ артыкуле доложоно, и судъ головный на выконанье сказанья до того жъ земъского вряду отсылати маеть.

Артыкулъ 68.

О непереховыванью выволаньцовъ во всихъ паньствахъ нашыхъ.

Абы люди своволные часу выволанья фолкги и обцованья въ панствахъ нашыхъ не мели, уставуемъ, же выволаньцы великого князства литовского, также и чсти отсужоные во всих паньствахъ нашыхъ, не толко у великомъ князстве литовскомъ [у арыгінале: литовъскмоъ], але и во всихъ панствахъ нашых не мают быти ни через кого переховываны.

© Алег Ліцкевіч, 2010