Дакументы: Статут Вялікага Княства Літоўскага 1588 г. Раздзел 14. Арт. 16-37

Артыкулъ 16.

О злодею, которого на злодействе не в дому поймають.

Естли бы злодей былъ пойманъ на злочинъстве, а не в дому своемъ, а тые речи краденые в дому еще не были, таковый злодей самъ одинъ маеть за тое злочинъство каранъ быти, а жона, дети и домовая челядъ от того будуть волни, одно шкода, злодействомъ его вчыненая, з маетности того злодея за доводомъ плачона будеть, што бы болшъ надъ тое лице укралъ.

Артыкулъ 17.

О знаки злодейские на чоловека подозреного.

Уставуемъ: кгды бы на ч[о]л[о]в[е]ка которого простого стану подозреного, то естъ который, хотя бы при лицы не былъ, але однакъ былъ бы вжо поволанымъ або злодейство кому платилъ, хто жаловалъ, менуючи собе от него шкоду въ злодействе якихъ речей, а мелъ бы на то светковъ [літара т складзена з літар п, с] трехъ або двухъ людей добрыхъ, неподозреных, веры годныхъ, которые бы того злодейства зъ якихъ слушныхъ причинъ ведоми были, тогды за сведецьством такимъ мает быти тотъ чоловекъ подозреный на муку выданъ и мучонъ маеть быти от стороны поводовое одинъ разъ. Вед же не далей, толко черезъ годину, одно бы его на члонку не охромилъ; и домучит ли ся злодейства, тотъ ма [!] быти горломъ каранъ. А естли ся ничого не домучитъ, тогды маеть его навезати водлугъ стану его.

Артыкулъ 18.

Трикроть злодея приличного одного дня можеть мучыти.

Уставуемъ: кгды бы поймано злодея приличного, а на тотъ час без лица будеть пойманъ, тогды такового злодея три кроть одного дня можеть мучыти, толко бы на которомъ члонку не образилъ. А естли бы ся не домучылъ, тогды за кождымъ разомъ муки оное маеть его навезати водлугъ стану его.

Пакли ж бы в оной муце злодейства на немъ домучытися не могъ, а оною мукою уморенъ або на члонку охроменъ, таковый будеть повиненъ за умерлого головщину совито, а за хромоту яко за цалого ч[о]л[о]в[е]ка платити подлугъ стану его. Нижли естли бы тотъ злодей в оной муце для чаровъ спалъ, а муки не чулъ, а тые чары были бы при немъ найдены ув устехъ або на голове, у волосехъ, подпахами або где инде, тогды навезки ему не повиненъ дати и еще токовый приличный злодей хотя бы ся за такими чары до злодейства не призналъ, будеть повиненъ стороне жалобливой шкоду платити, на чомъ присягнеть.

Артыкулъ 19.

О злодеяхъ и розбойникахъ, которые бы врядника своего поволали.

Уставуемъ: кгды бы чыихъ колвекъ подданыхъ злодеевъ або розбойниковъ и якихъ колвекъ злочинцовъ поймано, а они бы, идучи на смерть, поволали врядника своего, ижъ того злодейства ихъ сведомъ и тымъ лупомъ с ними ся делилъ, а тотъ врядникъ былъ бы шляхтичь, таковый маеть первший кроть отприсегнутися самъодинъ, а потомъ, естли бы таковыхъ другихъ и третихъ злочинцовъ поймано, а тые также, идучи на смерть, того ж поволали и на шыбеницы не отволали, тогды тотъ от тыхъ поволаный маеть отприсягнутися такъ, яко о шляхтичу вышей описано. А четвертым разомъ, естли бы тым же способомъ былъ поволан, тогды вжо без кождого отводу и присяги, и без лица, леч однакъ за доводомъ маеть быти сказанъ на смерть яко злодей, а шкода з ыменья або маетности его укривжоному плачона будеть.

А где бы тотъ врядникъ не былъ шляхтичь, тогды за первъшымъ поволаньемъ злодейскимъ, которые бы то [с]мертью запечатали, маеть стороне жалобливой шкоду всю платити, на чомъ присягнеть. Пакли ж бы того жъ врядника нешляхтича повторе таковые жъ злодеи и тым же способомъ поволали и также смертью запечатали, таковый нешляхтичь вжо без кождого лица также за доводомъ маеть сказанъ быти на смерть яко злодей, и по такового за тыми знаки слушными и поволан[ь]и правными поконаного маеть врядъ нашъ кгродский повету кожъдого зеслати и, поймавши его и на вряде перед собою поставивши, казати на него стороне жалобной фольдровати.

Артыкулъ 20.

О чоловека неподозреного.

Уставуемъ: естли бы шляхтичъ которого нешляхтича и неподозреного помовилъ, менуючы, ижъбы его злодеемъ былъ, от него в злодействе ему шкода ся становила, и, не маючыхъ [!] никоторых слушныхъ знаковъ, хотелъ его о злодейство поприсегнути, тогды тотъ ч[о]л[о]в[е]къ, яко будучы неподойзреный, близшый будеть от того самотреть з суседы своими, людми неподойзреными, будь чужоволостъцами албо з людми того жъ одного пана, але однако жъ в особливыхъ домехъ мешкаючыми и людми добрими, вери годными, неподойзреными и неприличными, отприсягнутися, а судъ ему того маеть допустити. А естли бы тотъ чоловекъ самотрет на томъ не присегнул, тотъ тую шкоду, о што жалоба будеть, повиненъ будеть заплатити, а другий разъ, кгды бы того жъ о злодейство было обвинено, тогды за другимъ разомъ и обвинен[ь]емъ от шляхтича маеть быти поконанъ водле права и присеги яко злодей.

Артыкулъ 21.

О забитье злодея при лицы.

Уставуемъ тежъ: где бы хто злодея при лицы в дому своемъ забилъ, такового злодея забитого того жъ часу по ономъ забитьи маеть оказати суседомъ околичнымъ и потомъ што нарыхлей вознымъ и стороною объведшы и до вряду привести и оказати маеть. А потомъ, будет ли позванъ о то до вряду, тогды вряд маеть ему допустити отприсегнутися, ижъ его на злочынстве при лицу в дому своем забилъ. Такъ тежъ, естли бы ся кому трафило на дорозе або где инде полемъ або лесомъ утекаючого злодея погонити, а онъ бы пойматися не далъ, а в томъ при лицы былъ забитъ, тогды тотъ, хто гонить в дорозе за злодеемъ, маеть при собе мети суседовъ або сторонъныхъ людей и с тыми, привезшы трупъ, передъ врядомъ маеть высведчытися, ижъ его при лицы забилъ. А будет ли о то ку праву позванъ, также маеть тыми людми, с кимъ за злодеемъ гонилъ, самотреть на том присегнути, ижъ на злочынстве и при лицы яко злодея своего забилъ. А ранного злодея маеть вести з лицомъ до вряду нашого такъ, яко вышей описано, бо злодея, при лицы пойманого, нихто не маеть ни одного дня в себе держати, але того ж часу вести до враду. А хто бы злодея черезъ день и черезъ ночъ в себе в дому держал, тогды, приведшы до вряду, первей виненъ будеть его навезати водле стану, а ранный естли будучы пойманъ, а до вряду не ведучы черезъ день и черезъ ночъ задержанъ и там в дому его умеръ, тогды будеть повиненъ головщызну платити также водле стану тым же обычаемъ. Естли бы хто, злодея поймавшы и до вряду не ведучы, в дому в себе або на дорозе, правомъ не поконавшы, мучыл, таковый также первей будеть повиненъ его совито навезати, потомъ у право з нимъ уступити.

Артыкулъ 22.

Хто бы што вкралъ на дворе нашомъ, г[о]с[по]д[а]рскомъ.

Тежъ, хто бы на дворе нашомъ, г[о]с[по]д[а]рскомъ, што вкралъ, а то бы стало меншъ двохъ коп грошей, а шла бы тая речъ не о горло, и правомъ бы то на него переведено албо лицо вынято, таковому мають ухо одно урезати, а потомъ естли бы што вкралъ, бы тежъ краденая речъ и десети грошей не стояла, тогды вжо горлом маеть быти каранъ, вед же и в тотъ часъ за слушнымъ поконан[ь]емъ правнымъ.

Артыкулъ 23.

О жонахъ и о детехъ, которые вжывали речей краденыхъ.

А естли бы лице в дому застато и дети и жона при том были, и тыхъ речей краденыхъ, ведаючи их быти крадеными, уживали, тогды они повинъни будуть тую шкоду платити, а в недостатку заплаты и сами головами выдаваны быти, нижли не въ вечную неволю, одно покуль ся выробить, яко тым, которые бы закуплены были, а горломъ тотъ самъ злодей маеть быти каранъ, который кралъ.

Артыкулъ 24.

О выдаванью лица з уряду нашого и тежъ з двора князского, паньского и шляхетского.

К тому уставуемъ: естли бы лице принесено было до вряду нашого, г[о]с[по]д[а]ръского, князского, паньского и земяньского, а хотя бы тое лице была речь важная — золото, серебро, грошы, шаты, кони дорогие, тогды от всего того лица, хотя наважнейшого, кождый врядъ, взявши доходъ свой пятьдесятъ грошей, маеть тое лицо тому, хто его зысчеть, вернути и отдати, а злодей за вину злодейскую горломъ каранъ будеть. А которое бы лицо стояло меншъ копы грошей, от того выкупна толко шесть грошей брано быти маеть.

Артыкулъ 25.

О блудяги.

Кнежата и панове хоруговные, панове рада, также и врядники земские о блудяги, также и о то, с чого злодей согнанъ бываеть, мають ся заховати тымъ обычаемъ, нижей описанымъ, то естъ, кгды ся чый конь албо якое иное быдля приблудить або згонъное трафиться на йменью ихъ, будеть взято до двора ихъ, а будет ли в тотъ часъ в томъ именью панъ самъ, то такое быдля можеть у себе ховати, поки его тотъ, чые будеть, отыщеть. А отыскуючы, маеть от кождого коня тотъ, чый будеть, дати по два грошы, а быдло маеть отдавати даромъ. А шляхта, которые седять у поветехъ, преблудные або згонные клячы и быдло мають водити и давати до дворовъ наших, а болшъ трох дней не мають в себе ховати блудяги, также и згонного. По тому ж ся и врядники князские, паньские, кгды приблудное або згонное быдля або колко ихъ в небытности в томъ именью самыхъ пановъ ихъ трафить, мають ся заховати и до вряду нашого отдавати, яко о шляхте вышей в сем же артыкуле описано. А врядъ нашъ тую два грошы, беручы быдло, маеть тому, хто его дасть, отдати, а потомъ то собе у того, чые быдло будеть, озметь. А хто бы з шляхты або з урядниковъ князьскихъ, паньскихъ через три дни в себе блудяги або згонные ховалъ и до двора нашого не далъ, а то будеть на него переведено и лице з дому шляхетского або з двора паньского вынято, тогды того маеть ся справовати яко злодейства.

Артыкулъ 26.

О краденью збожя всякого, в копахъ на поли або в стиртахъ зложоного, такъже и сена.

Уставуемъ: кгды бы хто злодейскимъ обычаемъ чые збожъе жал або готовое жатое збожъе зложоное або сено крал, або сеножать злодейскимъ таемнымъ обычаемъ скосилъ, а тотъ, чые збожъе або сено, будеть беручы зосталъ, тогды тотъ, хто зостанет, маеть, поймавшы, вести с тымъ лицомъ, з возы и с конми, где всхочеть, будь до вряду нашого кгродского або до пана его, а тотъ врядъ нашъ або панъ з оного ч[о]л[о]в[е]ка справедливость учынити яко з ыншыми злодейми приличными виненъ будеть. Естли ж бы тые, што по жыто або по сено приехали, пойматися не дали, а в томъ кого с тыхъ злочынцовъ забито або ранено, тогды тот, хто забъеть, маеть стороне людямъ околичнымъ и тежъ на враде оповедати и вознымъ обвести и трупъ або ранныхъ на вряде и возному оказати, звлаща естли бы тые злодеи, змоцнившыся, трупъ з собою не взяли або, ранными будучы, не увошли. А будет ли о то ку праву притягнен, тогды мает того отприсягнутися самотреть з суседы, которые бы при томъ были, а в недостатку людей сторонъныхъ—з слугами, подъдаными своими, ижъ при збож[ъ]ю своемъ забилъ або ранилъ; таковый головщины ани ранъ платити не будеть повиненъ. Пакли ж бы тые злочынцы, змоцнившыся, того пана самого, будь слугу и подъданыхъ его при его жъ збожъю побили и поранили або и забили, а то бы на них слушнымъ правомъ было переведено, таковые будуть повинны кгвалтъ платити дванадъцать рублей грошей и раны подданымъ оправити, якого стану будуть. А ранит ли хлопъ шляхтича, тотъ горъло тратить. А естли бы шляхтичъ ш[л]яхтича в такомъ припадку забилъ, тотъ горломъ каранъ будеть и головщына, к[г]валтъ и шкоды з ыменья плачоны, а за зраненье навезка маеть быти плачона. А забъет ли шляхтичъ простого ч[о]л[о]в[е]ка, тотъ к[г]валтъ, шкоды и головщыну платити маеть. А простый ч[о]л[о]в[е]къ за простого забитье горломъ каран будеть. Также кого бы поймано крадучы снопов[ь]е с копъ або сенъные копы або тежъ збожъе, у пряжмо режучы под колосъ, таковый простый ч[о]л[о]в[е]къ, кгды будеть з лицом приведенъ, маеть у столпа пугами битъ быти, а шкоду з маетности заплатити, если што болшъ будеть менити. А естли бы на злодействе в поли не поймано, але лице в дому найдено албо следомъ присочоно, о то, яко и о иншомъ злодействе, маеть быти сужоно водлугъ сего статуту.

Артыкулъ 27.

О покраденье ставу и сажовъки.

Уставуемъ: кому бы злодейскимъ обыча[е]мъ ловлено рыбы в ставе або в сажавце [!], таковый, кгды будеть пойманъ и приведенъ до вряду з лицомъ первшый разъ, за доводомъ маеть быти пугами битъ. А где бы тотъ же другий разъ з лицомъ былъ пойманъ, тот за доводомъ слушнымъ урезаньемъ уха каранъ будеть. А е[с]тли ся того жъ третий разъ допустить, тотъ за доводомъ слушным маеть быт[и] каранъ яко злодей, хотя бы лицо не стояло шацуючы и десети грошей.

Артыкулъ 28.

О шкоде, которая ся станеть часу пожоги або в стоненью на воде.

Кгды бы се трафило подъ часомъ от огню погоренья в месте або где колвекъ або бы хто на воде стонулъ, а в тотъ часъ што ему згинуло, которая згуба у кого колвекъ бы се затаеная показала, тогды тотъ, чыи речи будуть, маеть з нимъ о то чынити правомъ яко о злодейство. А тотъ, у кого то познано будеть, окажет ли то оповеданьемъ на вряде, же то з воды або с огня вынял, от злодейское вины воленъ будеть. А тые речи тому, чыи суть, вернути, але тотъ, хто такие речы свои всхочеть мети, половицею цены, чого стояти будеть, маеть у оного окупити.

Артыкулъ 29.

О людяхъ своволныхъ таковыхъ, который бы, намовивши невесту мужатку, и з нею уехалъ.

Повстегаючы злость людей своволныхъ, уставуемъ, ижъ где бы хто, якого колвекъ стану будучи, пропомневши боязни божое и повинности своее хрестияньское [у арыгінале: хрестиюньское], смелъ подъмовити и взяти кому жону, хотя жъ зъ ее призволеньемъ, и уехалъ бы з нею, тогды, будет ли постигненъ в дорозе, в месте, в господе и на которомъ колвекъ местцу, маеть быти пойманъ и до вряду кгродского веденъ, яко и который иный злочинца, або тежъ з оселости его земъское, позвы ку праву будучи притягненъ на рокъ завитый, таковый за доводомъ слушнымъ горло тратить. Такъ тежъ и тая невеста, которая на то позволила, на горле карана быти маеть. Кроме того, естли бы мужъ ее горломъ карати не хотелъ, то мает зостати при воли его. А шкоды за бранье маетности за позволеньем таковое белое головы, то все з совитостью з ыменья его, хто то учинить, плачона быти маеть. Где бы ся тежъ то трафило, жебы в гоненью тотъ, который будеть гонити, от того, хто з мужаткою уездъжаеть, забитъ былъ, або бы тежъ того, который бы таковымъ преречонымъ способомъ з белою головою уездъжалъ, забито, тогды в томъ судъ заховатися маеть водлугъ того, яко о чужоложнику в сем же розделе, артыкуле нижнем тридцатомъ естъ описано.

Артыкулъ 30.

О каранью чужоложъства.

Забегаючи, межи иншими, и той злости, абы ся в панъствахъ наших християнъскихъ не множила, то естъ чужоложство, которымъ немней панъ богъ бывает ображонъ, уставуем: естли бы мужъ, маючи в подозрен[ь]ю жону свою о чужоложство, и на тое бы ся насадиши [!] якого колвекъ стану застал з нею на вшетечности, тогды волно будеть мужу, оного чужоложника и з женою своею поймавши, и то суседом околичным заразомъ оповедати, потомъ также заразомъ вести до вряду нашого кгродъского, а тамъ, показавши то передъ урядомъ явне и правдиве, не з вазни, яко противъ жоны або тому, кого с нею засталъ, маеть ихъ самотреть албо з людми сторонъними, которые бы при томъ застатью и пойман[ь]ю были, албо з слугами и челядью домовою поприсегнути. А они обое горломъ карани быти мають.

То жъ ся маеть розумети и о панъне, которая бы, боязнь божую и въстыдъ отложившы на сторону, вшетечне мешкала, на которую повинъным по отцы и по мечу волно будеть инъстыкговати. Вед же вряд маеть пилне того постерегати, абы то не было з вазни, ненависти або с хтивости маетностей якихъ. А естли бы тот чужоложникъ не далъся поймати и в томъ былъ забит, тогды о томъ розсудокъ маеть быти такъ чиненъ, яко о гвалтовнику [!] дому шляхетъского, на кгвалте забитомъ, естъ описано. Пакли ж бы от чужоложника мужъ в тотъ часъ при застанью его былъ забитъ, таковый мужобойца горло и честь тратить, а головщина з ыменья албо маетности его плачона будеть, и жона такая также горломъ будеть карана.

Артыкулъ 31.

О каранью зводницъ.

Уставуемъ, хотячи то мети вечными часы, ижъбы подданые нашы, под росказаньемъ нашымъ мешкаючи, учстиве жили, зысков спросныхъ богу и людемъ почстивымъ обрыдлых не наследовали, прото абы такие люди, будь мужчизна або белая голова, в местех нашихъ не были терпены, которые звыкли для зыску своего спросного намовляти панъны або вдовы и мужатки кому кгволи для спросности телесное, такъ ижъ хотя бы с которое могло быть што доброго въ стане малженъскомъ, оборочаются за намовами зводницъ внивечъ, въ спросное а вшетечное помешкан[ь]е. Для того росказуемъ воеводамъ, старостамъ и уряду месткому, абы такихъ за оказанъемъ явнымъ имати казали и карали обърезаньемъ носа, ушу и губы и з местъ выганяли. А где бы ся и по такомъ каранью тым же спроснымъ зыском жывили, тогды врядъ такихъ на горле карати маеть.

Артыкулъ 32.

О забитью бенкарта.

Хто бы бенъкаръта забилъ, таковый от горъла воленъ быти маеть. Ведъ же естли бы матъка жива была оного бенкарта, волно ей будет головщизны доходити, а головъщизна таковому сыну, бы его тежъ мела нетъ ведома якимъ зацнымъ чоловекомъ, не маеть быти плачона, одно яко за простого стану чоловека.

Артыкулъ 33.

О коръчъмахъ покутныхъ.

Обачаючи тежъ то, ижъ в томъ панъстве, великом князств[е] литовъскомъ, на частыхъ местцахъ, на селахъ намножилосе свовне много коръчомъ покутныхъ, которые коръчмы покутные не одно на великой переказе местомъ нашымъ и шляхетъскимъ, але и в речи посполитой сказу и шкоду приносятъ не меншъ с тое самое причины, же в таковых коръчмахъ покутнихъ уставичне забойства, злодейства, розъбой и инъшие многие збытъки деютъся, чому забегаючы, уставуем, то хотечи мети, абы яко на именьяхъ князъскихъ, панъскихъ и шляхетъскихъ коръчмы покутъные нигъде не были, и подданые, такъ нашы, яко панъские, князьские и шляхетъские, по селах в домехъ своихъ пива на шынъкъ не варили и не продавали, также медомъ и горелъкою не шинъковали и шинковъ жадныхъ не мели, кромя стодолъ при гостинцохъ и дорогахъ звыклыхъ, также на именьяхъ паньскихъ и шляхетъскихъ, в которыхъ для людей переежьчихъ яко речы стравъные, такъ и шинъкъ уставичне быти можеть, а таковые коръчмы покутные в кождомъ воеводстве, земляхъ и поветехъ врядъ нашъ кгродъский черезъ наместники свои, придавъшы до нихъ возного поветового, яко у своихъ урадехъ, такъ и в ыншыхъ деръжавахъ замковъ и дворовъ нашихъ, которые въ ихъ воеводъстве або старостве, у волостях, по селахъ будут, гамовати мають. И где бы у которого кольвекъ подъданого нашого пиво, на шинкъ увареное, также медъ и горелъку шинковную знашли, тогды яко трунокъ, такъ и все начинье пивное, медовое и горельчаное — котлы, кублы, бочьки, а не иншую маетность забирати мають до замку або двору нашого. А с того половица пожитку маеть ити на шпиталь, а другая половица на оный врядь [!] кгродъский. А на именьяхъ, волостяхъ и селахъ панъскихъ, князскихъ и шляхетскихъ, всякого стану духовного и светъского с того не выймуючи, в кождомъ повете мають того постерегати и о такихъ коръчмахъ пильне выведыватися вряды кгродъские. А такого шляхтича, хто бы самъ корчмы покутные в селехъ або в дому своемъ шляхетскомъ мелъ, а не на гостинцу, албо при якой дорозе, не збудовавшы дому гостиного, мелъ, албо людямъ своимъ в домехъ ихъ мети дозволилъ, кождому шляхтичу, хто похочет, позвати о то до суду кгродского на рокъ завитый волно. Кгды то на которого шляхтича доведено будеть слушнымъ доводом, мает вины заплатити три рубли грошей, которое вины половица маеть належати тому вряду кгродскому, а другая половица маеть быти дана тому шляхтичу, хто позоветь. А тотъ вряд кгродъский повиненъ будеть тому всему досыть чынити и то выконывати подъ виною на насъ, г[о]с[по]д[а]ра, до скарбу нашого земского того панства дванадцатма копами грошей. По тому жъ старосты, державцы, тивуны и кождый врядъ нашъ, который бы в том былъ противенъ а вряду кгродскому тыхъ корчомъ покутных на волостяхъ нашыхъ забирати боронилъ албо бы самъ таковыхъ корчомъ ужывати подъданымъ нашымъ по селахъ для пожытку своего позволалъ [!], таковой же вине менованой подлечы виненъ будеть за кождымъ разомъ, колько бы кроть о то для невыконанья того артыкулу от кого колвекъ передъ насъ, г[о]с[по]д[а]ра, або до суду головного позванъ былъ.

Артыкулъ 34.

Хто бы кого обвинилъ и передъ врядъ привелъ, мает того жъ часу описатисе, на который рокъ маеть доводити.

Тежъ хто бы, кого обвинившы передъ врядомъ до везенья албо за паруку давшы и рокъ от вряду ку доводу принявшы, самъ без слушное причыны на тотъ рокъ не сталъ албо слушное причины нестанья своего через посланца на тотъ рокъ не ознаимил [!], тогды врядъ [у арыгінале: врюдъ] по выистью [!] оного року обвиненого маеть волнымъ учынити и вольное мовенье у права с тымъ, хто его обвинившы не доводилъ, заховати.

Артыкулъ 35.

О цыганехъ.

Ижъ цыгани суть люди непотрабные [!] и порожнуючые, которые не толко жадное послуги, пожытку нам и никому в речы посполитои не чынят, але и овшемъ шкода через нихъ в ошукиванью простыхъ людеи и в крадежы, а снать и въ збиванью потаемном не малая ся дееть, а часомъ, выходечы до иншыхъ земль, звлаща неприятелскихъ шпекгами и вожами до злого могли бы ся ставати, а прето уставуемъ, абы ихъ конечно от того часу нигде в панстве нашомъ, великомъ князстве литовскомъ, и в земляхъ, до него належачыхъ, далей не было ховано, чого старостове пограничъные и иные державцы нашы мають с пилностью постерегати, абы до земли нашое не входили. А кгды их которыи з нихъ з староства и вряду своего выпудить, абы жаденъ з ынъшыхъ становъ подъданыхъ нашыхъ черезъ то ихъ не прыймовалъ и на именъяхъ своихъ не переховывалъ подъ виною до скарбу нашого дванадъцатма копами грошеи.

Артыкулъ 36.

О новомъ назвиску челеди дворное место того, што ихъ передъ тымъ неволниками звано.

Ознаимуемъ и ведомо то чынимъ, ижъ што в семъ теперешнемъ статуте тыхъ людей о челядь, которые передъ тымъ неволниками были званы, отменено назвиско и поменено, а написано их челед[ью] дворною отчызною, материстою, купленою, або полонениками, тогды тое отмененье назвиска ихъ часу права на кождомъ враде, кгды бы хто своеи челяди неволное пойскивалъ, никому с подъданыхъ нашыхъ до ужыванья и доваженья справедливости ничого шкодити и перешкажати не маеть.

Артыкулъ 37.

От которого часу тымъ статутомъ судити мають.

А тые вси речы, в томъ статуте описаные, мають ся стегати на речы пришлые от того часу, яко за конъфирмацыею нашою, г[о]с[по]д[а]ръскою, ку ужыванью сесъ статуть выдан, выймуючы и варуючи толко артыкулъ тринадъцатый в розделе семомъ о способе доводу заставъ давныхъ, которые уросли по выданью первъшихъ старыхъ статутовъ.

© Алег Ліцкевіч, 2010