Артыкулы: Струцінскі Ян Міхал

Струцінскі Ян Міхал (?—пачатак 1745) — дзяржаўны дзеяч ВКЛ, кашталян інфлянцкі.

З шляхецкага роду герба «Сас». Бацька: Мікалай, чашнік вількамірскі. Маці: Марыяна з Панкевічаў.

Магчыма, у маладосці служыў у войску. Самавольна тытулаваўся чашнікам вількамірскім (1697—1701). Стольнік вількамірскі ў 1701—1713, стараста сяйвейскі і віжанскі ў 1709—1740[1], шакінаўскі ў 1713—1732, вількамірскі ў 1713—1730, паручнік каралеўскай пяцігорскай харугвы войска ВКЛ з 1709, харужы, палкоўнік, кашталян інфлянцкі ў 1737—1744. Пасол на соймы 1701—1702, 1703, 1724, 1733, дэпутат Варшаўскай вальнай рады 1710.

У 1699 сакратар пасольства ў Турцыю. Быў прыхільнікам караля Аўгуста ІІ, далучыўся да Сандамірскай канфедэрацыі. Удзельнічаў у забяспячэнні расійскіх войск на тэрыторыі ВКЛ. У 1719 пасол у Крым і Турцыю. У 1733 падтрымаў абранне на трон Станіслава Ляшчынскага, пасля перайшоў на бок Аўгуста ІІІ.

Маёнткі: Салокі, Люшнева, Снегі (Браслаўскі павет), Анталепты (Вількамірскі павет), Шемберг (Курляндыя). Дамогся для Салокаў, Анталептаў і Шэмберга прывілеяў на таргі і кірмашы (1713)[2].

Удзельнічаў у заснаванні Анталептаўскага кляштара кармелітаў босых.

Пахаваны 3.3.1746.

Жонка: Брыгіда з Бергаў (бацька: Уладзіслаў Францішак Берг, кашталян інфлянцкі).

Сын: Юзаф.

Дачка: Іаана.

Падрабязнасці:

Urzędnicy Wielkiego Księstwa Litewskiego. Spisy. Tom I. Województwo wileńskie. XIV—XVIII wiek. / Pod redakcją Andrzeja Rachuby. Opacowali Henryk Lulewicz, Andrzej Rachuba, Przemysław P. Romaniuk przy współpracy Uładzimira Jemialianczyka i Andreja Macuka. Warszawa: DiG, 2004. 764 s.

Matsuk Andrei. Strutyński Jan Michał // PSB. Z. 182. T. XLІV/3. Warszawa; Kraków, 2007. S. 479—481.

© Валерый Пазднякоў, 2019

[1] КМФ-18.1.172.265—266.

[2] КМФ-18.1.159.149, 149 об., 150.